भांगरभूंय | प्रतिनिधी
नातलां लागीं पावल्यांत. घराघरांनी, दुकानांनी नेवऱ्यो, कलकल (शंकरपाळ्यांवरी), दोस (चण्याडाळीचीं कापां), चॉकलेटी, केक करपाक आरंभ जाला. बाळक जेजू खातीर गोठे करपाचो वावर सुरू आसा. व्हडलीं नकली भांगराळीं हरणां, सुणीं, म्हशी, बावल्यो बाजारांत, घराच्या कोनशांनी दिसतलीं. सानुले गोठेय बाजारांनी पळोवंक मेळटात. नातलांक येवकार दिवपाक लिकलिकपी नखेत्रां, लायटी लागल्यात. जिंगल बेल, जिंगल बेल, जिंगल ऑल द वे ह्या गीतांच्या तालार सांताक्लॉज रस्त्यार भोंवतनाय दिसतात. घोड्यागाडयेन न्हय मर्सडिजान.
नातलां येवचे पयलींच गोंय मुक्ती दिसाच्या आपल्या भाशणांतल्यान गोंयचे राज्यपाल, मुखेलमंत्र्यांनी, सवस्तकायेचो रकाद पावयला. नातलां कुडकुड्याचें शिंयाळें ऋतुमान अंदूं घेवन येता. मुखेल करून सांजवेळा, रातीं उसरां, दिसा उजवाडा. क्रिस्तांव भावांची नातलां म्हळ्ळ्यार हेर धर्म, जातींची दिवाळी आनी चवथ. दिवाळी, चवथीवरीच नातलां मनयतनाय आमी सादूर रावया. इगर्जेनी मीसाक वतना, माराण मारतना, गीतांच्या तालार नाचतना, गाडी चलयतना, पार्किंग करतना, खातना आनी पीतनाय. खुशालभरीत नातलांक येवकार दितना 2025 वर्साच्या येवकाराचो, एकचाराचो उलो मारुया.
2024 वर्स सोंपपाच्या वाटेर आसतना नव्या येवजणींची, अर्थिक मांडावळीची तयारी जाता, घरांत, कचेरेंत, राज्य आनी देश पावंड्यार.
कितें घडलें फाटल्या वर्सापरस फुडें कितें जातलें हें आमी चिंतचें, सांगचें पडटलें. थोडें कल्पनेंतलें, थोडें सपनांतलें. एखादरी तुमच्या आमच्या चिंतनाकय फाटीं उडोवपी घडणूक घडटली. खीण दोन खीण मन अस्वस्थ जातलें, पूण नवे उमेदीन वावराक लागचेंच पडटलें फुडारा खातीर.
आवय्यस, कितल्या बेगीन सरलें 2024 वर्स? वर्साच्या पयल्या दिसा केल्ले संकल्प पुराय जालेच ना अशें तुमी आमीय एकामेकांचेर फातर मारत रावतले. पयल्या दिसाचे संकल्प याद जातले. तांकांच मात्सो नवो रंग, रूप दिल्यार? तेपरस नवे संकल्प केल्यार? ते संकल्पय फुडारा खातीर आसचे. शिता फुडें मीठ कित्याक खावचें अशें म्हाका दिसता. पूण नवे पिळगेक तशेंच दिसतलें व्हय? ती पिळगी शीत कमी जेवपी, चपाती, सँडविच, पिझ्झा खावन रावपी, मीठ मात्शें उणेय आसत. जेवतना खातनाय चिंतूया फुडाराचें, फुलोवयां सपनां. थोडीं मनाच्या कोनशाक दवरुया, थोडीं संवसारांत शिंपडूया. नातलांक संवसारांतले लोक जशे गोंयांत येतात तशेच संवसारांतल्या कोनशा कोनशांनी गोंयकारय. तांकां बदलिल्लें गोंय दिसतलें, उत्तर गोंयच्या गोंयकारांक मोपा विमानतळ लावाचो जाला, भावता दाबोळे विमानतळाचे धांवपट्टेर विमानांची गर्दी जातना.
