भांगरभूंय | प्रतिनिधी
अखेरेक लोकसभा वेंचणुकेचो निकाल लागलो. गोंया राजकी जाणकारांनी (आनी कांय एक्झीट पोलांनीय) अदमास केल्ले प्रमाण उत्तरेचो जागो भाजपाक आनी दक्षिणेचो इंडी आघाडेक मेळ्ळो. पांच फावटीचे खासदार, भाजपाचे म्हालगडे फुडारी श्रीपाद नायक विक्रमी सवे खेप उत्तर गोंयच्यान जिखून आयले. तांणी अॅड. रमाकांत खलप (इंडी आघाडी) हांचेर जैत जोडलें. तर दक्षिणेंत इंडी आघाडेचे विरियातो फर्नांडीस जैतिवंत थारले. तांणी भाजपाची उमेदवार पल्लवी धेंपो हांकां हारयली. हांगा मतांचो फरक उत्तर गोंयां इतलो नाशिल्लो. केंद्रांत एनडीएक भोवमत मेळ्ळां. भाजपाचें सरकार स्थापन जातकच तातूंत श्रीपाद नायक हांकां हे खेप पेजाद मंत्रीपद मेळटलें, अशी आस्त हजारांनी गोंयकार बाळगून आसात. कारण ते फाटोफाट स खेप जिखून आयल्यात. आतां ते म्हालगडे भाजप फुडारीय थारल्यात. तांच्या जैतांत पर्यें, वाळपय, सांखळी, मयें, दिवचल, मांद्रें, पेडणें ह्या मतदारसंघांनी शिंवाचो वांटो उखल्लो. मात, दक्षीण गोंयांतलें कांय भाजपा आमदार पल्लवी धेंपो हांचे बाबतींत हें योगदान दिवपाक शकले नात. त्या मतदारसंघांनी तांकां चड मतां मेळिल्लीं जाल्यार निकाल घुंवपाची शक्यताय आशिल्ली, अशें जायत्या राजकी जाणकारांक दिसता.
मुख्यमंत्री डाॅ. प्रमोद सावंत हांचे पत्रकार परिशदेंत तशी खंत व्यक्त जाली. हारीक कोणाक दोश दिनासतना ताचेर विचारमंथन करतले, अशें तांणी सांगलें. दक्षीण गोंयांत भाजपाच्या मतांची टक्केवारी 45.26 टक्क्यां मेरेन वाडल्या. धर्मीक हस्तक्षेपाक लागूनय मतांचेर परिणाम जालो, अशें मतूय हे पत्रकार परिशदेंत उलोवप्यांनी मांडलें. हालींच्या वर्सांनी राजकारणांत धर्म, जात, प्रांतवाद घुशिल्लो दिसता. सगलेच पक्ष हातूंत घुस्पल्यात. मतदारांक आकर्शीत करपाचो तो रामबाण उपाय. खरें म्हणल्यार राजकारणांत धर्म, जात येवपाक जायना. प्रचारा वेळारूय सगल्यांनी ताचे पसून पयस रावंक जाय. निदान हाचे मुखार लोकप्रतिनिधी, पक्षांनी ते बाबतींत संयम बाळगुचो. राजकारणांत धर्म येवचो ना, हाचेर कितें तरी उपाय काडचो.
प्रधानमंत्री नरेंद्र मोदी तिसरे खेप प्रधानमंत्री जातले. पं. जवाहरलाल नेहरू हांणी ही कामगिरी केल्ली. एनडीएक फाटोफाट मेळिल्लें हें तिसरें जैत. तांणी भोवमताचो आंकडो हुपला आनी 290 जागे जिखपाचे दिशेन वाट माड्डुपाक सुरवात केल्या. इंडी आघाडेकूय 234 जागे मेळपाची शक्यताय आसा. विरोधी पक्षां मदीं जाल्ली ही व्हडली सुदारणा. एक्झीट पोलांनी तांकां सामकेच कावलाक काडिल्ले. मात, तांणी सगले पोल फट थारावन कामगिरी सुदारली. प्रधानमंत्री मोदी हांणी लोकांनी फाटोफाट तिसरे खेप एनडीएचेर विस्वास दवरलो. भारतीय इतिहासांतली ही इतिहासीक कामगिरी, अशें ट्विट केलां. मोदीच प्रधानमंत्री जातले, पूण संभ्रम निर्माण करपी प्रतिक्रिया आयल्यात. जनता दल सेक्युलराचे आमदार डाॅ. खलीद अन्वर हांणी प्रधानमंत्री जावपाक नितीशकुमार हांचे सारको बरो उमेदवार कोणूच आसपाक शकना, अशी प्रतिक्रिया दिल्या. तर ममता बॅनर्जी, अशोक गेहलोट ह्या दोन मुख्यमंत्र्यांनी मोदी हांणी राजिनामो दिवंक जाय, अशें म्हणलां. हातूंतले अन्वर हे भाजपा समर्थक पक्षाचे. दुसरे वटेन इंडी आघाडेची आयज बसका जातली. तातूंत फुडल्या डावपेचांचेर भासाभास जातली. तेन्ना कोणाचे समर्थक वा विरोधक केन्ना जागो बदलीत तें सांगपाक येना. हाचे पयलीं तशें जालां. म्हणटकच सगलें सा जाता म्हणसर दोन दीस वतले अशें दिसता.
महाराष्ट्र गोंयाक लागी. म्हणटकच थंयच्या राजकारणाचेर गोंयकारांचें लक्ष आसता. थंय कांय वर्सां पयलीं शिवसेना फुटिल्ली. सगलेच फुटिल्ले म्हणपाक जाता. एकनाथ शिंदे हांच्या फुडारपणा खालच्या ह्या बंडाक भाजपान तांकां मुख्यमंत्री करून तेंको दिल्लो. उपरांत राष्ट्रवादीय फुटून ह्या सरकाराक वचून मेळ्ळी. हातूंत भाजपाचो मात्तूय हात ना, अशें तांचे फुडारी सांगतात. तर ह्या दोनूय पक्षांच्या मूळ फुडारी तसो जाहीर आरोप करतात. खरी शिवसेना, राष्ट्रवादी म्हूण ह्या फुटीर गटांक मान्यताय मेळ्ळी. आतां महाराष्ट्रांत विरोधी पक्षांचे चड खासदार वेंचून आयल्यात. इंडी आघाडी केल्ल्याचो तांकां फायदो जालो.
उत्तर प्रदेशांत प्रशासनांत शिस्त हाडपी, कायदो, सुवेवस्था सारकी चालीक लावपी योगी आदित्यनाथ सरकाराक धपको बसला. विरोधी समाजवादी पक्षाक (अखिलेश यादव) भाजपा परस चड जागे मेळ्ळ्यात. ओडिशांत भाजपान पयलेच खेपे जैत जोडलां. अस्तंत बंगालांत ममता दिदी हीच राणी हे परतून एकदां सिद्ध जालां.
सगलेच निकाल अजून जाहीर जावंक नात. लोकांचो कौल सगल्यांनी स्विकारला आसतलो. न्हय, स्विकारपाक जाय. लोकशाय बळिश्ट करपाक आतां सगल्यांनी वावुरपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
