फुडारा खातीर चुकी सुदारपाची गरज

भांगरभूंय | प्रतिनिधी

खात्यांचो दोंगर माथ्यार आशिल्ले, पिरायेचीं साठी पुराय केल्ले कितले मंत्री सरकारांत आसात? पिराय वाडली तरीय तांकां मुख्यमंत्री जावपाचीं सपनां पडटात?

साहित्य अकादेमी पुरस्कार मेळिल्लें “सासाय” हें कवी बाकीबाब बोरकार हांचें कोंकणी पुस्तक अस्मिताय दिसाच्यो यादी सांगपी. ह्या पुस्तकाची कवी मनोहरबाब सरदेसाय हांची प्रस्तावनां गोंयची अस्मिताय राखपाक कोणे खंयच्यान मुळावो वावर केला तें सांगता.
गोंय मुक्ती खातीर गोंयकार गोंया भायर रावन वावुरिल्ले तशेंच अस्मिताय दिसा पासतय. तांचीं नांवा सासाय पुस्तकाच्या प्रस्तावनेंत आसात. चडश्या म्हालगड्यांचो भोवमानय सरकारान केला, फुडारांतय करपाची संद सरकाराक आसा. अस्मिताय दिसाचें पुस्तक विद्यार्थ्यां मेरेन पावोवपाचें व्हड काम सरकार करता तें म्हत्वाचें. फाटलीं पंचवीस तीस वर्सां जाल्ल्यो चुकी सुदारपा पासत सरकारान येवजण करची. 2027त 30 मेळोवपाची ती दिका जावं येता. गोंयचें राजकारण कशें बदलता ताचेर नदर दवरपी लोक सरकारा लागीं आसात. हालींच गोंयांत परतल्ले आयएएस अधिकारी सरकाराचे नवे येवजणेचे, चुकी सुदारपाचे बांदावळीक उपेगाचे.
गोंय विधानसभेच्या शिंयाळ्या अधिवेशनांत हडफडेंच्या बर्च क्लबांतले घडणुकेचेर चड बोवाळ जालो. युनिटी माॅलाचेर जाल्लो खवदळ सरकाराक चुकी सुदारपाक उपेगी.
फाटल्या वर्सांतली लयराई देवीचे जात्रे वेळार जाल्ली खेटाखेट, हडफडें क्लब जळीतकांड. हालीं युनिटी माॅला आड पेटिल्ल्या आंदोलनाचेर बोवाळ घालप हें विरोधी आमदारांचें काम. विधानसभा वेंचणूक 2027 लागीं आयिल्ल्यान विरोधी आमदार सरकाराक वडीर काडटलें ताची जाणविकाय सरकारक आशिल्ली. कोर्ट नदर दवरुन आशिल्ल्यान सरकारान जाल्ल्यो चुकी सुदारपा पासत पावलां घाल्यांत. विरोधी वांगड्यांच्या खवदळा परस सरकाराच्यो जापो म्हत्वाच्यो आसात.
युनिटी माॅल, हडफडें क्लब, लयराई जात्रा ह्या तीन घडणुकांनी पंचायत, पुलीस, जिल्हो प्रशासनाची घाळपणां दिसतात. पंचायत खात्याचो वावर वाडला, जिल्हो पंचायतींक अधिकार दिवपाची गरज उप्रासल्या. मानधन वाडयलें, उदरगती खातीर निधी दिलो म्हणल्यार सरकाराची जापसालदारकी सोंपना. जिल्हो पंचायतींक सहकारी तत्वार शेतकाम करपाचेंच न्हय परवाने दिवपाचे, नियोजनाचे अधिकार दिवपाक जाय.
कित्याक जालें पंचायत पांवड्यार घाळपण? फाटलीं धा वर्सां पंचायत मंत्री कोण आशिल्ले? सध्या पंचायत मंत्री कोण आसात? पंचायत मंत्र्यांचेर चेपण आसा? पंचायत मंत्र्यांक खात्याचें वजन चड जालां? सोदल्यार पंचायत मंत्र्यांक तांच्या खात्यांचें वजें जालां तें दिसतलें.
खात्यांचो दोंगर माथ्यार आशिल्ले, पिरायेचीं साठी पुराय केल्ले कितले मंत्री सरकारांत आसात? पिराय वाडली तरीय तांकां मुख्यमंत्री जावपाचीं सपनां पडटात?
केंद्रीय मंत्री नितीनजी गडकरी हांणी पावणेदोन वर्सां आदीं सरकाराक मंत्र्यांच्या खात्यांचो नियाळ करपाची सुचोवणी केली. नियाळय जालो, मात्शे उसरां बदलय जाले, सवकासायेन वेवस्थेंत सुदारप जाता. तीन चार म्हयन्यां भितर व्हड बदलांची अपेक्षा आसा, मंत्रीमंडळांत न्हय प्रशासनांत. जिल्हो पंचायत वेंचणुकेन सरकाराक सांबाळ्ळें, सादूर केलें. एक रकादय मेळ्ळा सरकाराक. गांवा कडेन पळोवपाचो, वचपाचो, उदरगतीचो ते खातीर गांवकारांक विस्वासांत घेवन. विश्वासांतल्यान सैम सांबाळून गांवांत उदरगत जावंक शकता. सरकाराक ती मोख फुडारांत दवरची पडटली.
