फिल्मी खबरो
भांगरभूंय | प्रतिनिधी
‘कल्की’ ब्लॉकबस्टर
महाभारत, कलीयुग आनी सायफाय अशी मिसळ आशिल्ली ‘कल्की 2898’ फिल्म ब्लॉकबस्टर थारलो. ह्या फिल्मान आतांमेरेन 1080 कोटी जोडल्यात. भारतीय फिल्मां खातीर नवी दिका थारपी ह्या फिल्मांत अश्वत्थामाच्या भूमिकेंत महानायक अमिताभ बच्चन, बाहुबली फिल्मांक लागून आघाडीचो अभिनेतो जाल्लो प्रभास, बॉलीवूड हिट क्वीन दिपीका पादुकोन, सावथ परफेक्शनिस्ट कमल हसन अशी स्टारकास्ट आसा. ह्या फिल्मान प्रदर्शीत जावचें पयलीं यू ट्युबार 14 मिणटांचे 2 भाग घाल्लें. तातूंत भैरव (प्रभास) आनी बुज्जी (मशीन) हांच्या संबंदाचेर विस्तारान म्हायती दिवपाची ट्रिकूय काम करून गेली. यू ट्यूब तशेंच हेर सोशल मीडिया प्लॅटफॉर्मारूय ह्या दोन भागांक उपाट प्रतिसाद मेळ्ळा.
अक्षय कुमाराचो रिमेक ‘सरफिरा’ सुपर फ्लॉप
अक्षय कुमाराचो आनीक एक रिमेकपट आदळ्ळो. 80 कोटी रुपयान तयार जाल्ल्या ‘सरफिरा’ फिल्मान एका सप्तकांत फकत 20 कोटी वाशील केले. ह्या फिल्मांत अक्षय कुमारा बरोबर परेश रावल, राधिका मदन, सीमा बिस्वास, सरथ कुमार आसात. तामिळ सुपर हिट फिल्म सूराराय पोट्टरूचो हो रिमेक.
आयज येता ‘बॅड न्यूज’
विकी कौशल, त्रिप्ती दिमरी, अॅमी विर्क, फातिमा सना शेख, सान्या मल्होत्रा अभिनीत ‘बॅड न्यूज’ आयज थेटरांनी येता. ऑफ बिट कॉमेडी, मात्शी कमरे सकयलची कॉमेडी म्हूण ह्या फिल्माकडेन प्रेक्षक पळयतात. ह्या फिल्मांतल्या तौबा तौबा ह्या पंजाबी गीतान सोशल मीडियाचेर धुमाकूळ घाला. ताचेर रिल्स तयार जायत आसात. ह्या गीताचें पातळिल्लें पिशें फिल्माक कितलो लाव मेळोवन दितले, हें कळटलेंच.
‘स्त्री – 2’च्या ट्रेलराचो धुमाकूळ
बहुप्रतिक्षीत फिल्मांचे यादींत सामकें वयर आशिल्ल्या ‘स्त्री – 2’ फिल्माचो ट्रेलर भायर सरलो. ट्रेलर येताच सोशल मीडियाचेर धुमाकूळ सुरू जालो. ह्या फिल्माच्या ट्रेलराक लोकांचो व्हड प्रतिसाद मेळटा. लोकांचो मेळपी प्रतिसाद पळयल्यार ऑगस्टांत हें फिल्म प्रदर्शीत जाताच हॉरर फिल्मांच्या जोडीचो एक नवो विक्रम प्रस्थापित जावंक शकता, असो अदमास आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
