फिल्मी खबरो

भांगरभूंय | प्रतिनिधी

‘कल्की’ 2 सप्तकांत 915 कोटींची जोड

प्रभास, अमिताभ बच्चन, कमल हसन, दिपीका पदुकोन अभिनीत ‘कल्की’ फिल्मान 2 सप्तकांत 915 कोटी जोडले. फकत हिंदी आवृत्तींत ह्या फिल्मान आतांमेरेन 229 कोटी जोडल्यात. जाल्यार पुराय भारतांतल्यान ह्या फिल्मान आतांमेरेन 537 कोटी रुपया एकठांय केल्यात. कल्की बेगीनूच 1 हजार कोटी रुपयांच्या क्लबांत पावतलो. मात, हिंदी फिल्मांचो हिशेब पळयल्यार हिंदी भाषेंतल्या जवान, पठाण, गदर 2, अॅनिमल हांच्या म्हऱ्यांत कल्की पावपाक शकचोना म्हूण स्पश्ट जाला.

‘वायल्ड वायल्ड पंजाबी’ आयज नेटफ्लिक्सार

वरुण शर्मा, जस्सी गिल, सनी सिंग, मनज्योत सिंग, गोपाल दत्त, पत्रलेखा, इशिता राज अभिनीत ‘वायल्ड वायल्ड पंजाबी’ आयज नेटफ्लिक्सार प्रदर्शीत जाता. फुक्रे फिल्मासारकी कॉमेडी ह्या फिल्मांतूय आसा. हे फिल्म नेटफ्लिक्सार हाडून निर्मात्यांनी एक हुशारकायेची चाल खेळ्ळ्या. कल्कीच्या वादळामुखार थेटरांत ह्या फिल्माची दाळ शिजची नासली. तेन्ना नेटफ्लिक्सार प्रेक्षक फावता त्या वेळेंत पळोवपाक शकता. वरुण शर्माची बोवाळ घालपी कॉमेडी ह्या फिल्माची यूएसपी आसा. गोंदळांत गोंदळ ह्या सारक्या कॉमेडी फॉर्म्युलाचेर हें फिल्म आदारीत आसा.

‘कल्की’ मुखार ‘किल’ जालो किल

रक्तरंजीत अॅक्शन आशिल्लो, अॅनिमल फिल्मासारको मारधाडीक कसलेच धरबांद नाशिल्ल्या ‘किल’ फिल्माक प्रेक्षकांचो उणो प्रतिसाद मेळटा. कल्की फिल्माक लागून बरी अॅक्शन आसुनूय ‘किल’ फिल्म थेटरांनी चलूंकना. हजारभर शो मेळिल्ल्यान ह्या फिल्माचे कलॅक्शनूय तशें उणेंच आसा. 20 कोटींत तयार जाल्ल्या ह्या फिल्मान पयल्या सप्तकांत 9 कोटी रुपया वाशील केल्यात. येता त्या सप्तकांत 3-4 कोटी धरल्यार 12-13 कोटींमेरेन वाशील जावं येता. फिल्म फ्लॉप कॅटेगरींत वतलो, अशें दिसता.