भांगरभूंय | प्रतिनिधी
भारताच्या 56व्या आंतरराष्ट्रीय चित्रपट महोत्सवाचो पड्डो पयरूच पडलो. गोंयांत आतां इफ्फीन पंचविशेंत पावल दवरलां. तीन दसकां परस चड काळ जाले उपरांत इफ्फीक स्वताचें अशें हक्काचें घर मेळूंक नाशिल्लें. गोंयच्या रुपान 24 वर्सां आदीं इफ्फीक घरूय मेळ्ळें. गोंयांत आपल्या घरांत ऐन पंचविशेंत प्रवेश करपी इफ्फी कडल्यान सहाजिकूच खुबश्यो अपेक्षा संवसारभरांतल्या सिने रसिकांक आशिल्ल्यो आनी अजूनय आसात. 24 वर्सांचो हो काळ तसो ल्हान म्हणूंक येवचो ना. इफ्फीक गोंयांत हक्काचें घर दितना दिवप्यांनी आनी घेवप्यांनीय एक उद्दिश्ट दोळ्या मुखार दवरूनच तसो निर्णय घेतला आसुये. आतां दोन तपांच्या काळांत इफ्फी आपल्या गोंयांतल्या घरांत कितलो रुजला, कितलो फुल्ला हो चर्चेचो विशय थारूंक शकता. पूण एखाद्या त्रयस्थाक ते विशीं विचारीत जाल्यार इफ्फी जंय आशिल्लो थंयच आसा अशीच जाप सादारणपणान घडये आयकूंक मेळटली. इफ्फीच्या आयोजनांतल्यान वा इफ्फीक घर दिल्ल्यान गोंयांतल्या पर्यटन उद्देगाकूय चालना मेळटली हेंवूय एक उद्दिश्ट आशिल्लें आनी ताचो विचार करीत जाल्यार ते आघाडीचेर निश्चीतपणान फायदो जालो हें मान्य करचेंच पडटलें. पूण मुखेल उद्दिश्ट तें नाशिल्लें जाल्यार सैमरुपी गोंयांत चित्रपट संस्कृती रुजची, सिनेमा निर्मितीचें हें संवसारीक केंद्र जावचें हो यत्न आशिल्लो. पूण 24 वर्सां उपरांतूय गोंयांत इफ्फी खातीर सुसज्ज असो कन्व्हेंशन हॉल मेळना आनी फिल्म सिटीच्या निर्मितीचेर जाल्यार खर अशें एक पावल लेगीत मुखार पडना. फिल्म सिटीची निर्मिती ही गोंया खातीर काळाची गरज आसा. खंयचेय परिस्थितींत सरकाराक फिल्म सिटीचें शिवधोणू उबारचेंच पडटलें.
गोंयांत फाटलीं खूबशीं वर्सां इफ्फीत प्रत्यक्ष वांटेकार जावपी सिने रसीक एकूच गजाल नेमान आयकून परतात ती म्हणल्यार आमकां गोंय हें चित्रपट निर्मितीचें आंतरराष्ट्रीय केंद्र करपाचें आसा. अंदूंय मुख्यमंत्री डॉ. प्रमोद सावंत हाचे परस वेगळें अशें कांयच उलयले नात. इफ्फीच्या उक्तावण सुवाळ्यांत आसूं वा समारोपाच्या सुवाळ्यांत मुख्यमंत्री तेच उलयले जे आमी फाटलीं कितलींशींच वर्सां आयकत आसात. मुख्यमंत्र्यांनी म्हणलें, इफ्फी हो सर्जनशीलतायेच्या कलात्मकतायेचो उत्सव आसा. क्रिएटिव्ह मायंड्स अंतर्गत तरणाटे निर्माते तांच्या नव्या दृश्टीकोनान सिनेमाचे भविश्य घडयत आसात. भविश्या कडेन पळयतना आमचो दृश्टीकोन स्पश्ट आसा. आमी गोंयाक चित्रपट हब करपाचे आसात. संवसारीक पांवड्यार भारतीय सिनेमांक प्रोत्साहन दिवपा खातीर आमी कार्यरत रावं. मुख्यमंत्री गोंयाक चित्रपट निर्मितीचें आंतरराष्ट्रीय केंद्र करूंक पळयतात हाची खोस आसाच. पूण ते दिशेन एक पावल तरी उबारपाची तयारी जाय. 24 वर्सां जावन गेलीं, पूण ते दिशेन एखादें खर अशें पावल उबारिल्लें दिसून येना. 24 वर्सांच्या काळांत आमी नेमकें कितें साध्य केलें हें कळना. कोंकणी आसूं वा मराठी सिनेमांक गोंयांत जावपी निर्मिती प्रमाणा भायर उणीं जाल्ल्याचें स्पश्टपणान दिसून येता. ते आघाडेर निदान धोरणात्मक निर्णय घेवन गाडी मार्गाक लावप गरजेची आसा. पूण घेतिल्ल्या निर्णयांची कार्यवाही जायना जाल्यार ताका कोणें सांगचें.
