भांगरभूंय | प्रतिनिधी
पक्षविरोधी कारवायो केल्ल्यान राहूल गांधी हांचे वरिश्ठांक निर्देश
भांगरभूंय । प्रतिनिधी
पणजीः काँग्रेसीचे वरिश्ठ फुडारी राहूल गांधी हांणी येवपी विधानसभा वेंचणुकेंत काँग्रेसींतल्यान फुटिल्ल्या खंयच्याच आमदाराक उबे करचे नात आनी पक्षांत आसतना पक्षविरोधी वावर करपी लोकां आड खर कारवाय करपाचें थारायलां. प्रभारी मणिकराव ठाकरे आनी प्रदेश अध्यक्ष अमीत पाटकार हांकांय अशीच सुचोवणी दिल्या.
राह़ल गांधी हांणी हालींच दरेका राज्यांतल्या एका जिल्हो अध्यक्षा वांगडा आभासी बसका घेतली. हे बसकेंत काँग्रेस दक्षीण गोंय जिल्हो अध्यक्ष साविओ डिसिल्वा हजर आशिल्ले. प्रदेश काँग्रेसींतलें सध्याचें वातावरण आनी पक्षा आड चलपी गुप्त कारवायांची म्हायती साविओ द सिल्वा हांणी राहूल गांधी हांकां दिली. तशेंच काँग्रेसीचे तिकेटीचेर वेंचून आयिल्ले, पूण उपरांत येवपी विधानसभा वेंचणुकेंत भाजपांत गेल्ल्या आमदारांक उमेदवारी दिवप पक्षाक घातक थारपाक शकता, अशें तांणी सांगलें. हे विशीं उलयतना राहूल गांधी हांणी स्पश्ट केलें, काँग्रेसीचो विस्वासघात करपी एकाय आमदाराक येवपी विधानसभा वेंचणुकेंत उमेदवारी दिवचें ना. तशेंच, पक्षविरोधी कारवायांत वांटो घेवपी लोकांक बेगोबेग सोदून काडून तांचे आड खर कारवाय करतले, वा पक्षांतल्यान निलंबीत करपाची लेगीत सुचोवणी तांणी प्रभारी ठाकरे आनी प्रदेशाध्यक्ष पाटकार हांकां दिल्या, अशें काँग्रेसीच्या एका वरिश्ठ फुडाऱ्यान शेनवारा आमच्या प्रतिनिधी कडेन उलयतना सांगलें. हे बसकेंत आदले प्रदेशाध्यक्ष आनी वरिश्ठ फुडारी गिरीश चोडणकार हजर आशिल्ले अशेंय फुडाऱ्यान सांगलें.
पक्षांतलीं फूट सेगीत चव्हाट्यार
– फाटले विधानसभा वेंचणुकेंत मेळिल्ले हारिची जापसालदारकी घेवन गिरीश चोडणकार हांणी प्रदेशाध्यक्षपदाचो राजिनामो दिलो. ते उपरांत पक्षान पक्षाची जापसालदारकी अमीत पाटकार हाच्या हातांत दिली. ते उपरांत प्रदेश काँग्रेसींत गिरीश चोडणकार आनी अमीत पाटकार अशे दोन गट जाले. पक्षांतलीं ही फूट अजूनय चव्हाट्यार येत आसा.
– चोडणकार हांणी राजिनामो दिल्या उपरांत ताच्या लागींच्या जायत्या जाणांनी पक्षा कडेन फाट केली. ताका लागून काँग्रेसची अवस्था बाबत जाली. हे परिस्थितींतल्यान पक्षाक भायर काडपा खातीर केंद्रीय फुडाऱ्यांनी अणभव आशिल्ल्या, संयमी मणिकराव ठाकरे हांची प्रभारी म्हणून नेमणूक केली. – ठाकरे आतां मेरेन जायते फावट गोंयांत गेल्ले आनी पक्षा भितर चलपी गोंदळ समजून घेतला. देखून राज्यभरांतले फुडारी, पदाधिकारी, कार्यकर्ते, मतदार हांचें लक्ष फुडाराक पक्षाची संघटना घटमूट करपा खातीर खंयचे तरेचे निर्णय घेतले हाचेर केंद्रीत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
