भांगरभूंय | प्रतिनिधी
सुदीन ढवळीकार: बांदोडा ओम कला सृष्टी संस्थेच्या कलाकारांचो भोवमान
फोंडे: आयज मेरेन अंत्रूज म्हालांतल्या कलाकारांनी संवसारभर नामना मेळयली. नव्या कलाकारांची उमेद पळयल्यार फुडाराक निश्चीतूच बरे कलाकार तयार जातले अशें वीज मंत्री सुदीन ढवळीकार हांणी सांगलें.
बांदोडा ओम कला सृष्टी संस्थेच्या सगळ्या कलाकारांचो भोवमान वीज मंत्री सुदीन ढवळीकार हांचे हस्तुकीं जालो. ह्या वेळार माचयेर सरपंच सुखानंद कुरपासकार, जिल्हो पंचायत वांगडी गणपत नायक, माधवराव ढवळीकर ट्रस्टाचे मिथील ढवळीकार, पंच विशांत नायक आनी संस्थेचे अध्यक्ष संदीप फडते हाजीर आशिल्ले.
नवे संस्थेन नवो उपक्रम राबोवन थळाव्या कलाकारांक उर्बा दिवपाचें काम केलां. ताका लागून फुडाराक प्रेक्षकांक बरीं नाटकां पळोवपाक मेळटलीं. नव्या कलाकारांक अभिनयाचें प्रशिक्षण घेवपा खातीर माधवराव ढवळीकार ट्रस्ट गरजेचें सहकार्य करतलें, अशें मंत्री ढवळीकार हांणी सांगलें.
ओम कला सृष्टी संस्थेन फकत दोन वर्सांनी उत्कृश्ठ काम करून खुबशीं इनामां मेळयल्यां. हाचे वेल्यान कलाकारांच्या सहकार्यान संस्था योग्य दिकेन वळटा हें दिसून येता. म्हत्वाचें म्हळ्यार हे संस्थेन धोको आपणावन नव्या कलाकारांक दिल्ले संदीक लागून फुडाराक चड दर्जेदार नाटकां पळोवपाची संद प्रेक्षकांक मेळटली अशें मिथील ढवळीकार हांणी सांगलें.
ह्या वेळार सरपंच सुखानंद कुरपासकार हांणी बांदोडा पंचायत वाठारांत कार्यरत आशिल्ल्यो खुबश्यो नाट्य संस्था विवीध सर्तींनी वांटो घेवन गांवचें नांव पर्जळीत करता. कलाकारांनी अभिनयाच्या मळार प्रशिक्षण घेतना फुडाराक दर्जेदार कलाकार घडपाक मजत जातली अशें ढवळीकार हांणी फुडें सांगलें.
जिल्हो पंचायत वांगडी गणपत नायक हांणी ह्या वेळार आपले विचार उक्तायले. संदीप फडते हांणी येवकार आनी प्रास्तवीक केलें. विजेंद्र कंवळेंकार हांणी कार्यावळीचें सुत्रसंचालन आनी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
