भांगरभूंय | प्रतिनिधी
मुख्यमंत्रीः सांखळे करियर मेळाव्याचें आजोजनसांखळीः आयज कुशळटाय विकास शिक्षणाचो काळ आनी फुडाराक गोंय राज्यांत सगल्या मळार कुशळ उमेदवारांची व्हड गरज पडटली. त्या प्रकारचो रोजगार गोंयांत निर्माण जातलो आनी विद्यार्थ्यांनी शिक्षणा वांगडाच कुशळटाय विकासाचे अभ्यासक्रमूय करचे. हे खातीर दोनूय अभ्यासक्रम एकाच वेळार घेतल्यार विद्यार्थ्यांक बेगीन नोकरी मेळपाची संद मेळटली अशें आवाहन सांखळे मुख्यमंत्री डॉ. प्रमोद सावंत हांणी केलां.
सांखळे साई नर्सिंग इन्स्टिट्यूटांत गोंय कुशळटाय आनी प्रशिक्षण संस्थेन आयोजीत केल्ल्या करिअर मेळाव्याक भेट दिवन मुख्यमंत्री उलयताले. ह्या करिअर मेळाव्यांत हाजीर आशिल्ल्या तज्ञ प्रशिक्षकांनी विद्यार्थ्यांक बाराव्या वर्सा उपरांत खंयचो मार्ग आपणावचो, तशेंच खंयचें शिक्षण बेगीन रोजगार मेळोवपा खातीर फायदेशीर थारूं शकता हाचेर सल्लो दिलो. हे संबंदीं समुपदेशन दिल्लें.
मुख्यमंत्री डॉ. प्रमोद सावंत हांणी ह्या करिअर मेळाव्याक भेट दिवन सगल्या तज्ञ प्रशिक्षकां कडेन संवाद सादलो.
ह्या करिअर मेळाव्यां विशीं विद्यार्थ्यां मदीं जागृताय निर्माण करप गरजेचें आसा. तेच बरोबर आयज गोंयांत कितें जाय तें विद्यार्थ्यांक वळख करून दिवप गरजेचें जालां. फकत बारावी आनी पंदरावी मेरेन शिकून मागीर कांय कुशळटाय विकास अभ्यासक्रम शिकपाक वच्चे परस गोंयांतल्या विद्यार्थ्यांक बारावी उपरांत असो अभ्यासक्रम वेंचून काडून आपल्या फुडाराक बेगीन दिका दिवपाची संद मेळटा. कारण येवपी काळांत गोंयाक दरेका मळार कुशळ उमेदवारांची गरज पडटली. ते खातीर विद्यार्थ्यांनी कुशळटाय आदारीत शिक्षणाचेर चड लक्ष दिवप गरजेचें जालां.
गोंयांतल्या विद्यार्थ्यां कडेन कुशळटाय शिक्षणाची व्हड प्रतिभा आसा. ते खातीर तांकां योग्य मार्गदर्शन दिवन कुशळटाय शिक्षणाचे फायदे तांकां पटोवन दिवप गरजेचें. गोंयचे मुख्यमंत्री आनी सांखळीचे आमदार म्हूण आमी सांखळींतल्यानच ही मोहीम सुरू केल्या. हे मोहिमेंत गोंयभरांतल्या विद्यार्थ्यांच्या पालकांनी वांटो घेवचो आनी बारावी उपरांत खंयचें क्षेत्र तांकां फायदेशीर थारूंक शकता तें वेंचून काडचें. तांकां हे संबंदी समुपदेशन आनी मार्गदर्शन मेळपाक जाय. आनी ते प्रमाण तांणी मळार प्रवेश घेवचो, अशें मुख्यमंत्री डॉ. प्रमोद सावंत हांणी ह्या वेळार सांगलें.
साई नर्सिंग इन्स्टिट्यूटचे वेवस्थापक संतोष मुळीक ह्या वेळार हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
