भांगरभूंय | प्रतिनिधी
शॅकां विशीं गंभीर जावपाचें गोंय सरकारान थारायलां. हाचे मुखार शॅकांनी काम करप्यांचेर तशेंच हेर वेव्हारांचें पुलिसांचें बारीक लक्ष आसतलें खंय. पयर मुख्य सचिवाचे अध्यक्षते खाला उंचेल्या पांवड्याची बसका जाली. तातूंत शॅक कामगारांक वळखपत्र दिवपाचोय विचार मुखार आयला. गोंयांत कोणूय येतात आनी दादागिरी करतात, हे प्रकार हाचे मुखार सोंसून घेवंक फावनात. दर्यावेळांचेर येवपी बेशिस्त पर्यटक, तांचो आनी शॅक कामगारांचो वाद जालो काय जावपी मारामारी…. हाका लागून गोंयच्या नांवाक खत लागलां. मारपेटाक लागून फाटल्या म्हयन्याभरांत उत्तर गोंयांतूच दोगांक मरण आयलां. झगडीं जावन कितले जखमी जाल्यात, ताचें कोंत- हिशोब आसचोना. दुसरे वटेन पालयां सड्यार पर्यटकांक बडोवपाचोय प्रकार घडला. थळावे आनी पर्यटकां मदल्या हिंसक संघर्शाची ही कीट वेळारूच पालोवची पडटली. कारण पर्यटन हें आमचें पोट. दर्यादेग, दर्यावेळेचेर कितें चलता, तातूंत कोण घुस्पल्यात हाची मुळां सावन तेंगशे मेरेन सगली म्हायती सरकारी यंत्रणेक आसतलीच. आतां उदक नाकाक तेंकलां. गोंय बुचकळून बुडचे पयलीं खर पावलां उबारचींच पडटलीं. आयच्यान फक्त आनी फक्त कृतीच करची पडटली. पुलिसांचेर हाची सगल्यांत व्हडली जापसालदारकी आसा, हातूंत मात्तूय दुबाव ना.
शॅक कामगारांनी केल्ल्या मारपेटांत दोगांक मरण आयलां, तर चवगांचेर सुरयेन हल्लो जाला. सोऱ्याच्यो बाटल्यो तर वेळेर चलता- भोंवतना आपट्टात. फकांडां, टिंगल, थोमणे मारपाचेय प्रकार घडटात. हातूंतल्यान मागीर केस्तांवां जातात. हो काळ सोशल मिडियाचो. ताचेर मागीर हें सगलें झळकता. तातूंत सत्य आसता आनी फटूय. पर्यटकांच्या प्रतिक्रियांक लागून गोंयच्या पर्यटन मळाचेर परिणाम जावंक लागला. जावंक ना, अशें कोणाक दिसता जाल्यार फुडाराक तो जातलोच, हें आमकां माल पडटलेंच, अशें समजून आयजूच ताचे आड पावलां उडोवपाक जाय. घर निवळ करतलो जाल्यार केन्ना ना केन्ना तरी सान्न मारून कोयर भायर उडोवचोच पडटलो. गोंयकारांक कांय प्रस्न सतायतात. कितले शॅक आसात हांगां? ताचे फाटल्या पांच वर्सांतले धनी कोण? भितर कितले गोंयकार आसात? कंपनींन शॅक विकत घेतल्यात काय वेवसायिकान? एकल्याच्या नांवार कितले शॅक आसात? सध्या चलयता तो ताचो मूळ धनी काय ताणें तो भाड्यान घेतला? एकेकल्यान कितले भाड्यान घेतल्यात? शॅकांतले कितले कूक, वेटर वा हेर कामां करपी मूळ गोंयकार आसात? कितले भायले आसात? कितलीं वर्सां ते हांगा रावतात? तांचे कडेन परवाने, वळखपत्रां बी आसात? ह्या आनी हेर प्रस्नांच्या जापांची एक वळेरी तयार करपाचें काम सरकारी यंत्रणांनी हातांत घेवंक जाय. पंचायत, पालिकांचे मजतीन हें केल्यार बरें? फुडलो हंगाम सुरू जावचे पयलीं हो अहवाल तयार जाल्यार बरो? ताचेर ग्रामसभांनी चर्चाय जावंची. बिराडाक दवरतात, तांची म्हायती पुलिशेक दिवची पडटा. तशीच दर्यावेळांचेर काम करप्यांचीय नोंद सक्तीची आसची. फाटीं एके पंचायतीन चेक नाके, गेट उबारून पर्यटकांक गांवांत प्रवेश दिवचे पयलींच तपासपाची यंत्रणा उबी करपाचो निश्चेव केल्लो. मात, तांकां सरकारी यंत्रणांनी परवानगी दिवंकना आसतली.
दर्यावेळेर कोण मस्ती, तवनासपण, दादागिरी करता जाल्यार ताचेर पंचायत आनी पुलिशेन लक्ष दवरुंक जाय. उक्तडार सोरो पियेवपाक कायद्यान बंदी आसा. दर्यादेगांचेर कोण कायदो मोडून नाका जाल्लें करता जाल्यार ताका उणोच 5- 10 हजारांचो तरी दंड जावंक नाका? रेंवेंत गाडयो चलोवप्यांकूय ख्यास्त दिवची. 40 वर्सां पयलीं दर्यावेळो शांत आशिल्ल्यो. आतां तें शक्य ना. तरीय गर्दी, आवाजाक विटिल्ले लोक हांगा शांती सोदपाक येतात. पूण वेळेर चलपाक पसून मेळना. दरेका शॅक धनयाक 10 सनबेड घालपाक मेळटात. ते कितले घालतात? जादा खाट वा कदेला फाटल्यान कोण हप्तो बी घेना मूं? मदींच कोण बोमाड्यांतल्यान उडटा, बोटींतल्यान सफर करता…. तीय गर्दी. तातूंत खेळणी, कपडे, माळो, बेल्ट, टॅट्यू, खाणां, थंड पेयां विकपी. अक्षरशा पांय घालपाक जागो नासता. कोणाच्या जिवार चलतां हें सगलें? देखीक कळंगूट वा हेर खंयचीय फामाद दर्यावेळ घेयात. त्या वाठारांत जे- जे वेवसाय, धंदे आसात, ते चलयतात कोण? तातूंत काम करतात कोण? 25 टक्के तरी गोंयकार आसात भितर? ‘कोको खाता रोव आनी हेवाळां गावलां मोव’, तसलो हो प्रकार. हेवाळ्या भशेन गरज नासतना गोंयाक, गोंयकारांक बदनामी सोंसची पडटा. आनीक कितलो तेंप सोंसपाचें हें?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
