भांगरभूंय | प्रतिनिधी
वॉशिंग्टन, खबरां संस्था: संवसारीक पांवड्यार देंवपी प्रजनन दर एक गंभीर लोकसंख्यात्मक संकटाची शक्यताय दाखयता. तज्ञांच्या मता प्रमाण, सध्याचे प्रवाह कायम उरल्यार २१०० मेरेन जायते विकसीत आनी विकसनशील देशांची लोकसंख्या २० ते ५० टक्क्यांनी देंवपाक शकता. हाचो परिणाम फकत समाजीक संरचनेचेरूच न्हय, जाल्यार अर्थीक उदरगत आनी समाजीक सुरक्षा यंत्रणांचेरूय जातलो.
युनिव्हर्सिटी ऑफ मॅसाच्युसेट्सचे फेमिनिस्ट अर्थशास्त्री डॉ. नॅन्सी फोल्ब्रे हांच्या मतान, जशें सरकार पर्यावरणा खातीर इलेक्ट्रिक वाहनांक आनी सोलार पॅनल्सांक सबसिडी दिता तशेंच भुरग्यांक पोसपाची भौशीक सेवा मानून ताचेर खर्च करप गरजेचें. जोड राष्ट्राच्या अहवाला प्रमाण, २५० मेरेन संवसारांतल्या तीन चतुर्थांश देशांची प्रजनन दर रिप्लेसमेंट लेव्हल (२.१ प्रती बायलां) परस सकयल वतली.
२१०० मेरेन ही सकयल देंवपाची पातळी इतकी खर जावपाक शकता, हातूंत जायत्या मुखेल अर्थवेवस्थांची लोकसंख्या अर्दी जातली. उणो जावपी जल्मदराचो सरळ परिणाम कार्यशील पिरायेच्या लोकांच्या आनी वरिश्ठ नागरिकांच्या प्रमाणाचेर जातलो. हाका लागून कर महसूल उणो जातलो, पेन्शन आनी भलायकी सेवांचेर चेंपण वाडटलें आनी भौशीक सेवांनी उणाव जातलो. डॉ. नॅन्सी फोल्ब्रे हांच्या मतान, जे लोक पालक जायनात तेय समाजाच्या सामाजीक लावांचो फायदो घेतात. जशी समाजीक सुरक्षा, पेन्शन आनी करप्रणाली वरवीं भुरग्यांच्या फुडाराच्या योगदानाचो लाव घेतात, मात भुरग्यांक़ वाडोवपाची जापसालदारकी घेनात. हाका अर्थीक भाशेंत ‘फ्री रायडर’ समस्या म्हणटात.
दुसरे कडेन पालकांक भुरग्यांच्या संगोपनांत व्हड वयक्तीक किंमत चुकोवची पडटा-जशें उणें वेतन, करिअरांत आडमेळें, पेन्शन सेव्हिंग्जांत उणाव आनी वयक्तीक जिणेंत उत्पादकतेचो उणाव. अमेरिकेंत पालकांक प्रती भुरगें १.६६ लाख रुपयांचें कर क्रेडीट मेळटा, जाल्यार हंगेरी सारके सुवातेर दोन वा तीन भुरग्यांच्या आवयांक उत्पन्न करांतल्यान पुरायेन सूट दितात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
