भांगरभूंय | प्रतिनिधी
लोकोत्सवाची सुरवात 6 डिसेंबरा सावन
मडगांव: गांवगिर्या संस्कृतीच्या दर्शना सयत गांवांतलें गांवपण परतून समाजांत रुजोवपाचे उद्दिश्ट लोकोत्सवाचें आसा. ह्या वर्सा 6 डिसेंबरा सावन लोकोत्सवाचें आयोजन केलां. फुडल्या वर्सा सावन कायमस्वरुपी भगवान बिरसा मुंडा ग्रामाची स्थापणूक करतले आनी वर्सभर लोकोत्सव जातलो अशें सभापती रमेश तवडकार हांणी सांगलें.
मडगांवां आयोजीत केल्ले पत्रकार परिशेदेंत सभापती तवडकार हांणी लोकोत्सव आयोजनाची म्हायती दिली. ह्या वेळार आयोजन समितीचे नागेश कोमरपंत आनी हेर मानेस्त हाजीर आशिल्ले.
तवडकार हांणी मुखार उलयतना म्हणलें, आदर्श युवा संघा वतीन ह्या वर्सा लोकोत्सवाचें आयोजन आदर्शग्राम आमोणें काणकोणां आयोजीत केलां. 6 डिसेंबराक मुख्यमंत्री डॉ. प्रमोद सावंत हांचे हाजिरेंत उक्तावण जातलें. हातूंत सुमार 550 स्टॉल्साची उबारणी केल्या.
राज्यांतली गांवगिऱ्या वाठारांतली संस्कृती लोकां मेरेन हाडपा खातीर लोकोत्सवाचें आयोजन करतात. फाटलीं 23 वर्सां हो लोकोत्सव आयोजीत करतात. ह्या वर्सा हो 24 वो लोकात्सव मनयतले.
गोंयची मूळ संस्कृती गांवांगांवांतल्यान आसा. गोंय हें फक्त दर्या वेळांक लागून वळखतात हाचे बगर गोंय दाखोवन दिवपाची आनी मूळ संस्कृती दाखोवाचो हो यत्न आसा. दर्यादेगां भायलें पर्यटन ह्या लोकोत्सवांतल्यान पर्यटकांक घडयतले. गांवचे संस्कृतायेंत लोकांक रोजगार उपलब्ध करून जगोवपाची कला आसा. गांवगिरी संस्कृती आतां सोंपत चल्ल्या. रानांतल्या वखदीं वनस्पतीचें ज्ञान सांबाळून दवरपाचो हो यत्न आसा. गांवगिऱ्या वाठारांतलीं लोकगीतां, लोकनाचाचें दायज फुडले पिळगेक दिवपाचो हो यत्न आसा. गांवगिऱ्या वाठारांतल्या खेळांचें प्रदर्शन लोकांत्सवांत जातलें. गांवचे संस्कृती सयत गांवांतलें गांवपण परतून समाजांत रुजोवपाचो हो लोकोत्सवा फाटलो हेत आसा अशें तवडकार हांणी म्हणलें.
तांणी मुखार उलयतना म्हणलें, लोकां मदलीं आनी लोकां खातीरची संवेदना ही गांवांतल्यान दिसून येता ती कायम राखपाचो हो यत्न आसा. फुडल्या वर्सा सावन भगवान बिरसा मुंडा ग्राम उबारून हो लोकोत्सव कायमस्वरुपी करतले आनी लोकांच्या हातांक काम मेळोवन दितले अशेंय तवडकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
