भांगरभूंय | प्रतिनिधी
पणजीः गोंय राज्य शंबर टक्के साक्षर आसा अशी घोशणा येत्या 19 डिसेंबराक करतले. हे खातीर शिक्षण खात्या कडल्यान यत्न सुरू आसात अशी म्हायती मुख्यमंत्री डॉ. प्रमोद सावंत हांणी दिली. शुक्रारा पणजेत जाल्ले पत्रकार परिशदेंत ते उलयताले. ह्या वेळार शिक्षण खात्याचे संचालक शैलेश झिंगडे, सचीव प्रसाद लोलयेकार, एससीईआरटी संचालक मेघना शेटगांवकार आनी हेर अधिकारी हाजीर आशिल्ले.
सद्या गोंयांत 98 टक्क्यां परस चड साक्षरतेचें प्रमाण आसा अशें मुख्यमंत्र्यान सांगलें. गोंय शंबर टक्के साक्षर करपाचो आमी यत्न करतात. फुडल्या पांच म्हयन्यांत पुराय राज्य साक्षर जातलें. ते प्रमाण आमी सुमार तीन हजार ज्येश्ठ नागरिकांक प्रशिक्षण दिलां. तातूंतले 700 जाण परिक्षा पास जावन साक्षर जाल्यात. उरिल्ल्या 2300 लोकांची 14 जुलयाक परिक्षा जातली. ही परिक्षा लागींच्या पंचायत सभाघरांत जातली. ह्या सगळ्या लोकांक परिक्षेक हाजीर रावपाची विनंती आमी करतात.
सद्दा सांग्यार, केपें आनी काणकोण तालुक्यांतल्या कांय वाठारांनी निरक्षर लोक उणे उरल्यात अशें तांणी सांगलें. तांकां शिकोवपा खातीर एससीईआरटीन खाशेली मोहीम हातांत घेतल्या. अशा लोकांक शिकोवपाची इत्सा आशिल्ल्यांनी एससीईआरटी कडेन संपर्क सादचो. अशा प्रशिक्षकांक आमी मानधन दिवपाचे आसात. हाचे भायर स्वयंपूर्ण इश्ट तशेंच पंचायतींनी आपल्या वाठारांत अशिक्षीत व्यक्ती सोदून काडून तांकां प्रशिक्षण दिवचें. वा 2 ऑक्टोबर मेरेन तांचीं नांवां शिक्षण खात्या कडेन दिवचीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
