भांगरभूंय | प्रतिनिधी
डॉ. प्रमोद सावंतः मोलादीक मत भाजपाक दिवपाचो उलो
भांगरभूंय । प्रतिनिधी
मुरगांवः देशांत काँग्रेस पक्षाचें सरकार फुडलीं 50 वर्सां येवप कुस्तार. तशेंच तांचो फुडारी नांव घेनासतना राहूल गांधी फुडारांत प्रधानमंत्री केन्नाच जावचो ना, अशें मुख्यमंत्री डॉ. प्रमोद सावंत हांणी सांगलें. मुरगांव बायणाचे जाहीर सभेंत मुख्यमंत्री उलयताले. युवा मतदारांनी आपलें मोलादीक मत विकसीत भारताचे प्रधानमंत्री नरेंद्र मोदी हांच्या भाजपाक दिवचें, असो तांणी ह्या वेळार उलो मारलो.
मुरगांव मतदारसंघांतल्या बायणा, देस्तेरो, जेटी, सडा वाठारांत मुख्यमंत्री डॉ. प्रमोद सावंत हांची प्रचार भोंवडी जाली. ह्या वेळार बायणा शाफी मशिदी कुशीक जाल्ले जाहीर सभेंत मुख्यमंत्री डॉ. सावंत हांचे वांगडा मुरगांवचे आमदार संकल्प आमोणकार, दक्षीण गोंय भाजप उमेदवार पल्लवी धेंपो, मुरगांव भाजप गटाध्यक्ष संजय सातार्डेकार, मुरगांव भाजप प्रभारी संतोष केरकार, समीर खान, अखील भारतीय बंजारा समाजाचे सचीव पंडीत राठोड, नगरसेविका श्रद्धा आमोणकार, सॅबी डिसोझा आनी हेर मानेस्त हाजीर आशिल्ले.
देशाची चारूय वटांनी उदरगत जाता, तातूंत प्रधानमंत्री नरेंद्र मोदी हांचो शिंवाचो वांटो आसा. राज्य भाजप सरकारान केन्नाच समाजाचें राजकारण करिनासतना, दरेकल्याक समान अधिकार दिवपाक म्हत्वाची भुमिका घेतल्या, अशें मुख्यमंत्री डॉ. सावंत हांणी सांगलें.
राज्य भाजप सरकार केन्नाच बायणा दर्यादेगेर आशिल्ल्या घरांक धोको निर्माण करचें ना, अशी हमी आमदार संकल्प आमोणकार हांणी दिली. मुरगांव बायणा वाठारांतले प्रभाग 7, 8, 9 तल्यान व्हड प्रमाणांत मतांची आघाडी मेळटली असो विस्वास तांणी उक्तायलो.
बायणा दर्यादेगेर वेवयाय करपी नुस्तेकार भावांक सरकारा वतीन नवी जेटी बांदून दिवपाक फुडाकार घेतले. तशेंच मुरगांवां नवें सरकारी मुळावें हॉस्पिटल बांदतले, अशी म्हायती आमदार आमोणकार हांणी दिली.
उमेदवार पल्लवी धेंपो हांणी सांगलें, दरेकल्यान विकसीत भारताचे प्रधानमंत्री नरेंद्र मोदी हांकां तेंको दिवचे खातीर भाजपाक मतदान करप गरजेचें आसा. ह्या वेळार अखील भारतीय बंजारा समाजाचे सचीव पंडीत राठोड आनी तांच्या सांगात्यांनी पुराय देसांतल्या बंजारा समाजाचो लोकसबा वेंचणुकेंत भाजपाक तेंको आसा, अशें पत्र मुख्यमंत्री डॉ. सावंत हांकां दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
