फिल्मी खबरो

भांगरभूंय | प्रतिनिधी

प्रभासाची ‘सिक्सर’

तेलगू स्टार, पॅन इंडिया हिरो अभिनेतो प्रभास सध्या देशांतलो सगल्यांत व्हडलो स्टार आसा. तो 23 ऑक्टोबराक आपलो वाडदीस मनयता, ते फांटभुयेर ताच्या फुडल्या प्रकल्पांतल्यान कितलेशेच अपडेट आयल्यात. खंयच्याच अभिनेत्यान करूंक ना, असलें काम तो करपाचो आसा. एकाच वर्सां ताचें 6 प्रदर्शीत जातले. मिस्टर परफेक्ट, मिर्ची, छत्रपथी, ईश्वर, रेबेल आनी सालार हे चित्रपट तेलुगू राज्यांनी परतून प्रदर्शीत जातले. कांय चित्रपटांचें 23 ऑक्टोबराक सकाळीं 8 वरांचेर प्रदर्शन जातलें. ह्या वर्सा प्रभासाचो जल्मदीस व्हडा दबाज्यान मनोवपाचो ताचें मोगी विचार करतात.
प्रभासाच्या वाडदिसा ‘राजा साब’ ह्या सिनेमाचो टीझर उजवाडाक येतलो. मारुती ह्या चित्रपटाचो दिग्दर्शक आसून नोव्हेंबर मेरेन चित्रीकरण पुराय करपाची येवजण आसा. हो चित्रपट 2025च्या गिमाळ्यांत प्रदर्शीत जातलो. प्रभास रोखडोच हनु राघवपुडीच्या ‘फौजी’ चित्रपटाच्या कामाक लागतलो. हो चित्रपट 2026 वर्सा प्रदर्शीत जातलो. तशेंच प्रभास संदीप रेड्डी वंगा दिग्दर्शीत ‘स्पिरीट’ चित्रपटांतूय काम करतलो. उपरांत ‘कल्की’चो सिक्वेल सुरू करतलो. प्रभासाच्या वाडदिसा ह्या तिनूय चित्रपटांचीं खास पोस्टरां उजवाडाक हाडटले.

वेट्टायन @ 200 कोटी

रजनीकांत, अमिताभ बच्चन, फहाद फाजील, मंजू वॉरियर, राणा दग्गुबती अभिनीत वेट्टायन चित्रपटाक बॉक्स ऑफिसाचेर सरासरी प्रतिसाद मेळ्ळो. प्रदर्शीत जाल्ल्या उपरांत सव्या दिसा वेट्टायनान संवसारीक पांवड्यार बॉक्स ऑफिसाचेर अधिकृतपणान 200 कोटींचो आंकडो हुपलो. संवसारभर 250 कोटींच्या लागीं पावपा खातीर वेट्टायनाक दुसऱ्या सप्तकांत बरो प्रतिसाद मेळचो पडटलो. ह्या सप्तकांत बॉलीवूडांत व्हडले चित्रपट प्रदर्शीत जावचे ना. तशेंच दक्षिणेंतूय व्हडले चित्रपट ना, ताचो लाव मेळ्ळ्यार 250 चो पावंडो हुपूंक येस मेळपाक शकता.

6 डिसेंबराक येता ‘पुष्पा 2’

आयकॉन स्टार अल्लू अर्जुनाचो सगळ्यांत चड प्रतिक्षेंत आशिल्लो ‘पुष्पा 2 : द रूल’ हो चित्रपट 6 डिसेंबर 2024 दिसा संवसारभर प्रेक्षकांचें मनोरंजन करपा खातीर तयारी करता. क्रिएटिव्ह जिनियस सुकुमार ह्या चित्रपटाचें दिग्दर्शन करता, पयल्या भागांत आशिल्ली रश्मिका मंधानाय ह्या चित्रपटांत आसा.
पुष्पा 2 पंगड आक्रमक प्रमोशनाची तयारी करता, कित्याक तर हो चित्रपट सिनेमाघरांनी येवपाक 50 दिसां परस उणे दीस उरल्यात. फहाद फासील, सुनील, अनसूया भारद्वाज, अजय, जगदीश ह्या कलाकारांचोय ह्या चित्रपटांत आसपाव आसा.

धर्मवीर 2 जालो ‘हीट’

मराठी चित्रपटांक बरें दीस आयल्यातत. नवरा माझा नवसाचा 2 फाटोफाट धर्मवीर 2 चित्रपटूय हीट थारलो. ह्या फिल्मान आतांमेरेन 16 कोटी मेरेन जोडल्यात. हो चित्रपट 8 कोटी रुपयान तयार जाल्लो. मराठी फिल्म इंडस्ट्रींत 5 कोटीं वयर खर्च म्हणल्यार बीग बजेट म्हूण मानतात. धर्मवीर चित्रपटा भशेनूच हातूंतय कथानक बरें तरेन मांडलां. प्रसाद ओक ह्या अभिनेत्यान आपली क्षमता परत एकदा सिद्ध केली.