भांगरभूंय | प्रतिनिधी
मंत्री रोहन खंवटेः पुराय आशियेंत दृश्टी मरीन संस्थेचो पयलो प्रयोग
भांगरभूंय । प्रतिनिधी
म्हापशें: दृश्टी मरीन संस्थेन आतां एक पावल फुडें मारीत दर्यादेगेंचेर बुडप्यांचो जीव वाटावपा खातीर आतां प्रशिक्षीत सुण्यांचो पॉ स्क्वॉड तयार केला. फुडल्या मान्सून उपरांत ह्या सुण्यांच्या जीवरक्षकांचो वापर बचाव आनी सुरक्षा वावरांत करतले. शुक्रारा पर्यटन मंत्री रोहन खंवटे हांचे हाजिरेंत कांदोळी दर्यादेगेर हे विशीं म्हायती आनी प्रात्यक्षिकां दाखयलीं.
स्वीम वीथ लायफसेव्हर्स हो उपक्रम 2021 त दृश्टी मरीनान गोंयांत सुरू केल्लो. दर्यांत पेंवपा विशीं योग्य टिप्स दिवपा खातीर ही कार्यावळ आयोजीत केल्ली. दर्यादेगेर उबारिल्ल्या बावट्यां विशीं म्हायती वा सुचोवणी तकट्यांचें म्हत्व ह्या उपक्रमा वरवीं सांगतात. 60 मिणटांचे कार्यावळींत आपले इत्सेन वांटो घेवप्यांक पेंवपाचें मार्गदर्शन करपी सत्र दितात. तशेंच पेवपा वेळार कसली जतनाय घेवची, गे विशीं जागृताय निर्माण करपाचो उद्देश आसा. मिरामार, बाणावली, कोलवें आनी कांदोळी ह्या दर्यादेगांचेर हो उप्कर्म ह्या वेळार नव्यान पुनरुज्जिवीत केलो.
गर्दीचें नियोजन करता ऑरस
आर्टिफिशियल इंटेलिजन्साचेर (एआय) आदारीत ऑरस नांवाचो रोबोट गोंयांतल्या दर्यादेगांचेर हे आदींच तैनात केल्यात. हो रोबोट जीवरक्षकां वरीच लोकांचो जीव वाटावपाक मजत करता. ऑरस हो एक कृत्रीम बुद्दीमत्तेचेर चलपी सेल्फ ड्रायव्हींग सोबोट. तो एआय ह्या तंत्राचेर आदारीत आसा. ऑरस दर्यादेगांचेर गस्त घालून भरते वेळार पर्यटकांक सतर्क करता आनी जीवरक्षकांक मजत करता. दर्यादेगांचेर पाळत दवरपाक आनी गर्दीचें नियोजन करपाक ह्या रोबोटाची मजत घेतात.
पंगडांत रस्ताद सुण्यांचो आस्पाव
दृश्टी मरीनान दर्यादेगांचेर सुण्यांचो वापर जीवरक्षक म्हूण करपाचें पावल उखल्लां. आशियांतल्या अशे तरेच्या उपक्रमाची ही पयलीच अंमलबजावणी गोंयांतल्यान जाता. सध्या ह्या जीवरक्षक सुण्यांच्या पंगडाक प्रशिक्षण दितात. 11 सुण्यांचो हातूंत आस्पाव आसा. हो पंगड दर्यांत आडकल्ल्यांक सोदप, चड करुन खडपांच्या वाठारांत बचाव वावरांत जीवरक्षकांची भुमिका म्हत्वाची आसतली. ह्या पंगडांत चडशा रस्ताद सुण्यांचो आस्पाव केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
