भांगरभूंय | प्रतिनिधी
दिल्लींतल्या कोचींग सेंटर तळघराच्या चार धनयांचो जामीन अर्ज मारलो भायर
नवी दिल्ली, खबरां संस्था: राजधानी दिल्लींतल्या कोचींग सेंटरच्या तळघरांतल्या तीन यूपीएससी उमेदवारांच्या मरणा विशीं दिल्ली उच्च न्यायालयान बुधवारा अधिकार्यांक सोलून काडले. ‘‘ मनशाचो जीव मोलादीक. खंयच्याच निश्काळजीपणाक लागून तो होगडावचो न्हय. प्रशासनाकडेन वेतन दिवपाक पयशे नासतात. तेन्ना प्रशासन शेंकड्यांनी वर्सां पोरणी मुळावी बांदावळ कशी अद्ययावत करतलें’ असो प्रस्न करून फुकट संस्कृताय सोंपोवपाची गरज दिल्ली उच्च न्यायालयान बुधवारा उक्तायली.
२७ जुलयाक घडिल्ले घडणुकेची चवकशी करपा खातीर उच्च पांवड्यावेली समिती तयार करपाची मागणी करपी याचिका ‘कुटूंब’ संघटणेन वकील रुद्र विक्रम सिंग हांचे वरवीं दाखल केल्या. हाचेर बुधवारा प्रभारी मुख्य न्यायमूर्ती मनमोहन आनी न्यायमूर्ती तुषार राव गेडेला हांच्या खंडपिठा मुखार सुनावणी जाली.
पोरण्या राजेंद्र नगरांतल्या कोचिंग सेंटराच्या भायर गाडी चलोवपी मनशाचेर कारवाय करून दिल्ली पुलीस एके विचित्र घडणुकेची चवकशी करतात. पूण पालिका अधिकार्यां आड कसलीच कारवाय जायना. दिल्ली पुलीस नेमके कितें करतात अशीय खंडपिठान टिप्पणी केल्या.
सीव्हीसी, सीबीआय वा लोकपाल ह्या केंद्रीय एजन्सींक हे घडणुकेची चवकशी करपाक उच्च न्यायालयान निर्देश दिल्यात. तशेंच दिल्ली पालिका म्हामंडळाचे आयुक्त, संबंदीत पुलीस उपायुक्त आनी प्रकरणाचे तपास अधिकारी शुक्रारा हजर रावपाचेय निर्देश दिल्यात.
हें सगळ्यांचें अपेस!
पोरण्या राजेंद्र नगर वाठारांतल्या एका शिक्षणीक केंद्रांत शेनवारा जाल्ल्या अपघाताक नागरी संस्था जापसालदार आसा आनी तातूंत गंभीर संरचनात्मक दोश आसात, ताचेर उपाय काडपाची गरज आसा अशें दिल्ली नगरपालिकेचे अतिरिक्त आयुक्त तारिक थॉमस हांणी बुधवारा सांगलें.
जामीन याचिका भायर मारल्यो
तळघरांतलीं मरणां हो गुन्यांव सामको गंभीर आशिल्ल्याचें नमूद करून दिल्ली न्यायालयान बुधवारा एसयूव्ही चालकाची जामीन याचिका भायर मारली. तशेंच हे घडणुकेचो तपास आजूनय सुरू आशिल्ल्याचें सांगून न्यायालयान तळघराचे चार धनी तेजिंदर सिंग, परविंदर सिंग, हरविंदर सिंग आनी सरबजीत सिंग हांचेय जामीन अर्ज भायर मारल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
