भांगरभूंय | प्रतिनिधी
पणजी : राष्ट्रीय शिक्षण धोरणाच्या (एनईपी) कार्यवाहे उपरांत फुडल्या वर्सा सावन (2026 – 2027) धावेक 4 शिक्षणीक विशयांत नापास जावपी विद्यार्थ्यांक इकरावेंत प्रवेश मेळटलो. मात धावेच्या नापास विशयांत पास जावचे पयली तांचो इकरावेचो निकाल जाहीर जावचो ना. शालान्त मंडळाच्या गोपां कडल्यान ही म्हायती मेळ्ळी.
णववे उपरांत अंदूं सावन (2025 – 26) धावेचे यत्तेक राष्ट्रीय शिक्षण धोरण लागू जाता. परिक्षेचे पेपर तशेंच मुल्यांकन पद्दती विशींचें परिपत्रक शालान्त मंडळान सगल्या विद्यालयांक धाडलां.
धावे खातीर 6 शिक्षणीक (स्कॉलेस्टीक) आनी 4 कुशळटाय (स्कील बेस्ड) विशय आसतले. तीन भाशा (इंग्लीश, मराठी/कोंकणी आनी एक भास) समाज शास्त्र, विज्ञान आनी गणीत अशे 6 विशय शिक्षणीक आसतले. ह्या 6 विशयां मदीं 4 विशयांत नापास जाल्ल्या विद्यार्थ्यांक 2026 – 27 शिक्षणीक वर्सा सावन एटीकेटी खाला इकरावेंत प्रवेश मेळटलो. निड्स इम्प्रुमेंट असो शेरो आशिल्ल्या विद्यार्थ्यां खातीर कॉपेन्सेटरी येवजण लागू जातली. निड्स इम्प्रुमेंट शेरो आशिल्ल्या विद्यार्थ्यां खातीर ही येवजण लागू जातली.
एक वा दोन शिक्षणीक विशयांत एच वा आय ग्रेड आसत जाल्यार ह्या विशयांत तांचे ग्रेडींत सुदारणा जातली. मात हाचे खातीर दोन कुशळटाय विशयांत उण्यांत उणे 65 टक्के गूण मेळपाक जाय. तशेंच हेर दोन कुशळटाय विशयांत 50 टक्के गूण मेळपाक जाय. हे येवजणेक लागून हें शक्य जातलें. तशेंच खेळाचे गूण लेगीत मेळटले. हाचो लाव हेर दोन विशयांक जावप शक्य आसा. ना जाल्यार दोन विशयांत कॉम्पेसेटरी येवजण आनी दोन विशयां खातीर आशिल्ली एटीकेटी मेळून 4 विशयांत विद्यार्थ्यांक लाव जातलो. शालान्त मंडळाचे अध्यक्ष भगीरथ शेट्ये हांणी ही म्हायती दिली.
विज्ञानाचो पेपर 70 मार्कांचो जाल्यार हेर पांच शिक्षणीक विशयांचे पेपर दरेकी 80 मार्कांचे आसतले. विज्ञानाक 10 अंतर्गत आनी 20 प्रात्यक्षीक पेपराचे गूण आसतले. हेर पांच विशयां खातीर 20 अंतर्गत मार्क आसतले.
इंटरडीसीप्लीनरी एरीया, व्होकेशनल (एनएसक्यूएफ), कला आनी शारिरीक शिक्षण हे चार विशय कुशळटायेचेर (स्कील बेस्ड) आदारीत आसतले. ह्या चारूय विशयांचे लेखी पेपर 40 मार्कांचे आसतले. पेपरा खातीर 2 वरां आसतली. ह्या चार विशयां खातीर अंतर्गत मार्क 60 आसतले. सगल्या 10 विशयांचे (लेखी,अंतर्गत, प्रात्यक्षीक) वट्ट गूण पयलीं सारके 100 आसतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
