फिल्मी खबरो
भांगरभूंय | प्रतिनिधी
भेडिया आनी स्त्री एकठांय
‘स्त्री – 2’ फिल्मान आनीक एक गीत घाला. ह्या गीतांत भेडिया फिल्माचो अभिनेतो वरुण धवन स्पेशल केमियो करता. स्त्री श्रद्धा कपूरा बरोबर ताचें रोमँटिक गीत खूबसूरत चित्रांयला. हे गीत सध्या सोशल मीडियाचेर गाजता. फुडाराक भेडिया आनी स्त्री एकठांय येवन कितें धुमाकूळ घालत सांगूं नजं.
त्रिप्ती दिम्रीच्या वलयाचो परिणाम
‘लैला मजनू’ 6 वर्सांनी परत थेटरांनी
त्रिप्ती दिम्रीचे पदार्पणाचे फिल्म ‘लैला मजनू’ 6 वर्सांनी परत एकदां थेटरांनी येता. 6 वर्सां पयलीं आयलो केन्ना आनी गेलो केन्ना हें कोणाकूच कळूंक ना. तशेंच तिणें ह्या फिल्मांत काम केलां म्हूण खूब कमी लोकांक खबर आसा. अॅनिमल फिल्माक लागून फामाद जाल्ल्या त्रिप्तीच्या वलयाचो लाव घेवपा खातीर निर्मातो इम्तियाज अलीन हें फिल्म परत एकदां थेटरांनी हाडपाचो निर्णय घेतला. 15 ऑगस्टमेरेन 4-5 दिस ह्या फिल्माक बरी जोड जावं येता.
‘औरो में कहाँ दम था’ आपटलें
अजय देवगण, तब्बू अभिनीत ‘औरो में कहाँ दम था’ फिल्म फ्लॉप जालें. पयल्या सप्तकांत ह्या फिल्मान 10 कोटीं परस उणो वेवसाय केलां. 100 कोटींचे बजेट आशिल्ल्या ह्या फिल्माचो वेवसाय पळयल्यार अजय देवगणाच्या नांवांर हालीं तेंपा वयलो सगल्यांत व्हडलो फ्लॉप फिल्म लागलां, हें स्पश्ट. तशेंच 15 ऑगस्टाच्या म्हूर्तार नवी फिल्मा येतात, देखून दम नाशिल्लें फिल्म चडश्यां थेटरांतल्यान देंवतलें म्हूण निश्चीत.
नागा चैतन्य – सोबिताचो साखरपुडो
टॉलीवूड स्टार नागा चैतन्य आनी बॉलीवूड अभिनेत्री सोबिता धुलीपाला हांचो साखरपुडो जालो. सामंथा बरोबर घटस्फोट घेतल्या उपरांत चैतन्य दुसरे लग्न करपाची तयारी करता म्हूण फाटल्या कांय म्हयन्यां सावन चर्चा चलताली. ताका पूर्ण विराम मेळ्ळो. द नायट मॅनेजर, बार्ड ऑफ ब्लड, मेड इन हेवन अश्या वेब सीरीजांक लागून सोबीता फामाद जाल्या. तशेंच हिंदींत रमण राघव 2.0, शेफ, कालाकंडी, द बॉडी, घोस्ट स्टोरीज, मेजर अशी हिंदी फिल्मां, तशेंच मंकी मॅन हें इंग्लीश फ्लिम ताच्या नांवार आसा. कांय दाक्षिणात्य फिल्मांनीय तिणें काम केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
