फिल्मी खबरो
भांगरभूंय | प्रतिनिधी
स्त्री 2
स्त्री 2 हें अमर कौशीक दिग्दर्शीत हॉरर कॉमेडी फिल्म 15 ऑगस्टाक प्रदर्शीत जातलें. 2018त प्रदर्शीत जाल्लें स्त्री फिल्माचो हो सिक्वेल. फाटले फिल्मा भशेन राजकुमार राव आनी श्रद्धा कपूर मुखेल भुमिकेंत आसात. तशेंच पंकज त्रिपाठी, अभिषेक बॅनर्जी आनी अपारशक्ती खुराना हे कलाकार लेगीत फिल्मांत आसात.
संगीत सचीन-जिगरान दिलां,जाल्यार पदां अमिताभ भट्टाचार्यान बरयल्यांत. ‘अाज की रात…’ हें पद 24 जुलयाक रिलीज जाल्लें, जाल्यार दुसरें पद ‘आई नई…’ हें पद आयज रिलीज जातलें.
पयल्या स्त्री ह्या फिल्मान बॉक्स ऑफिसाचेर येस मेळयिल्लें. स्त्री 2 हें लेगीत पयल्या पार्टा भशेन लोकांची मनरिजवण करीत बॉक्स ऑफिसाचेर हीट जातलें अशें निर्मात्यांक आस्त आसा.
‘औरों मैं कहाँ दम था’ आयज प्रदर्शीत
वेन्ज़्डे, स्पेशल 26, बॅबी आनी एम एस धोनी अशीं एका परस एक सरस फिल्मां दिवपी दिग्दर्शक नीरज पांडे खूब तेंपा उपरांत आपलें नवें फिल्म ‘औरों मैं कहाँ दम था’ घेवन येता.
काणी स्वता नीरज पांडेन बरयल्या. मुखेल भुमिकेंत अजय देवगण आनी तब्बू आसात. अजय आनी तब्बूचें एकठांय काम केल्लें हें धावें फिल्म. तशेंच जिमी शेरगील, शांतनू महेश्वरी आनी सई मांजरेकार हीं लेगीत म्हत्वाच्या भुमिकां आसात.
ऑस्कर जैतिवंत एम एम क्रिम हांणी संगीत दिलां. खरें म्हणल्यार हें फिल्म 5 जुलयाक प्रदर्शीत जावपाचें पूण, कांय कारणांक लागून तारीख मुखार धुकल्ली.
नीरज पांडेची फिल्म सादरणीकर करपाचे वेगळीच शैली आसा. ताची ही शैली ह्या फिल्मांत लेगीत पळोवपाक मेळटली अशी आस्त फिल्म मोग्यांक आसा.
अक्षय कुमाराक ‘खेल खेल मैं’ कडल्यान आस्त
एका वर्सांत चार-चार फिल्मां करपी खिलाडी म्हणल्यार अक्षय कुमार सध्या एका हीट फिल्माक आशेला. फाटल्या कांय वर्सां सावन ताचीं चडशीं फिल्मां फ्लॉप जायत आसात. अंदूं अजून मेरेन ताचीं दोन फिल्मां बडे मियां छोटे मियां आनी सरफिरा आयल्यात. बडे मियां… फिल्माचो बजेट लेगीत सुटूंक ना, जाल्यार सरफिरांंत अक्षयान बरें काम केल्लें. पूण, प्रेक्षकां कडल्यान ताका म्हणपा सारको रिस्पोन्स मेळूंक ना.
आतां तो ‘खेल खेल मैं’ फिल्म घेवन येता. फिल्म 15 ऑगस्टाक स्त्री 2 वांगडा प्रदर्शीत जातलें.
हें फिल्म इटालीयन फिल्म परफॅक्ट स्ट्रेंजर्साचें रिमेक आसा. परफॅक्ट स्ट्रेंजर्साचें अजून मेरेन 20 परस चड भासांनी रिमेक केलां.
मुद्दस्सर अझीझ दिग्दर्शीत ह्या फिल्मांत अक्षय कुमारा खेरीत तापसी पन्नू आनी फर्दीन खान आसा.
‘घुडचडी’ कॉमेडीचो फूल डोज
टीव्ही सावन आपल्या अभियनाचो प्रवास सुरू करपी पार्थ समथान आपली अपकमींग मुव्ही ‘घुडचडी’ वरवीं धमाल करपाक सज्ज आसा. मुखेल भुमिकेंत संजय दत्त आनी रवीना टंडन आसा. फिल्माचो प्रिमीयर 9 ऑगस्टाक जिओ सिनेमाचेर जातलो. हालींच फिल्माचो टिजर रिलीज जाला. प्रेक्षकांक कॉमेडीचो फूल डोज पळोवपाक मेळटलो हैं टिजर रिलिजा उपरांत स्पश्ट जाता. संजय दत्त खूब तेंबा उपरांत परतून एकदा कॉमेडी फिल्मांत पळोवपाक मेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