हालींच गर्देंत पणजेतलें पासयेर चलतना नव्या म्हामार्ग, अटल सेतूक जोडपी पुला आड झुजपी भाजपाचो एक कार्यकर्तो मेळ्ळो. आरे, खंय गेलें तुजें झूज? सरकार आमचेंच, भिरांत ना, घरकान्न सरकारी अधिकारी- ताणें वळख करून दिली, जाप मेळ्ळी, अजाप दिसलें ना.
कोविडा वेळार सरकारान केल्लो वावर मोलादीक, सरकारी नोकऱ्यो तरणाट्यांक मेळ्ळ्यात, प्रायव्हेट नोकऱ्यां पासत सुविधा जाल्यात. आयटी, इटीची चुकिल्ली बस स म्हयन्यां भितर मार्गाक लागतली. थळांतर मुळाव्या थळाव्यांचें, गोंया भायल्यांचे जाता ती जाणविकाय सरकाराक जाली. गोंयचीं व्हड शारां मुंबय, पुणें, बंगळुरूचे वाटेन वतात, कामाच्या वगतार (पिक अवर्स) तेन्ना एक्यूआय इंडेक्स वाडटा. उदरगतींतल्यान लुकसाणय जालां, जाल्ल्यो चुकी सुदारतना तें राखपा पासत सरकारान केल्ल्यो तजविको कायद्यान बांदपाची गरज उप्रासल्या. फेस्तां, कला महोत्सवां इतलेच समाजीक सुरक्षा येवजणेंत बदल जावप गरजेचे. अन्नपुर्णेचें ताजें अन्न दिवपी वेगळें रुप ग्रामीण अन्न उत्सवांतल्यान दिसलें. तेला, तुपा विशीं, ताज्या अन्ना विशीं जागृताय जावपाक लागल्या. राखणे, सेवक, मार्गदर्शक रस्ते, जार्दिन्या राखपी, देखरेख दवरपी जाय.
येरादारी सुदारप एक आव्हान, बिजलेच्या खांब्या वयल्यान भौशीक वीज चोरतात, वीज खात्यांतय मनीसबळ वाडोवपाक जाय. भलायकी, भौशीक बांदकाम तशेंच हेर कांय खात्यांनी पांच धा वर्सां डीपीसी बसका (डिपार्टमेंटल प्रमोशन कमिटी) जावंक नासत जाल्यार त्यो बेगीन जावच्यो. कोयर वेवस्थापनांत सरकार व्हड बदल हाडटा ते जावचेच. ताडपत्रेंत वचपी पणजेंतल्या फार्मासी म्हाविद्यालयाचेर पत्रे घाले, लागसल्ली पयलींची शिक्षण खात्याची बिल्डींग सुदारची. दुसरें वैजकी म्हाविद्यालय गोंया खातीर रोखडें हाडपा पासत सरकारान वावुरचें.
जाल्ल्या चुकींची वळेरी खूब व्हड आसतली, फाटल्या धा वर्सांतल्यो तशो उण्योच ते आदींच्यो खूब आसात. जाल्ल्यो चुकी सुदारपाक सरकाराची थिराय म्हत्वाची, केंद्र सरकाराचो पालव आशिल्ल्यान गोंयचें अर्थकारण व्हड जाता. त्या अर्थकारणाचो लाव समेस्तांक चडांत चड मेळचो, खऱ्या गोंयकारांचो हुस्को पयस करचो.
कित्याक जाय युनिटी माॅल? फक्त नोकऱ्यो न्हय थळाव्या उत्पादनांक, खाणा जेवणाक, कलेक उर्बा, माची मेळची. दायजाची जतनाय घेतना मातयेभरवण जायत आयिल्लें, आत्र्या पयऱ्यान उजो पेटपी दायज सुदारप? वजन पेलवतलें दायजाक? अभ्यास जावचो बदलपी वाऱ्या पावसाचो शिंयाचो.
विखुरिल्लो काँग्रेस आनी हेर प्रादेशीक पक्ष, आम आदमी पक्षाक जिल्हो पांवड्यार सत्ता मेळ्ळी ना. आम आदमी पक्षाक आपली चूक कळ्ळी, वाल्मिकी दत्ता श्रीपाद नायक प्रदेशाध्यक्ष जाला. विदेशांत उंचेलें शिक्षण घेतिल्ल्या वाल्मिकीचे बापूय एक इंजिनियर, लेखक, राजभास कोंकणी चळवळींतले म्हालगडे, प्रदेश भाजपाचे मुळावे कार्यकर्ते. केंद्रीय मंत्री श्रीपाद नायक हांकां ताची याद येता आसतली. पयले चार भाजपा आमदार गोंय विधानसभेंत पावोवपाक वाल्मिकीच्या बापायचो वांटो आसा. वाल्मिकी गोंयचो आम आदमी पार्टेचो मुळावो वांगडी. झारखंडाचे मुखेल न्यायमुर्ती महेश सोनक हांचे भाव सतीश सोनक हांणी वाल्मिकीक आम आदमी पार्टेची वाट दाखयिल्ली. सतीश आदले संरक्षण मंत्री मनोहर पर्रीकार हांकांय पणजेंतल्यो वाटो, प्रशासनांतल्यो चुकी दाखोवपी. एक मेसेजीचेर पांचशे कार्यकर्ते एकठांय हाडपाची तांक सतीशाक आशिल्ली, वाल्मिकी तें करुंक शकतलो व्हय? फुडार कसो आसतलो तें वाल्मिकीक होल्मलां, तो सादुरतायेन मुखार वतलो अशी आस्त बाळगुया.

सुहासिनी प्रभुगांवकार
9881099260