फिल्मी खबरो
भांगरभूंय | प्रतिनिधी
‘कल्की’ हावजफुल… मात…
प्रभास, अमिताभ बच्चन, दिपिका पदुकोन, कमल हसनाचो ‘कल्की 2898 एडी’ फिल्म थेटरांनी आयलें. सगळ्याक हावजफुल चल्ला. मात, ह्या फिल्माक पाचांतले फकत 3 रेटींग मेळ्ळा. कांय थेटरांनी ह्या फिल्माच्यो तिकेटी 2300 रुपयांक लेगीत गेल्यात.
पौराणिक आनी आधुनीक अशें समिकरण करून तयार केल्ल्या ह्या फिल्मांत भरपूर अॅक्शन आसा. प्रभासान सदचें भशेन अभिनय केला. मात, ह्या फिल्मांत सगल्यांत चड डॅशींग दिसला तो म्हणल्यार महानायक अमिताभ बच्चन अशी प्रेक्षकांची प्रतिक्रिया आसा.
‘मुंज्या’ तेंकलो 100 कोटींक
सरप्रायज ब्लॉकबस्टर हिट थारिल्लो ‘मुंज्या’ फिल्म बॉक्स ऑफिसाचेर कमाईचें बाबतींत सुपर डुपर थारला. हें फिल्म बेगीनूच 100 कोटींचो वेवसाय करतले. आतांमेरेन ह्या फिल्मान 95 कोटी जोडल्यात. कोंकणांतल्या एका भुताचेर आधारित कथानक लोकांक खुबूच आवडला. प्रभासाचो कल्की प्रदर्शीत जाल्ल्यान मुंज्याक कांय प्रमाणांत ब्रेक लागला. मात, शेनवारमेरेन हें फिल्म 100 कोटी क्लबांत पावतलें, असो अदमास आसा.
मामुट्टीचो ‘टर्बो’ सुपर फ्लॉप
मल्याळम स्टार मामुट्टीचो ‘टर्बो’ सुपर फ्लॉप थारलो. 70 कोटींत तयार जाल्ल्या ह्या फिल्मान भारतीय बॉक्स ऑफिसांतल्यान फकत 34.37 कोटी वाशिल केल्यात. 35 कोटीं मायज ह्या फिल्माक लुकसान जाला. मामुट्टीचें ह्या वर्सांतलें हें तिसरे फिल्म. ह्यान पयलीं अब्राहम ओल्झर फिल्म हिट थारिल्लें. जाल्यार ब्रह्मयुगम फिल्मान निर्मिती खर्च वाशील करपाक येस मेळयलें. टर्बो फ्लॉप जाल्ल्यान आतां मामुट्टी फुडलें फिल्म सायन करतना खंय खुपूच विचार करतलो.
‘पिल’ प्रकाश चव्हाण येता तुमच्या भेटेक…
वेबसिरीज लोकांक चड आवडटा हें पळोवन एका फाटोफाट एक नवी वेबसीरीज येत आसात. तातूंतच आतां एक नवी वेबसीरीज येवपाची आसा, ती म्हणल्यार ‘पील’ प्रकाश चव्हाण ह्या व्यक्तीचें भोंवतणी ह्या वेबसीराजाचें कथानक घुंवता. मराठी सुपरस्टार, हिंदी फिल्मांचो कॉमेडियन अॅक्टर रितेश देशमुख प्रकाश चव्हाण जाला. वखदांच्या निर्मीतींतलो भ्रश्टाचार ह्या वेबसीरीजांत दाखयला.
नाताळाक येता बेबी जॉन
वरुण धवनाचो ‘बेबी जॉन’ नाताळाक प्रेक्षकांचे भेटेक येता. हें फिल्म खरें म्हणल्यार मे म्हयन्यांत प्रदर्शीत जावपाचें. मात कांय कारणांक लागून फुडें धुकल्लें. आतां ह्या फिल्माचे प्रदर्शानाची नवी तारीख जाहीर जातनाच नवो पोस्टरूय लॉन्च जालो. 25 डिसेंबराक बेबी जॉन थेटरांनी येतलो.
12 जुलयाक येता ‘हिंदुस्थानी 2’
कमल हसनाचो ‘हिंदुस्थानी 2’ फिल्म 12 जुलयाक प्रदर्शीत जाता. ह्या फिल्माचो ट्रेलर लॉन्च जालो आनी सगळ्यांक आवडलो. हिंदुस्थानी 2 फिल्मा खातीर कमल हसनान खासा मेहनत घेतल्या. विक्रम 2 फिल्मान कमल हसनाक परत लायमलायटांत हाडिल्लो. आतां कल्की फिल्मांतूय कमल हसन आसा. फाटोफाटो 2 बिगबजेट फिल्मां दिल्या उपरांत कमल हसनान हिंदुस्थानी 2 हो बिगबजेट फिल्म हाडला. 1996त आयिल्ल्या हिंदुस्थानी फिल्मान तेवेळार जोडीचे बाबतींत धुमाकूळ घाल्लो. हिंदुस्थानी 2 फिल्माचे कथानक हिंदुस्थानी फिल्माचेर आधारीत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