सर्गेस्त मनोहर पर्रीकार हांणी आपल्या मुख्यमंत्रीपदाच्या काळांत इफ्फी गोंयांत हाडलो. इफ्फीक हांगा हक्काचें घर दिलें. इफ्फीचो व्हड शुन्यांतल्यान गोंयांत सुरू जाल्ल्या प्रवासाचे आमी सामके पयल्या दिसा सावनचे साक्षिदार आसात. कन्व्हेन्शन सेंटर, फिल्म सिटी निर्मिती ह्यो गजाली पर्रीकार हांच्या काळा सावन आमी आयकत आसात. आंतरराष्ट्रीय चित्रपट महोत्सवांतल्यान घेवंक आयलें जाल्यार आमकां दोन हात पावचे नात अशी परिस्थिती आसतनाय हे आघाडीचेर इतली उदासीनता कित्याक हें कळना. केंद्र सरकाराचो तेंको आसून लेगीत हें अशें कित्याक जाता ह्या प्रस्नाची जाप मेळना. मुख्यमंत्री डॉ. प्रमोद सावंत जिद्दी आसात, प्रामाणीक आसात, तांकां ह्या उद्देगा खातीर खर कशें कितें तरी करपाचें आसा हें तांच्या देहबोलींतल्यान स्पश्ट दिसता. तांकां ते खातीर पयलें एखादें व्हड पावल उबारचें पडटलें. गोंय हो प्रदेश जातूंत एक ‘फिल्म सिटी’ म्हणून संवसार ताचे कडेन पळयत आसलो तरी प्रत्यक्ष फिल्म सिटी हांगा उबारप ही काळाची गरज आसा. गोंयांत फिल्म सिटी उबारपा खातीर गुंतवणुकदार रांगेंत उबे आसतना, सुवाते खातीरय तसो प्रस्न नासतनाय सरकारान ताचो गंभीरतायेन विचार करपाची वेळ आयल्या. फुडले इफ्फी आदीं सरकारान हे आघाडीचेर एखादें खर पावल उबारलें जाल्यार जाचे खातीर इफ्फीचो अट्टहास केला ताचें सार्थक जाल्ल्याचें म्हणूंक येतलें. फिल्म सिटी उबारपाचें जे अगणीत फायदे अपेक्षीत आसात तें पळयत जाल्यार गोंयाक आंतरराष्ट्रीय चित्रपट निर्मिती केंद्र करपा खातीर बुन्याद घालप खूब म्हत्वाचें आसा.
आंतरराष्ट्रीय दर्जाची चित्रपट निर्मिती, पर्यटन आनी इंटरेक्टिव्ह मनरिजवण हाचें संवसारीक केंद्र अशा संकल्पनेचेरूच म्हत्वाकांक्षी फिल्म सिटीची उबारणी करीत जाल्यार ताचें अगणीत फायदे ह्या ल्हानशा प्रदेशाक जावप शक्य आसा. गोंयचे परिवर्तन लागींच्या काळांत जावंक शकता. व्हड प्रमाणांत मनरिजवण परिसंस्धा डिझायन आनी संचलन करपाच्या मळार खूबशा दसकांचो अणभव आशिल्ले हैदराबादच्या नामनेच्या रामोजी फिल्म सिटीचे मुखेल कार्यकारी अधिकारी राजीव जलनपूरकर हांकांय गोंयांत हे आघाडेर अपार क्षमता दिसून येता. भारताचें फुडेलें भव्य आनी सर्जनशील आनी सांस्कृतीक केंद्र म्हूण गोंयचो उदय जावंक शकता अशें तांचें मत आसा. एकत्रीत फिल्म, मनरिजवण आनी अणभवात्मक गंतव्यांची संवसारभरांतली मागणी नेटान वाडत आसा आनी तें पळयत जाल्यार सैम सौंदर्य, सर्जनशील समुदाय आनी संवसारीक आकर्शण हे विशीं गोंयाक ताचो खूबसो फायदो जावंक शकता अशें तांकां दिसता आनी ते खातीर सगले तरेचें सहकार्य, समर्थन दिवपाचीय तयारी तांणी दाखयल्या. गोवा फिल्म सिटीक पर्यटन, सांस्कृतीक सादरीकरण आनी संवसारीक दर्जाच्या सरबराये कडेन जोडपी एक लॅण्डमार्क केंद्र आनी म्हणून विकसीत करून योग्य प्रकारान राबयल्यार, ह्या प्रकल्पांतल्यान गोंयाक दीर्घकालीन अर्थीक, सांस्कृतीक आनी रोजगारा विशीं लाव मेळूंक शकता. ह्या प्रकल्पांत भारताच्या मनरिजवण क्षेत्राच्या एकूण चित्रांत गोंयचें स्थान नव्यान परिभाशीत करपाची तांक निश्चीतपणान आसा. लागींच्या काळांत गोंयांतलो भारताचो हो आंतरराष्ट्रीय चित्रपट महोत्सव एका वेगळ्याच उंचायेर व्हरपा खातीर सरकाराक हें व्हड पावल उबारचेंच पडटलें.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
