फिल्मी खबरो

भांगरभूंय | प्रतिनिधी

दिवाळी धमाका

सिंघम अगेन आड भुलभुलैया 3

अंदू दिवाळेक चित्रपट रसिकांक 2 बीग बजॅट चित्रपट पळोवपाक मेळटले. फिल्म इंडस्ट्रींत दिवाळी धमाका म्हणल्यार कितें ताचो अणभव बॉलीवूडाच्या ह्या दोन व्हड चित्रपटांक लागून प्रेक्षकांक मेळपाचो आसा. सिंघमाचे आदले दोनूय भाग हीट थारल्यात, जाल्यार भुलभुलैयाचो पयलो भाग हीट, जाल्यार दुसरो भाग सुपरहीट थारिल्लो. तेन्ना आतां हे दोनूय चित्रपट हीट थारतले हातूंत दुबाव ना. मात, दोनूय चित्रपट एकाच दिसा 1 नोव्हेंबराक येतात, तेन्ना तांचो वेवसाय वांटून वतलो हें मात निश्चीत. सध्या फिल्मा 400 कोटींचो वेवसाय सहज करतात. तशेंच बरें फिल्म आसत जाल्यार हजार कोटींचो वेवसाय काय न्हू कसो जाता हें शाहरुख खानाच्या पठाण आनी जवान चित्रपटान दाखोवन दिलां. तशेंच श्रद्धा कपूर, राजकुमार राव हांच्या स्त्री 2 चित्रपटानूय आठशे कोटींचे लागी वेवसाय केलो. लोकांचो दिवाळेचो मूड पळयल्यार ह्या दोनूय फिल्मांचो मेळून 1200 कोटींचो वेवसाय जावपाक शकता.
सिंघम अगेन रामायणाचे कथानक पुलीस स्टोरींत बसोवन रचलां. जाल्यार भुलभुलैया सायको थ्रिलरा कडच्यान हॉररा मेरेन पावलां. हातूंतलो खंयचो चित्रपट चड वेवसाय करता हाचे कडेन सगल्यांची नदर आसा.
सिंघम अगेन चित्रपटांत अजय देवगण, टायगर श्रॉफ, अक्षय कुमार, रणवीर सिंग, करीना कपूर, अर्जून कपूर अशी स्टारकास्ट आसा. जाल्यार भुलभुलैया 3 चित्रपटांत कार्तीक आर्यन, त्रिप्ती दिमरी, माधुरी दिक्षीत, विद्या बालन, राजपाल यादव, विजय राज, संजय मिश्रा आसात.

‘बंदा सिंग चौधरी’ आयज प्रदर्शीत

अर्शद वारसी, मेहेर वीज, आलिशा चोप्रा, कियारा खन्ना, जिवेशू अहलावत अभिनीत ‘बंदा सिंग चौधरी’ चित्रपट आयज प्रदर्शीत जाता. 1971त भारत – पाकिस्तान युद्धा वेळार आनी उपरांतची परिस्थिती दाखयतना प्रेमकथा रचल्या. हो चित्रपट सत्यकथेचेर आसा अशें म्हणटात. ह्या चित्रपटाच्या ट्रेलराक प्रेक्षकांचो बरो प्रतिसाद मेळ्ळा. मात, 1 नोव्हेंबराक येवपी बीग बजॅट फिल्मांच्या प्रतिक्षेंत आशिल्लो प्रेक्षक ह्या चित्रपटाक कसो प्रतिसाद दिता, हे पळोवचें पडटले. तशेंच अर्शद वारसी एकल्याच्या नेटार थेटरांनी प्रेक्षक ओडपाक शकना ही वस्तुस्थिती आसा. म्हयनो सोंपसर हो चित्रपट थेटरांनी आसतलो, उपरांत ताची सुवात बीग बजॅट चित्रपट घेतले.

‘खेल खेल में’ ओटीटीचेरूय फ्लॉप

अक्षय कुमार, फरदीन खान, आदित्य सील, वाणी कपूर, तापसी पन्नू, अॅमी वर्क, चित्रगंधा सेन, प्रग्या जैसवाल, मधुमती कपूर अशी स्टारकास्ट आशिल्लो ‘खेल खेल में’ चित्रपट ओटीटीचेरूय फ्लॉप थारलो. बॉक्स ऑफिसाचेर 40 कोटी रुपयांचो वेवसाय केलो. अर्दे बजेटूय वाशील जावंक ना. बॉक्स ऑफीस म्हणल्यार थेटरांनी फ्लॉप जाल्ले बरे चित्रपट ओटीटीचेर चलतात, असो सादारण ट्रेंड आसा. मात, कथानक बरें आसुनूय, तशेंच तगडी स्टारकास्ट आसुनूय हो चित्रपट ओटीटीचेरूय कांयच करूंक शकलो ना. ओटीटीचेर 76 लाख लोकांनीच हो चित्रपट पळयलो. अक्षय कुमाराचो फाटलो फ्लॉप चित्रपट ‘बडे मियाँ, छोटे मियाँ’ चित्रपट ओटीटीचेर 96 लाख लोकांनी पळयल्लो.