भांगरभूंय | प्रतिनिधी
मुख्यमंत्री : आस्वासनांचे अंमलबजावणेचे स्थितीची नियाळ बसका
भांगरभूंय । प्रतिनिधी
पणजी : सरकारान आतां मेरेन 12 खण ब्लॉकांची पावणी केल्या. हातूंतले 5 पट्टे सुरू जाल्यात, जाल्यार 4 बेगिनूच सुरू जातले. हेर 6 ब्लॉकां खातीर फुडल्या म्हयन्यांत पावणी करतले. खाजगी डंप पॉलिसी प्रमाण आतां मेरेन 4 परवाने दिल्यात. सरकारी डंप पॉलिसी खाला पावणेचो पयलो पांवडो जाला, दुसरो पांवडो ह्या म्हयन्यांत जातलो, अशी म्हायती मुख्यमंत्री डॉ. प्रमोद सावंत हांणी दिली. शुक्रारा मंत्रालयांत जाल्ले बसके उपरांत ते प्रसार माध्यमां कडेन उलयताले.
ताचे आदीं अर्थसंकल्प, अर्थसंकल्पीय आस्वासनां आनी विधानसभा आस्वासनांचे अंमलबजावणेचे स्थितीचो नियाळ घेवचे खातीर बसका जाली.
मुख्यमंत्र्यान सांगलें, अंदूंच्या अर्थ संकल्पांतले तजविजीं खातीर मंजूर केल्ल्या निधींतलो 57 टक्के निधी नोव्हेंबराचे निमाणे मेरेन वापरला. मार्च 2026 मेरेन मंजूर निधींतलो 95 टक्के वापरतले. आतां मेरेन 99.3 टक्के अर्थसंकल्पीय आस्वासनांचेर आदींच कार्यवाही सुरू जाल्या. जाल्यार 77 टक्के आस्वासनां ह्या अर्थीक वर्सांतूच अंमलात हाडटले. उरिल्लीं आस्वासनां फुडल्या वर्सा नागरी मुळाव्या सुविधांच्या कामां खातीर आसतलें.
मुख्यमंत्र्यान सगल्या सचीव आनी खातें मुखेल्यांक अर्थसंकल्पीय आस्वासनां तशेंच सरकारान सभाघरांत दिल्ल्या आस्वासनांची जलद अंमलबजावणी करपाचे निर्देश दिले. केंद्र सरकारान राज्याक 3,200 कोटी रुपयां मेरेन रीण घेवपाची परवानगी दिल्या. अशें आसलें तरीय राज्यान उक्त्या बाजारांतल्यान 1,300 कोटी रुपयांचें रीण घेतलां. मुख्यमंत्र्यान अधिकाऱ्यांक कोयर वेवस्थापना विशीं केंद्रा कडल्यान मजत मेळोवचे खातीर आनी राज्य प्रशासना खातीर हेर म्हत्वाच्या हेर विशयां संबंदांत आंतर- विभागीय समन्वय दवरपाचे निर्देश दिले.
ताचे आदीं जाल्ले बसकेंत मुख्यमंत्र्यान गोंयांतल्या मुखेल मुळाव्या सुविधांच्या कामांचे उदरगतीचो नियाळ घेतलो. ह्या प्रकल्पां मदीं केंद्र सरकारा कडल्यान राज्यांक भांडवली गुंतवणुके खातीर विशेश मजती वरवीं निधी दिला. बसकेंत प्रकल्पांच्या अंमलबजावणी सद्यस्थिती, निधीचो वापर आनी मुजतीचो नियाळ घेतलो. आंतर- विबागीय समन्वय करून कामां जलदगतीन पुराय करपाचे निर्देश मुख्यमंत्र्यान दिले. ह्या कामाक लागून जावपी अपेक्षीत फायदे गोंयांतल्या लोकां मेरेन बेगिनात बेगीन पावपाक जाय, अशे निर्देश मुख्यमंत्र्यान अधिकाऱ्यांक दिले. अर्थीक वाड, भौशीक मुळाव्यो सुविधा आनी लोकांच्या जिवनमानांत वाड करपी उदरगत प्रकल्प जलदगतीन पुराय करचे खातीर गोंय सरकार बांदील आसा, अशें मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
