भांगरभूंय | प्रतिनिधी
नवी दिल्ली, खबरां संस्था: भारतांत आजूनय व्हडा संख्येन कांय नागरीक फुकट रेशन सुविधायेचेर निंबून आसतात. अशा सगळ्या नागरिकां खातीर सर्वोच्च न्यायालयाच्या सुनावणे मजगतीं हाजीर केल्लो एक प्रस्न धक्को दिवपी थारपाक शकता. कोरोना काळा सावन देशांत प्रवासी मजुरांक दिवपी फुकट सुविधांचेर सर्वोच्च न्यायालयान ‘हें आनीक कितले दीस अशेंच चालूच उरतलें, केन्ना मेरेन फुकट रेशनाची पुरवण करतले?’ असो सरळ प्रस्न केलो.
न्यायमूर्ती सूर्यकांत आनी न्यायमूर्ती मनमोहन हांच्या खंडपीठाच्या वतीन महाधिवक्ता तुषार मेहता आनी अतिरिक्त महाधिवक्ता ऐश्वर्या भाटी हांचे मुखार म्हत्वाचें निरीक्षण मांडटना, ‘हाचो अर्थ फकत करदातेच हाचे पसून पयस आसात’ हो म्हत्वाचो मुद्दो मांडलो.
रोजगार निर्मितीचेर काम कित्याक जायना?
२०२० वर्सा कोरोना म्हाधामीच्या काळांत प्रवासी मजुरां मुखार उब्यो आशिल्ल्यो समस्या आनी आडखळीं विशीं स्वता दखल घेवन एके बिगरसरकारी संघटणेची भुमिका ज्येश्ठ वकील प्रशांत भूषण हांणी मांडली. तांणी ह्या मजुरांक बेगोबेग समाधानी करपाची मागणी करतना ‘ई-श्रम’ पोर्टलार नोंदणी आशिल्ल्या सगळ्या प्रवासी मजुरांक फुकट राशन दिवपाचे निर्देश दिवपाची गरज आशिल्ल्याचें मत भूषण हांणी युक्तीवाद करतना मांडलें. हाचेर खंडपिठान, ‘केन्ना मेरेन फुकट रेशन दिवपाक शकता? आमचे कडेन प्रवासी मजुरां खातीर रोजगाराच्यो संदी, रोजगार आनी तत्सम संदींचेर काम कित्याक करिनात?’ असो प्रस्न केलो.
एके खासगी संघटणे वतीन युक्तिवाद करपी प्रशांत भूषण हांणी न्यायालयांत मांडिल्ले परिस्थिती प्रमाण राज्य आनी सगळ्या केंद्रशासीत प्रदेशांतल्या प्रवासी मजुरां खातीर रेशन कार्ड जारी करपाचे निर्देश जारी केल्यात. जाका लागून तांकां केंद्र शासनाचे वतीन दिवपी फुकट रेशन सुविधेचो लाव घेवपाक मेळटलो. तांचे म्हायती प्रमाण नव्या आदेशांत जांचे कडेन रेशन कार्ड ना, मात जे लोक ‘ई-श्रम’ पोर्टलाचेर नोंदणीकृत आसात तांकांय फुकट रेशन सुविधायेचो लाव दिवचो.
न्यायमूर्ती सूर्यकांत हांणी मात हांका हरकत घेवन , ‘हीच समस्या आसा…’ अशें म्हणलें. ‘जेन्ना आमचे कडल्यान राज्यांतल्या प्रवासी मजुरांक फुकट रेशन दिवपा विशीं आदेश दितले तेन्ना प्रत्यक्षांत हांगा कोणूच नासतले. सगळ्यांनी पळ काडला आसतलो. जनतेचीं मनां जिखपा खातीर राज्य शासन रेशन कार्ड जारी करपाक शकता. कारण, फुकट रेशन वाटपाची जापसालदारकी केंद्राची आसा, हें तांकां खबर आसा. मुळात आमी हांगा राज्य आनी केंद्र अशी विभागणीच करूंक जायना, ना जाल्यार परिस्थिती आनीक इबाडटली’ अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
