भांगरभूंय | प्रतिनिधी
आहारांतल्या घटकांचेर भलायकी निंबून आसता. सदचो आहार पुश्टीक आसचो, म्हणल्यार तातूंत कुडीक गरजेच्या आशिल्ल्या सगल्या पदार्थांचो आस्पाव आसचो अशें आहार शास्त्र सांगता. पूण धांवपळीच्या सद्याच्या काळांत लोकांक रांदपा खातीर आनी जेवणा खातीर वेळ ना. मागीर आदार घेतात तो फास्टफुडाचो. सामक्या ल्हान भुरग्यां सावन ते व्हडा मेरेन सगलेच फास्टफूट आवडीन खातात. चड करून शाळेंतलीं भुरगीं तर फास्टफूड म्हणल्यार तांकां पर्वणीच दिसता.
घरा तयार केल्ली भाजी, चपाती, रोटी खातना किरकीर करपी भुरगीं फास्टफूड मात मिटक्यो मारून खातात. ताका लागून झटपट तयार जावपी आनी जिबेक जायजाय अशें दिसपी हे पदार्थ भलायकेक मात घातक आसतात. झटपट तयार जावपी ह्या फास्टफुडा खातीर साकर आनी मीठ हांचे प्रमाण खूब आसता. तशेंच तें भरपूर तळिल्लें लेगीत आसतात. अती प्रक्रिया केल्ल्या ह्या पदार्थांत कसलोच पुश्टीक घटक नासता. ताका लागून ह्या पदार्थां पसून पयस रावचें असो सल्लो दोतोर आनी आहार तज्ञ दीत आसतात. तरी लोक तांचे कांयच आयकानात आनी फास्टफुडा वटेनूच धांवतात.
दोन वर्सां पयलीं एक फास्टफूड तयार करपी संवसारीक नामनेचे कंपनीन हें मान्य केल्लें की ही कंपनी तयार करीत आशिल्ल्या साठ टक्के पदार्थांत आनी शितपेयांत शारिरीक पुश्टीक अशें कांयच ना. ह्या कंपनीचे नुडल्स आनी कॉफी ह्या दोन पदार्थांची संवसारभर नामना आसा. तशेंच चॉकलेट, केक, पास्ता, केचप, वेफर्स, कुरकुरे हे सारके विवीध पदार्थ ही कंपनी तयार करता. विशेश म्हणल्यार हे पदार्थ ल्हान भुरग्यां मदीं चड लोकप्रीय आसात. पालकूय भुरग्यांच्या हट्टाक लागून हे पदार्थ भुरग्यांक दितात. भुरगीं हे पदार्थ मिटक्यो मारून खातात.
कंपनीन ह्या पदार्थांत कसलेंच पुश्टीक घटक नाशिल्ल्याचें मान्य करून लेगीत पालक फास्टफुडाचो हट्ट सोडिनात. कांय पदार्थांत तर कुडीक हानिकारक घटक आसतात. तज्ञांनी ते संशोधन केले उपरांत सिद्ध करून दाखयलां. ज्या फास्टफूड पदार्थांत कुडीक हानिकारक घटक आशिल्ल्याचें सिद्ध जालें ते घटक कंपनीन काडून उडयिल्ल्याचें मान्य केलें. पूण अजून लेगीत अशे खूबशे पदार्थ आसात की जातूंत कुडीक हानिकारक आशिल्ले घटक आसात आनी ते पदार्थ बाजारांत सर्रास विकतात. कांय संवसारीक नामना आशिल्ल्या कंपनींचेर अशे आरोप आसात, की तांच्या पदार्थांत कुडीक हानिकारक घटक आसात तरी लेगीत ह्या कंपनींच्या फास्टफूड पदार्थांची लोकप्रियता उणी जावंक ना, वेल्यान ती वाडत चल्ल्या.
फास्टफुडाक लागून भुरग्यांक खूबशा दुयेंसाक सामकार वच्चें पडटा. अतिप्रमाणांत फास्टफूड खायत जाल्यार काळजा दुयेंस, गोडेंमूत आनी मोटसाणीचो घात उप्रासूं येता. अतिप्रमाणांत फास्टफूड खावप्यांनी कांक्रा सारकें दुयेंस लेगीत जावंक शकता अशें जाणकार सांगतात. ताका लागून पालकांनी भुरग्यांक फास्टफुडा पसून पयस दवरूंक जाय. फास्टफुडा बदला दूद, चपाती, रोटी, पराठे, चटणी, कड्डनाची उसळ, फोव, उप्पीट हे सारके पुश्टीक पदार्थ पालकांनी भुरग्यांक खावंक दिवंक जाय. भुरग्यांक सुवादीक पदार्थ दिवपा बदला पुश्टीक पदार्थ खावपाक दिवप ही पालकांची जापसालदारकी.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
