भांगरभूंय | प्रतिनिधी
खबरां संस्था
पर्थः टी-20 वर्ल्ड कप सर्तींत पाकिस्तान आनी नॅदरलँडाक हारोवपी भारतान आयतारा दक्षीण आफ्रिके कडल्यान 5 विकेटींनी हार खावची पडली. सामके बाबत फिल्डिंगेक लागून भारताक ही हार खावची पडली. भारतीय फिल्डरांनी रन आवट करपाच्यो तीन संद वोगडायलो जाल्यार विराट कोहलीन आश्विनाचे बॉलिंगेचेर मार्करमाची एक सोपी कॅच धरतां धरतां सोडली. कॅप्टन रोहीत शर्मान रन आवट करपाची भांगराची संद वोगडायली. भारताच्या गचाळ फिडिंगेचो लाब घेवन मार्करम आनी मिलरान पंगडाक साल्वार करून जैताचे वाटेर व्हेलें. टॉस जिखून बॉलरांक बरे पडपी पर्थाचे खेळपट्टीर पयलीं बॅटींग करपाचो रोहीत शर्माचो निर्णय निमणे आत्मघाती थारलो.
पयलीं खेळून भारतान आपले 20 ओव्हरींत 9 विकेटी वोगडावन 133 धांवड्यो केल्यो. दक्षीण आफ्रिकेन 19.4 ओव्हरींत 5 विकेटी वोगडावन जैताची मोख हातासली. आफ्रिकेची स्थिती एका वेळार 3 बाद 24 अशी आशिल्ली. मात बाबत फिल्डिंगेक लागून भारतान ही मॅच वोगडायली. भारताच्या डावांत तांचे चार गडी 42 धांवड्यांत आवट जाल्लें. सूर्यकुमार यादवान केल्ल्या 68 धांवड्यांच्या नाड्यार भारत 20 ओव्हरींत 133 धांवड्यो करपाक शकलो.
भारताचो कॅप्टन रोहीत शर्मा आनी विराट कोहलीन दोन विक्रम आपापल्या नांवार केले. मात भारताक हार खावची पडिल्ल्यान तांचे कडेन कोणाचें लक्ष गेलें ना. दक्षीण आफ्रिके आड रोहीत शर्मा खेळपाक आयलो तेन्ना टी-20 वर्ल्ड कप सर्तींत सगल्यांत चड मॅची खेळपी तो खेळगडो थारलो. रोहिताचो टी-20 वर्ल्ड कपांतलीं ही 36वी मॅच आशिल्ली. ताणे श्रीलंकेचो आदलो खेळगडो तिलकरत्ने दिलशानाक फाटीं उडयलें. सगल्यांत चड 35 मॅची खेळपाचो विक्रम ताच्या नांवार आशिल्लो. पर्थांत रोहितान तो मोडून आपल्या नांवार केलो. विराट कोहलीन टी-20 वर्ल्ड कपांत 1 हजार धांवड्यो पुराय करपाचो विक्रम केलो. सगल्यांत उण्यो मॅची खेळून हो विक्रम करपी विराट पयलो खेळगडो थारलां. 21 वे मॅचींत 91चे रनरेटान ताणे 1 हजार धांवड्याचें लक्ष्य पुराय केलें. सगल्यांत चड धांवड्यो श्रीलंकेच्या महेला जयवर्धनेच्या नांवार आसात.
भारतान आपल्या डावांत 133 धांवड्यो केल्यो ताचें सगळें स्रय सूर्यकुमाराक दिवपाक जाय. 40 बॉलांत 6 चौके आनी 3 सक्यांनी ताणे 68 धांवड्यो करून पंगडाची लज राखली. रोहीत शर्मा (15) आनी विराट कोहली (12) सोडून भारताचे बाकीचे बॅट्समन फकत हजर म्हणून आयलें. कोणाकूय दोन अंकी धांवड्यो करप शक्य जालें ना. लुंगी नगिडी (29-4) आनी पार्नेल (15-3) हांची ही करामत तांणी दोगानूय 7 विकेटी घेतल्यो.
दक्षीण आफ्रिकेच्या डावाची सुरवात भारता भशेन बाबत जाली. मात एडन मार्करम आनी डेव्हीड मिलरान पंगडाक एक हाती जैत मेळोवन दिलें. 3 बाद 24 उपरांत चवथे विकेटी खातीर तांणी केल्ली 76 धांवड्यांची भागिदारी निर्णायक थारली. मार्करमान 41 बॉलांत 6 चौके आनी एका सक्यान अर्ध शेंकडो (52) केलो. आश्विनाच्या बॉलार विराटान ताची सोपी कॅच सोडली. मिलन 45 बॉलांत 4 चौके आनी 3 सक्यांनी 59 धांवड्यो करून ना बाद रावलो. हे मॅचीच्या जैताचो सोक्षमोक्ष 20वे ओव्हरींत लागलो. दोन बॉल राखून दक्षीण आफ्रिकेन 5 विकेटींनी जैत मेळयलें. अर्शदीप सिंगान दोन जाल्यार मोहम्मद शमी, हार्दिक पंड्या आनी आश्विनान दरेकी एक विकेट घेतली.
आमी बरे खेळ्ळे पूण–
मॅची उपरांत रोहीत शर्मान सांगलें ” खेळपट्टीचेर बॉलरां खातीर कितें तरी खाशेलें आसतलें अशी अपेक्षा केल्ली. फास्ट बॉलरांक खेळपट्टीची मजत मेळटली हें आमकां खबर आशिल्लें. ते खातीर 133 धांवड्यांचो फाटलाव करप तितलें सोपें आसचें ना अशें म्हाका दिसतालें. आमी निमाणे मेरेन बरी झूज दिली. दक्षीण आफ्रिकेन निमाणे बरो खेळ केलो. खेळपट्टी अशी आशिल्ली की फास्ट बॉलरांक केन्नाय विकेट मेळपाक शकताली. मात मिलर आनी मार्करामची भागिदारी मॅच जिखपाची आशिल्ली. आमची फिल्डिंग बाबत जाली “
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
