फीश मील प्रकल्पांक लागून प्रदुशण

भांगरभूंय | प्रतिनिधी

नव्या प्लांटाक परवानगी दिवची न्हय

युरी आलेमांव हांणी मुख्यमंत्र्यांक बरयलें पत्र

मडगांव: कुंकळ्ळी उद्देगीक वसणुकेंत आशिल्ल्या फीश मील प्रकल्पांक लागून प्रदुशण जायत आसा. आतां नव्यान फीश मील प्लांटाक दिल्ली परवानगी रद्द करची अशी मागणी आमदार युरी आलेमांव हांणी पत्र बरोवन मुख्यमंत्री डॉ. प्रमोद सावंत हांचे कडेन केल्या.

आलेमांव हांणी मुख्यमंत्री डॉ. प्रमोद सावंत, उद्देग मंत्री मॉवीन गुदिन्हो आनी प्रदुशण नियंत्रण म्हामंडळाक पत्र बरयलां. कुंकळ्ळी उद्देगीक वसणुकेंत आशिल्ल्या सद्याचे फीश मील उत्पादन प्लांट, फ्ल्युएंट ट्रीटमेंट प्लांट हाचे बगर सुरू आसात. जाका लागून प्रदुशण जायत आसा. भलायकेक घात निर्माण जाता, तशेंच उदका स्रोताचो धोको निर्माण जाता. थळाव्या लोकांनी ह्या प्रकल्पां आड खूबशीं वर्सां आंदोलन केल्लें. ह्या प्रकल्पांच्या हानिकारक प्रभावा विशीं हुस्को उक्तायला अशें तांणी म्हणलां.

आलेमांव हांणी सांगलें, बाळ्ळे मुळाव्या भलायकी केंद्रान केल्ल्या सर्वेक्षणांत ह्या प्रदुशणाक लागून लोकांक स्वास घेवपाची समस्या, कांक्राचें दुयेंस, चड तेंपाचें मुत्रपींड दुयेंस आनी सोरायसीस हातूंत हुस्को करपा सारकी वाड जाल्ल्याचें उक्तडार आयलां. सुमार 28 लोक स्वसाचे समस्येन त्रस्त आसात. 29 लोकांक कांतीची अ‍ॅलर्जी, 11 लोकांक दम्याचो त्रास, एका मनशाक चड तेंपाचें मुत्रपींड दुयेंस जाल्ल्याचें ह्या सर्वेक्षणांत सांपडलां. तशेंच आठ लोकांक सायनस समस्या आसा. एका मनशाक सोरायसीस आसा आनी हेरांनी धुल्लाचे अ‍ॅलर्जीक लागून दोळ्यांत जळजळ जावपाची कागाळ केल्या. मुख्यमंत्र्यांनी म्हाका विधानसभा अधिवेशनांत फीश मॉल प्रकल्पांक प्रोत्साहन दिवचे नात अशें आस्वासन दिल्लें. तें तांणी पाळचें आनी नव्या फीश मील प्रकल्पाक दिल्ली परवानगी रद्द करची अशें आलेमांव हांणी म्हणलें.

तुमच्या अस्वासनाच्या आदारान नवे कारखाने उबारचे नात असो विस्वास लोकांक आशिल्लो. पूण गोवा आयपीबीन हालींच परवानगी दिल्ल्यान सरकाराचे कार्यपद्दतीचेर आनी पारदर्शकताये विशीं हुस्को आनी दुबाव निर्माण जाला अशें तांणी म्हणलें. परवानगी रद्द करपाचो निर्णय हो वाठार आनी थंयच्या रहिवाश्यांच्या भलायकेच्या हिताचो आसतलो अशेंय युरी आलेमांव हांणी म्हणलें.