भांगरभूंय | प्रतिनिधी
भांगरभूंय । खेळां मेज
पणजीः गोंय फुटबॉल उदरगत परिशदेन (जीएफडीसी) उत्तर आनी दक्षीण गोंयांतल्या फुटबॉल प्रशिक्षकां खातीर केपें- बोरीमळ आनी बांबोळी अॅथेलेटिक स्टेडियमांत कार्यशाळा आयोजीत केली. तातूंत सुमार 75 प्रशिक्षकांनी वांटो घेतिल्लो. प्रशिक्षकांचे गिन्यान वाडोनव तांकां आनीक प्रगत करप हो ह्या कार्यशाळांचो हेत आशिल्लो.
दक्षीण गोंयांत केपें बोरीमळ हांगच्या खेळां संकुलांत 23 तें 25 मार्च आनी उत्तर गोंयांतल्या प्रशिक्षकां खातीर बांबोळे स्टेडियमांत 28 तें 30 मार्च मगजतीं ही कार्यशाळा जाली. जीएफडीसीचो अध्यक्ष ब्रह्मानंद खंखवाळकार आनी सचीव दीपेश प्रियोळकार हांणी उत्तर गोंयांतले कार्यशाळेक भेट दिली. जीएफडीसीचो तंत्रीक सहाय्यक लवज्यो गोम्स हाच्या मार्गदर्शना खाला दोनूय कार्यशाळा जाल्यो.
पणजेतल्या डॉन बॉस्को मैदानार गोंय खेळां प्राधिकरणान आयोजीत केल्ल्या केएनव्हीबी कार्यशाळेंत हांवें आनी म्हज्या सहकाऱ्यांक मेळल्लें गिन्यान जीएफडीसी प्रशिक्षकां मेरेन पावोवप हो कार्यशाळा आयोजीत करपा फाटलो हेत आशिल्लो. जीएफडीसी प्रशिक्षणार्थ्यींच्यो सद्या परिक्षा सुरू आसात. ताका लागून प्रशिक्षकांक रिकामें दवोरपा परस आमचे कडले ‘डच फिलोसॉफी’ संबंदीचें गिन्यान ताकां दिवपा खातीर कार्यशाळेचें आयोजन केल्लें अशें गोम्स हाणे सांगलें. भुरग्यां मदलें खाशेलेंपण आनी प्रशिक्षकांची भूमिका हे संबंदी कार्यशाळेंत प्रात्यक्षिकां आनी लेखी सत्रा हें विशीं प्रशिक्षकांक मार्गदर्शन केलें अशी म्हायती ताणे दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
