भांगरभूंय | प्रतिनिधी
मनशाचें जिवीत इतलें धावपळींचे आनी व्यस्त जालां की योग्य आहार, व्यायाम आनी फावो ती न्हीद घेवपा कडेन दरेकाचे दुर्लक्ष जाता. पूण जशें व्यायाम, योग्य आहाराची गरज आसा तशेंच फावो ती न्हीद घेवप लेगीत गरजेचें. न्हिदेचो उणाव जाल्यार भलायकेचेर वायट परिणाम जाता. हे संबंदी पेन स्टेट युनिव्हर्सिटींतल्या संशोधकांनी 3,700 जाणांचेर अभ्यास केलो. तातूंत धक्को दिवपी म्हायती उक्ती जाल्या. फावो ती न्हीद घेनाशिल्ल्या लोकांक शास्त्रज्ञांनी शिटकावणी दिल्या.
शारिरीक आनी मानसीक भलायकेचेर वायट परिणाम
न्हीद उणी जाल्यार तुमच्या शारिरीक आनी मानसीक भलायकेचेर वायट परिणाम जावंक शकता, देखून सगळ्या पिरायेच्या लोकांनी फावो ती न्हीद घेवपाक जाय अशें तज्ञ म्हणटात. हलींच जाल्ल्या एका संशोधनांत चार न्हिदेच्यो पध्दीती सोदून काडल्यात आनी तांचो मनशाचे भलायकेचेर कसो परिणाम जाता तेंय स्पश्ट केलां. फाटल्या म्हयन्यांत सायकोसोमॅटिक मेडिसीनांत उजवाडाक आयिल्ल्या एका अभ्यासा प्रमाण डिमेंशिया आशिल्ल्या लोकांक दीर्घकालीन दुयेंसां जावपाची चड शक्यताय आसता. पेन स्टेट युनिव्हर्सिटीच्या संशोधकांनी 3,700 लोकांच्या डाटाचें विश्लेशण करून तांच्या न्हिदेची संवय आनी 10 वर्सांच्या अंतरान दोन पांवड्यार दीर्घकाळ भलायकी स्थितीचो अभ्यास केलो. संशोधन पंगडान चार वेगवेगळ्यो न्हिदेच्यो पध्दती वळखल्यो तातूंत बरी न्हीद घेवपी, वीकेंड स्लीपर, निद्रानाश आनी नॅपर्स हांचो आस्पाव आशिल्लो.
सात वरां विसव घेवपाची शिफारस
सेंटर फॉर डिसीज कंट्रोल अँड प्रिवेंशन (CDC) हांणी प्रौढांक रातीं उण्यांत उणें सात वरां विसव घेवपाची शिफारस केल्या, पूण जायत्या जाणांक इतली न्हीद येना अशेंय दिसून आयलां. संशोधनांत वांटेकार जाल्ल्या अर्द्या परस चड लोक निद्रानाश आनी नॅपर्स अशें वळखलें. न्हिदेच्यो ह्यो दोनूय पद्दती बऱ्यो माननात. 10 वर्सां निद्रानाशाचो त्रास आशिल्ल्या लोकांक काळजाचे दुयेंस, गोडेंमूत, उदासीनताय आनी शारिरीक दुबळेपण ह्यो जायत्यो कागाळी आशिल्ल्यो. जाल्यार दिसांतल्यान वारंवार न्हीद घेवपी लोकांक गोडेंमूत, कॅन्सर आनी अशक्तपणाचो धोको वाडिल्ल्याचे ह्या संशोधनांत दिसून आयला.
न्हिदेची भलायकी जिणे पद्दतीचेर आदारून
उणें शिक्षण आशिल्ल्या आनी बेकार लोकांक तशेंच जाण्टे, प्रौढ आनी निवृत्त जाल्ल्या लोकांक न्हीद येवपाची चड शक्यताय आसता अशें संशोधकांनी सांगलें. संशोधनाची मुखेली सुमी ली म्हणटा, आमची न्हिदेची संवय बदलप खूब गरजेचें आसा कारण न्हिदेची योग्य भलायकी पुराय जिणे पध्दतीचेर आदारून आसता. हें खातीर लोकांक न्हिदेचें म्हत्व आनी न्हीद नाशिल्ल्यान जावपी परिणामांची जाणविकाय करुन दिवप गरजेचें आसा. रातची बरी न्हीद घेवपा खातीर न्हिदे पयलीं मोबायल वापरप ना, दिसपट्टो व्यायाम करप, सांजवेळार कॅफीनाचे सेवन करप ना अशो पद्दती गरजेच्यो आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
