भांगरभूंय | प्रतिनिधी
संवसारीक महासत्ता आशिल्ल्या अमेरिकेच्या 60 व्या वेंचणुकेचो निकाल हालींच जाहीर जालो आनी हे वेंचणुकेंत रिपब्लीकन पार्टीचे उमेदवार डोनाल्ड ट्रम्प हांणी अनपेक्षीतपणान जैत मेळयलें.
अनेपेक्षीत ह्या अर्थान म्हणटात की हे वेंचणुकेंत तांच्यो प्रतिस्पर्धी डेमॉक्रेटीक पक्षाच्याे कमला हॅरीस हांकांय जैताचे दादवेर समजताले. हे वेंचणुकेंत दोगांकूय जैताची आस्त आसली. वेंचणुके पयलींच्या सर्वेक्षणांत दोनूय उमेदवारां मदीं ‘काटे की टक्कर’ दाखयिल्ली. दोनूय उमेदवारांची जिखपाची शक्यताय पन्नास पन्नास टक्के उक्तायिल्ली. जो जिखून येतलो तो कांठार वेंचून येतलो अशें मानताले. ताकाच लागून ट्रम्प इतल्या घसघशीत मतांनी जिखून येतले कशें कोणाक दिसूंक नाशिल्लें.
ट्रम्प हांणी सुमार 277 इलेक्ट्रोल मत मेळयत कमला हॅरीस हांकां हारयत अमेरिकेंत फिर एक बार ‘ट्रम्प सरकार’ हाडलें. फिर एक बार अशें हांवें म्हणलें कारण 2016 ते 2020 अशीं चार वर्सा डोनाल्ड ट्रम्प हांचें सरकार अमेरिकेंत आशिल्लें. 2020 वर्सा म्हणल्यार फाटले वेंचणुकेंत तांकां ज्यो बायडन हांणी हारयिल्लो. ह्या वेळार मात तांणी त्या हारीचो बदलो घेतलो आनी अमेरिकेचेर परतून एकदां स्वताचें वर्चस्व सिद्ध केलें. अर्थांत तांकां हें जैत कशें मेळ्ळें हें लेगीत तपासून पळोवचें पडटलें.
डोनाल्ड ट्रम्प हांणी आक्रमक प्रचार करतना अमेरिका फर्स्ट ह्या धोरणाचें नेटान समर्थन केल्लें. डोनाल्ड ट्रम्प हे कट्टर उजवे विचारसरणीचे आसात हो तांणी मुद्दो आपल्या प्रचारांत नेटान मांडलो. आपल्या देशांतल्यो समस्या आनी हेर देशांतल्यान आयिल्ले स्थलांतरीत जबाबदार आसात. ज्यो बायडेन हांच्या काळांत हेर देशांतल्यान खूबशे लोक अमेरिकेंत आयिल्ले. ताका लागून अमेरिकेंतल्या थळाव्या नागरिकांचो रोजगार गेलो असो नेटाचो प्रचार तांणी केलो, आनी तांचो होच प्रचार तांच्या पथ्यार पडलो. तरणाट्यांनी तांकां भरभरून मतां दिलीं. तांणी केल्ल्या आयातीक विरोध आनी आयात उत्पादनाचेर कर वाडोवपाची केल्ली घोशणा ही मतदारांक पटली. अमेरिकेन हेर देशांच्या झगड्यांत पडपाची गरज ना हें तांचें मत लेगीत मतदारांक पटलें. तशेंच तांचो चीन आनी रशिये कडेन आशिल्लो विरोध संवसारभर फामाद आसा. अमेरिकेक फाटीं घालून चीन संवसारीक महासत्ता जावंक पळयता आनी तांकां रशिया मजत करीत आसतना ज्यो बायडेन हातार हात घेवन बशिल्ले अशें चित्र फाटलीं चार वर्सां दिसतालें. चीन आनी रशियाच्या वाडट्या वर्चस्वाक शह दिवपाचो आसत जाल्यार डोनाल्ड ट्रम्प सारको आक्रमक फुडारी देशाचो राष्ट्राध्यक्ष जावचो अशें मत अमेरिकेन नागरिकांचें जालें. तातूंत रशिया- युक्रेन आनी इस्रायल- पॅलेस्टायन झुजांत बायडेन हांणी स्विकारिल्लें धोरण मतदारांक घोस्ताक गेलें ना. म्हणूनच अमेरिकन मतदारांनी परतून एकदां ट्रम्प हांच्या हातांत सत्ता दिली आनी कमला हॅरीस हांकां न्हयकरलें.
कमला हॅरीस हांणी ट्रम्प हांकां नेटाचो धपको दिवपाचो यत्न केलो, पूण तांकां प्रचारा खातीर फावोसो वेळ मेळ्ळो ना. ज्यो बायडेन हांणी खूब उसरां तांची उमेदवारी जाहीर केली. ताका लागून तांकां प्रचारा खातीर फावोसो वेळ मेळ्ळो ना. कमला हॅरीस हांकां खावची पडिल्ली हार ज्यो बायडेन हांकांच लागून अशें म्हणल्यार कांयच चुकीचें थारचें ना. कारण ज्यो बायडेन हांची चार वर्सांची कारकिर्द निरशेवणीची अशीच आशिल्ली. अमेरिकेंतले सगल्यांत निश्क्रीय राष्ट्राध्यक्ष अशी अमेरिकेच्या इतिहासांत तांची नोंद जातली इतली निरशेवणीची कामगिरी तांची आशिल्ली. म्हारगाय, बेरोजगारी, शस्त्र संस्कृती हे विशीं तांणी दिल्लें एकूय आस्वासन तांकां पुराय करूंक जमलें ना. बेकायदो स्थलांतरितांचो प्रस्न तांणी वेवस्थीत हाताळ्ळो ना. ताका लागून तरणाट्यां मदीं तांचे विशीं तिडक आशिल्ली आनी ती तांणी मतपेटयेंतल्यान उक्तायली.
सगल्यांत म्हत्वाचें म्हणल्यार 21 व्या शेंकड्यांतूय अमेरिकन नागरीक एका कृष्णवर्णीय बायलेक राष्ट्राध्यक्ष म्हूण स्विकारपाक तयार नात ह्या आनी ह्या सारक्या खूबशा कारणांक लागून डोनाल्ड ट्रम्प हांचें जैत सोंपें जालें आनी ते परतून एकदां फिर एक बार ‘ट्रम्प सरकार’ म्हणत सत्तेर आयले.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
