भांगरभूंय | प्रतिनिधी
पणजी : अंदूं इफ्फीचो उक्तावण सुवाळो पणजेच्या पोरणें गोमेकॉ वाठारांत जातलो. हांगाच रेड कार्पेटा सयत चित्रपट मळार संबंदीत चित्ररथ मिरवणूक जातली. फुडल्या चार ते पांच दिसांनी इफ्फी संबंदी सगली तयारी पुराय जातली. जाल्यार १९ नोव्हेंबर मेरेन माची आनी पुराय इव्हेंटाची सुवात तयार जातली, अशें मुख्यमंत्री डॉ. प्रमोद सावंत हांणी सांगलें. तांणी मंगळारा गोवा मनोरंजन संस्था (ईसजी) वाठारांत सुरू आशिल्ले तयारेचो नियाळ घेतलो. ह्या वेळार ईएसजीचे हेर पदाधिकारी हाजीर आशिल्ले.
मुख्यमंत्र्यानी सांगलें, इफ्फीची तयारी आतां निमाण्या टप्प्यांत पावल्या. पोरणें गोंय वाठारांत ५०० व्हीआयपी सिटांची वेवस्था करतले. जाल्यार सामान्य जनते खातीर पोरणें गोमेकॉच्या मुखार १५०० जाणांक बसपाची वेवस्था करतले. इत्सुकांनी पास घेवप गरजेचें. फाटल्या वर्सा आयोजकांनी तशेंच केंद्रीय मंत्र्यांनी इफ्फी उक्तावण सुवाळो उक्ते सुवातेर घेवपाक सुचयिल्लें. ते प्रमाणूच अंदूं पोरणें गोमेकॉ वाठार निवडलो.
गोंयकारांनी शिगमो, कार्निवलाक चित्ररथ पळयल्यात. मात अंदूं पयलेच फावट चित्रपट सृश्टी कडेन संबंदीत चित्ररथ मिरवणूक पळोवपाचो अणभव मेळटलो.
तशेंच रांगोळी, आकाशदिवो सर्त, गोंयकारांचें कला प्रदर्शन आनी हेर संदूय मेळटली. इव्हेंटाक ह्या वाठारांत एक दीस येरादारी कोयंडी जातली, तरी गोंयकारांक अंदूूं एक बरो इव्हेंट पळोवपाक मेळटलो. ही कार्यावळ सुमार तीन वरां चलतली. उपरांत इफ्फीतल्या चित्रपटांचें प्रदर्शन जातलें अशें मुख्यमंत्र्यान म्हणलें.
गोंयांत सतर्कताय
मुख्यमंत्र्यांनी सांगलें, दिल्ली बॉम्बस्फोटाची चवकशी केंद्रीय गृह मंत्रालया वतीन सूरू आसा. खबरदारीचो उपाय म्हणून गोंयांकूय सतर्कतेची शिटकावणी दिल्या. हाचे भायर सदां भशेन राज्यांत सगले कडेन तपासणी चालूच आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