मोपा आयुश स्मार्ट सिटी करपाचें सपन पळयतना तुयेंच्या इलेक्ट्रॉनिक्स, इनफॉर्मेशन टेक्नोलोजी सिटीच्या सपनांची याद करुया. इ टी, आय टी बराबरीन ए आय (आर्टिफिशल इंटेलिजन्स) केंद्र गोंयांक कित्याक मेळचें न्हय? ते खातीर 16 व्या वित्त आयोगा मुखार पंचवीस वर्सां आदली सुदारिल्ली येवजण दवरुया. फुडाराचें तें सपन, लागसल्ल्या आनी पयसुल्ल्याय. डबल इंजिन सरकारान फाटल्या पन्नास वर्सां परस चड उदरगत केल्या कित्याक म्हणलें आसत गोंय मुक्तीदिसा मुख्यमंत्री डॉ. प्रमोद सावंत हांणी? व्हडवीकाय कसली ते सांगतात, मोपा विमानतळाची. 60 वर्सां आदीं मोपा विमानतळाचें सपन गोंयचे भाग्यविधाते म्हणून पुस्तकांनी पाविल्ले आदले मुखेलमंत्री दयानंद बांदोडकार हांणी. उपरांतच्या मुख्यमंत्र्यांनी तें सपन पालोवचें ना हाची जतनाय घेतली. मोपा विमानतळाची येवजण, डीपीआर, प्लॅन, अधिकारीणीची बांदावळ फाटल्या 25 वर्सां सावन जाली, चालीकय लागली. मोपा विमानतळाच्या वांठारांत रातचीं भुतां येतात अशी भिरांत उक्तावचे परस आतां केप्यां, सांग्यार मिनी विमानतळ जाय अशें मागप समा जातलें. भुतां नाचोवप्यांनी ती मागणी केली नाजाल्यार सरकार करतलें. उदरगतीचो तो एक पावंडो, भूत न्हय सत. उदरगतीच्या विंगड विंगड पावंड्यांची माह्यती दितना 2027 त 27 आमदारांचे तयारेक गोंयचे मुख्यमंत्री लागल्यात हें होलमता. जॉब स्कॅमांत तांचे घरकान्नीचेर (सुलक्षणा सावंत) आरोप जाले तेन्ना त्यो अब्रु लुकसाणे पासत न्यायालयांत गेल्यात. तांकां आत्मविश्वास दिवपी तांचे घरकार हांचे बराबरीन वरिश्ठ आमदार दिगंबर कामत हेय आसतले, चुकोय दाखोवन दितले. मुखेलमंत्र्यांची घरकान्न शिकिल्ली, हायर सेकंडरींत शिकोवपी, वाचन करपी, अभ्यास करुन उलोवपीय. भाजपच्या पक्ष पावंड्यार राजकारणांत आयिल्ली अस्तुरी, राज्य, राष्ट्र पावंड्यार. तांचेय आदर्श आदले मुखेलमंत्री मनोहर पर्रीकार. अस्तंत बंगालाच्यो मुख्यमंत्री ममता बॅनर्जी, गोंयच्यो आदल्यो मुखेलमंत्री शशिकलाताई काकोडकार, मंत्री व्हिक्टोरिया फर्नांडिस हांचेंय राजकारण तांणी अणभवलां, पळयलां.
नव्या महाराष्ट्र सरकाराच्या वावराक आरंभ जाला त्या राज्याचे विधान परिशदेंतल्यान, उप राजधानीतल्यान. गोंयांकय एक उप राजपाटण मेळत व्हय? गोंयच्या राजपाटणांतल्यान सचिवालय, मंत्रालय पर्वरी व्हेलें, प्रशासकी कार्यालयांय गेल्यांत. आतां पर्वरेक उप राजपाटणाचो पावंडो मेळचो हो थाराव मांडचो पडटलो, कायद्यान तजवीक करची पडटली. पर्वरेचे आमदार पर्यटनमंत्री रोहन खंवटे हांणी अभ्यास केलाच आसतलो. लोकांक विश्वासांत घेवन. पणजे म्हापालिकेवरी, गरज पडल्यार शिस्तीन, आदली नेमावळ मोडून. मारामारी नाका, झगडींय नाकात कदेलां माथ्यार घेवन. तेंच आडावपाक एक देश एक वेंचणूक विधेयक मांडलां व्हय? आमदारांनी एकनिश्ठ रावंक जाय, एकनिश्ठेक शाबासकी मेळटा, निश्ठा मोडपाची आसा जाल्यार पक्ष सोडात अशी तजवीज त्या विधेयकांत आसची. मारामारी, झगडीं, बॉम्बस्फोट संसद, विधानसभांनी भायर आनी भितर जाल्लीं पळयल्यांत, दिसल्यांत.
गोंय विधानसभेंत आदले आमदार सुरेंद्र सिरसाट हांणी उखलिल्लो राजदंड, मोखिल्लो पेपरवेट, कदेलार बशिल्ले कडेन विरोधी पक्षमुखेली आमदार युरी आलेमांव हांच्या बापायक जाल्ले घावे. आदले विरोधी पक्ष मुखेली डॉ. काशिनाथ जल्मी हांकां आयिल्ली घुवंळ, पयलींच्या सभापतीं कडेन संघर्ष करपी पर्यटनमंत्री रोहन खंवटे ह्यो कांय देखी. पयलींचे मुख्यमंत्री प्रतापसिंह राणे हांच्या आंगार आदले आमदार दिलखुश देसाय हांणी उडयल्लें शेण. कोण हांसतले, कोण रडटले पूण राजकारणाचो पावंडो देंवोवपात आवाजापरस तन, मन, धन, काळजाक धपको दिवपाचें राजाकरण ना व्हय?
एक देश एक वेंचणूक, देशाच्या संविधानाचें अमृतोत्सवी वर्स ह्या विशयाचेर संसदेंत विधेयकां, थाराव मांडून भासाभास जाता. देसांतल्या उद्येजकांनी उदरगतीचे नवे वाटेन वचपाक आरंभ केला. महासत्ता जावपाचे वाटेर आशिल्ल्या भारता कडेन संवसारय आशेन पळयता. देसाचे संसदे भायर, संसदेंत बडोवप, मारपाची घडणूक घडटा. कितें सांगता हें राजकारण?
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
