भांगरभूंय | प्रतिनिधी
रोहन खंवटेः जागोर महोत्सवाच्या समारोप सुवाळ्यांत ज्येश्ठ कलाकारांचो भोवमान
भांगरभूंय । प्रतिनिधी
फोंडें: देशी- विदेशी पर्यटकांक गरजेच्यो सुविधा मेळोवन दितना गांवगिऱ्या वाठारांतले परंपरीक संस्कृतीचें आनी पर्यावरणाचें दर्शन दिवपाची गरज आसा. फुडल्या पांच वर्सांत सरकार पर्यटकांक सुविधा दितना गोंयचो सैम, पर्यावरण सांबाळपाक अदीक म्हत्व दितलें, अशें पर्यटन मंत्री रोहन खंवटे हांणी सांगलें. आर्ल- केरी वाठारांत जागोर महोत्सवाच्या समारोप सुवाळ्यांत ते उलयताले.
गोंय जागोर असोसिएशना वतीन आयोजीत केल्ल्या 10 व्या जागोर महोत्सवाच्या समारोप सुवाळ्याक मंत्री खंवटे हांचे सयत कृशी मंत्री रवी नायक, कला आनी संस्कृती मंत्री गोविंद गावडे, आमदार जीत आरोलकार, अध्यक्ष हेमू गावडे, उदय गावडे, सरपंच शोभा पेरणी, जयेश नायक, हर्षा गावडे आनी हेर मानेस्त माचयेर हाजीर आशिल्ले.
सध्याच्या सरकारान अणभवी राजकारणी तशेंच युवा राजकारणी आशिल्ल्यान गोंयचे उदरगतींत चड भर पडटली. गांवगिऱ्या वाठारांतल्या लोकांनी परंपरीक संस्कृती वांगडाच पर्यावरणाची सदांच राखण केल्या. पर्यटकांक गांवगिऱ्या वाठारांतल्या पर्यावरणाचो अणभव दिवपाची गरज आसा. ते खातीर सरकार निश्चीत यत्न करतले, अशें मंत्री खंवटे हांणी सांगलें.
पुर्तुगेज राजवटींत लेगीत गोंयच्या कलाकारांनी संस्कृती तिगोवन दवरपांत म्हत्वाचें योगदान दिलां. विवीध कलांचें वेळावेळार संवर्धन जाल्ल्यान गोंयची कला हेर देशांनी पावली. पर्यटन तशेंच कला आनी संस्कृती खात्यान फुडारांत चडांत चड कलाकारांक विदेशांत धाडून कला सादर करपाक माची मेळोवन दिवपाची गरज आसा, अशें मंत्री रवी नायक हांणी सांगलें.
मंत्री गोविंद गावडे हांणी सांगलें, गांवगिऱ्या वाठारांतल्या कलाकारांनी संघटीत रावून जागोर सारकी संकल्पना फुडें व्हरपाची गरज आसा. ताका लागून जागोर मोगी, अभ्यासक आनी इतिहासकार हांकां लेगीत संद मेळटली, अशें तांणी सांगलें.
ह्या वेळार आमदार जीत आरोलकार हांणी आपले विचार मांडले. मंत्री रवी नायक हांचे हस्तुकीं ज्येश्ठ कलाकार गणा गावडे, रामदास गावडे, रोहिदास गावडे, अनंत कुंडयकार, नारू अडकोणकार आनी रमाकांत कुट्टीकार हांचो शाल, नाल्ल आनी यादस्तीक चिन्न दिवन सत्कार केलो. हेमू गावडे हांणी येवकार दिलो. उदय गावडे हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
