भांगरभूंय | प्रतिनिधी
नवी दिल्ली, खबरां संस्था: लोकसभा वेंचणुकेच्या तीन टप्प्यांनी स्टार प्रचारक, विशेश म्हळ्यार राष्ट्रीय राजकी पक्षांच्या मुखेल फुडार्यांनी बरें उदाहरण मांडचें आनी समाजाच्या नाजूक आराखड्याचें लुकसाण करचें न्हय, अशी अपेक्षा वेंचणूक आयोगान मंगळारा उक्तायली. उरिल्ल्या टप्प्यांतलीं भाशणां सांबाळून करपाची जापसालदारकी फुडार्यांची आसा, अशें आयोगान म्हणलां. खुबश्या फुडार्यांनी आदर्श आचारसंहिता पाळूंक नाशिल्ले कागाळीक लागून हें विधान आयलां. हे खातीर भाजप अध्यक्ष जेपी नड्डा आनी कॉंग्रेस अध्यक्ष मल्लिकार्जुन खरगे हांकां आयोगान कारणां दाखोवपाची नोटीस दिल्या.
वेंचणूक आयोगाचे भुमिकेर नागरी समाज तिडकलो
वेंचणूक आयोगाचेर नागरी समाजाचें चेंपण वाडतूच आसा. चार टप्प्यांतल्या वेंचणुकां उपरांत जाल्ल्या मतदानाचे टक्केवारी विशीं दुबाव आशिल्ल्यान सुजाण नागरिकांच्या शिश्टमंडळान मंगळारा आयोगाची भेट घेतली. हें शिष्टमंडळ ४००० सामाजीक कार्यकर्त्यांचे सयेचें निवेदन घेवन आयोगा कडेन पावलें. तांची मागणी आशिल्ली, फॉर्म १७ सी च्या भाग एक प्रमाण मतदानाचो डेटा भौशीक करचो. देशांतल्या १२ शारांतल्यान व्हड मोहीम सुरू जाली तेन्ना शिश्टमंडळान आयोगा कडेन संपर्क साधलो. हे मोहिमेक ग्रो युवर स्पाइन ईसीआय (स्ट्रेंथन युवर स्पायन इलेक्शन कमिशन) हें नांव दिलां. हांगच्यान शेकड्यांनी पोस्टकार्डां आयोगा कडेन धाडल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
