भांगरभूंय | प्रतिनिधी
दिवचल भाजपा आयोजीत भलायकी शिबिराक बरो प्रतिसाद
दिवचल: सामान्य मनशांचे भलायकेची जतनाय घेतना तांचे खातीर फुकट भलायकी तपासणी शिबीर, फुकट वखदां, उपचार दिवप हें बरें काम जावन आसा. हे खातीर भाजपा तोखणाय करपाक पात्र आशिल्ल्याचें दिवचलचे ज्येश्ठ डॉ. माधव लेले हांणी सांगलें.
भाजपा दिवचल मंडळान समाजीक न्याय सप्तका खाला म्हापशेंच्या व्हिजन मल्टीस्पेशलिटी हॉस्पिटलाच्या सहकार्यान आयोजीत केल्ल्या फुकट भलायकी तपासणी शिबिराचें उक्तावण केल्या उपरांत मुखेल सोयरे ह्या नात्यान डॉ. लेले उलयताले.
दिनदयाळ सभाघरांत आयोजीत हे कार्यावळीक दिवचलचे आमदार डॉ. चंद्रकांत शेट्ये, मंडळ अध्यक्ष विश्वास गांवकार, पदाधीकारी तुळशीदास परब, अरुण नायक, वल्लभ साळकार, जिल्हो पंचायत वांगडी प्रदीप रेवोडकार आनी हेर मानेस्त हाजीर आशिल्ले.
डॉ. चंद्रकांत शेट्ये हांणी मतदारसंघाचे पुरायेन उदरगती खातीर मुख्यमंत्री डॉ. प्रमोद सावंत हांच्या मार्गदर्शना खाला खुबशे उदरगतीचे प्रकल्प चालीच लायल्यात. हातूंत नागरिकांचे भलायकेक पयलें प्राधान्य दिवन पयल्या भलायकी तपासणी शिबिराचें आयोजन केलां. हाचो लाव सगळ्यांनी घेवचो. तशेंच सरकाराच्यो विवीध येवजण्यो अंत्योदय तत्वा प्रमाण सगळ्यां मेरेन पावयतात. हाचो सगळ्यांनी लाव घेवपाचो उलो तांणी मारलो.
येवकार आनी प्रास्तावीक विश्वास गांवकार हांणी केलें. सरचिटणीस डॉ. कौस्तूभ पाटणेंकार हांणी सुत्रसंचालन केलें आनी निमाणें सगळ्यांचे उपकार मानले. ह्या शिबिराक बरो प्रतिसाद मेळ्ळो.
ह्या वेळार गोडेंमुताची, दोळे चिकित्सा , ब्लड प्रेशर अश्यो जायत्यो तपासण्यो केल्यो. जांकां मोतीबिंदू शात्रक्रियेची गरज आसा तांचेर व्हिजन मल्टीस्पेशलिटी हॉस्पिटलांत फुकट शत्रक्रिया करतले आनी फुकट वखदां दितले अशें कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
