भांगरभूंय | प्रतिनिधी
मडगांवः कोंकण रेल्वे मार्गाचेर तिकीट घेनासतना प्रवास करपी व्यक्तींचेर कारवाय करून रेल्वे प्रशासनान 15.21 कोटी रुपयांचो महसूल एकठांय केला. एप्रील ते ऑक्टोबर 2025 ह्या काळांत 6413 मोहिमां वरवीं 2.25 व्यक्तींचेर ही कारवाय केल्या.
कोंकण रेल्वे मार्गा वयल्या रेल्वेंतल्यान तिकेट नाशिल्ल्या प्रवाशांचो आंकडो वाडत आशिल्ल्यान कोंकण रेल्वेन तिकेट तपासपाची मोहीम सुरु केल्या. तिकेट नासतना प्रवास करपी व्यक्तींचेर दंडात्मक कारवाय सुरू आसा. एप्रील ते सप्टेंबर 2025 मेरेन कोंकण रेल्वे मार्गाचेर 5,493 विशेश तिकीट मोहिमां सुरू जाली. हाचे वरवीं अनधिकृत आनी अनियमीत प्रवास करपा संबंदीत 1,82,781 प्रकरणा मेळ्ळी. जाका लागून रेल्वे भाडें आनी दंडांतल्यान वट्ट 12.81 कोटी रुपयांची वसुली जाल्या.
ऑक्टोबरांत 2.40 कोटी दंड वसूल
कोंकण रेल्वे मार्गाचेर कारवाय करतना दिवाळी आनी हेर सणाच्या दिसांनी दंडाची रक्कम वाडिल्ल्याचे दिसता. ऑक्टोबर 2025 ह्या एकाच म्हयन्यांत 920 विशेश मोहीम जाली. जातूंत 42,645 अनधिकृत आनी अनियमीत प्रवासी मेळ्ळे. भाडें आनी दंड मेळून 2.40 कोटी रुपया वसूल जाले.
वैध तिकेट घेवन प्रवास करपाचो उलो
प्रवास सुरू करचे पयलीं सगल्या प्रवाशांनी वैध तिकीट घेवची आनी प्रवास करचो असो उलो कोंकण रेल्वे प्रशासनान मारला. वैध तिकीट नासतना प्रवास करप हो दंडनीय गुन्यांव आसा अशें रेल्वे प्रशासनान स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
