भांगरभूंय | प्रतिनिधी
भांगरभूंय । प्रतिनिधी
पेडणेः चवथी खातीर चिकण मातयेच्यो गणेश मूर्ती करपी कलाकारांक फुडल्या वर्सा सावन दरेका मूर्ती फाटल्यान 250 रुपये अनुदान दिवपाची घोशणा हस्तकला म्हामंडळाचो अध्यक्ष तशेंच पेडण्याचो आमदर प्रवीण आर्लेकार हांणी केल्या. विशेश म्हणल्यार हें अनुदान चवथी पयलीं दिवपाचो यत्न आसतलो अशें तांणी बुधवारा पेडणे हांगा सांगलें
हस्तकला म्हामंडळा वतीन गणपती मूर्ती तयार करपी कलाकारांक चिकण माती मळपाची यंत्रा भेटोवपाचे कार्यावळींत ते उलयताले. ह्या वेळार हस्तकला म्हामंडळाचो वेवस्थापकीय संचालक मेल्वीन वाझ, अधिकारी डॉमनीक परेरा, पेडण्याचो नगराध्यक्ष माधव सिनाय देसाय, उपनगराध्यक्ष तृप्ती सावळ देसाय, नगरसेविका राखी कशाळकार, आश्विनी पालेकार, विशाखा गडेकार, उषा नागवेकार, नगरसेवक मनोज हरमलकार, सिद्धेश पेडणेकार, शिवराम तुकोची, पंच भूषण ऊर्फ प्रदीप नायक, सुबोध महाले, सूर्यकांत तोरस्कार हाजीर आशिल्ले.
गांवगिऱ्या वाठारांत पारंपरिक काल तिगोवन दवोरपी कलाकारांक हस्तकला म्हामंडळा कडल्यान जाय तें सगलें सहकार्य दितले. चिकण माती मळपा खातीर कामगार मेळनात. ते खातीर म्हामंडळान यंत्रा दिवपाची येवजण चालीक लायल्या अशें तांणी सांगले. गुरूदास कालेकार (हणखणे), महेश तुलस्कार (नागझर) आनी अरूण पालेकार (खारेबांद- पेडणे) हांका आर्लेकार हांचे हस्तुकीं यंत्रा दिलीं.
राज्यांत चवथीच्या दिसांत गणपती मूर्ती लागतात तितल्यो थळावे कलाकार दिवपाक शकनात, ते खातीर महाराष्ट्रांतल्या मूर्ती हाडटात. मात त्यो चड करून प्लास्टिक ऑफ पॅरीसाच्यो आसतात. त्यो पर्यावरणाक बादिकारक आसतात. ताका लागून तो गोंयांत हाडून विकपाक सरकारान बंदी घातल्या. जो कोण ह्यो मूर्ती हाडून विकता ताचेंक कायदेशीर कारवाय करतात. पीओपीच्यो मूर्ती विकता तांची म्हायती दिवपाचें आवाहन आर्लेकार हांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
