भांगरभूंय | प्रतिनिधी
नवे शिक्षण प्रणालींत फावंडेशन वन लागू करूंक म्हयनो मायज वेळ आसा. ह्या काळांत खुबशे प्रस्न कशें सुटावे करतले, हाची जाप सरकाराक सोदची पडटली. बालवाड्यांचे प्रस्न, शिक्षण शिकयतना फकत खेळ आनी काणयो, तशेंच प्रात्यक्षिकांच आसतलीं कांय, तोंड वळख म्हूण अ आ ई, एबीसीडी, 1- 2- 3 बरोवपाक सांगतले, हे सगले प्रस्न सोडोवंक जाय.
फावंडेशन वन लागू करतना बालवाड्यांचो प्रस्न पयलीं सोडोवचो पडटलो. कारण, हालीं बालवाडी म्हणल्यार शिशूवर्ग- कम- सोसायटी जाल्या. शिक्षण खात्याक ही गजाल खबर आसा काय ना, हो प्रस्नूय हांगां येताच. चडश्यो बालवाड्यो भाड्याच्या घरांनी. सुवात ल्हान, तातूंतच भुरग्यांक रांदून कितें ना कितें दिवपाची वेवस्था. ल्हान भुरग्यांक कड्डण, गॉड, तेल अशें कितें ना कितें दिवपूय थंयच चलता. ह्यो गजाली दिवपाक चडश्या बालवाडींनी गुदांव नासता. सगळे साक, डबे थंयच मांडून दवरल्यात. हे परिस्थितींतच बालवाडीची बाई भुरग्यांक शिकयता. थंय सोसायटी दिल्ले भशेन पालकांक कड्डण- बाकीच्यो गजाली दितात. तातूंतच तांकां जनगणना, पोलियो जागृती असलीं कामां आसताच. हे सगळे फाटभुंयेर ती बाई नव्या शिक्षण प्रणाली कडेन कशी जुळोवन घेतली? बाईन जुळोवन घेतलें जाल्यार बालवाडींत नाचून शिकोवंक, भुरग्यांक नाचूंक तितली सुवात तरी आसा काय? हे सगले प्रस्न पयलीं जाग्यार घालपाची गरज आसा.
नवे शिक्षण प्रणालीक लागू करतना ‘फावंडेशन वनां’त कशे शिकयतले हे विशीं शिक्षण तज्ञ स्पश्टताय दाखयतात ही बरी गजाल. मात, आदी शिकयताली ती पद्दत अशास्त्रीय कशें म्हणूं येता? नवे शिक्षण प्रणालीचो रोड मॅप तयार करपी समितीचे मुखेली प्रा. अनिल सामंत म्हण्टात, ‘आतां मेरेन मुळावे शिक्षण अशास्त्रीय पद्दतीन जातालें. बरोवप, वाचप, शिकप इतलेंच जातालें.’ अशें म्हणल्यार भुरग्यांक मना सावन, वेगवेगळ्या पद्दतींचो अवलंब करून शिकोवपी शिक्षकां कडेन आडनदर केल्ले वरी जायनां. शिक्षणीक मळार पावल दवरतनाच भुरग्यांक मुळाक्षरांची, आंकड्यांची वळख ही जावपाकूच जाय. ती हातान बरोवंक जाय. पुस्तकांचेर वा पाटयेचेर श्रीगणेशा बरोवन सुरवात जावंक जाय. हें सगळें नासतलें काय आसतलें? नांवांक तरी पुस्तकां आसचीं, मुळाक्षरां, गणितां शिकोवचीं. मागीर नाटकां, नाच, काणयो, खेळ शिकोवचें, खुपश्यां पालकांक अशेंच दिसता.
नर्सरी, केजी 1, केजी 2, पयली- दुसरी, तशेंच शिशुवर्ग- बालवर्ग, बालवाडीच्या भुरग्यांक नेमकें कितें शिकयतले ताचो निश्चीत रोडमॅप हो जायच. आनी तो शिक्षणीक संस्थांक दितनाच प्रत्येक पालका मेरेनूय पावोवपाची वेवस्था जावंक जाय. शाळेंत पुस्तकां-पाटी वापरचेच ना जाल्यार, पालकांनी ती घरां स्वता जावन वापरची, अशें तरी सांगचें. हरशीय आतांचो पालक शिक्षणीक मळा वेले सर्तीक लागून भुरग्यां खातीर धांवपळ करताच. हाका लागूनूय करतले.
नवी शिक्षण प्रणाली बरी आसतलीच. ताचो परिणाम येता त्या काळांत दिसतलोच. तशेंच कांय वर्सांनी हेवूय शिक्षण संवकळीचें जातलें. ‘फावंडेशन वन’ शिक्षणाची बुन्याद घालतना डीएड शिक्षणाक तिलांजली दिल्या, तीय बरी गजाल. शिक्षकांनी ग्रॅज्युएट जावनूच शिक्षकी पेशाचे शिक्षण घेवपाक जाय, अशें केल्यार कांय प्रमाणांत मॅच्युरिटी म्हणल्यार समजिकाय येतली. खुबश्या शिक्षकांक आतां फिटनॅसा कडेनूय लक्ष दिवचें पडटलें. नाच, व्यायाम शिकयतले जाल्यार आपूणूय तितलेच घटमूट आसचे पडले. सध्या शिक्षकांक मास्टर्स ट्रेनिंग दिवप चल्लां. तातूंत भुरग्यांक आधुनिक, खरें म्हणल्यार योग्य पद्दतीन कशें शिकोवप हें शिकयतात. पयलींच्या तेंपा वेले मुळावे शाळेचे शिक्षक अशेच पद्दतीन शिकयताले. भुरग्यां खातीर वर्गांत आपूण जावन सर्ती दवरताले, स्वताच्या बॉल्सांतले पयशें मोडून इनामां दिताले. मागीरच्या काळांत शिक्षकी पेशो हो भरपूर पगाराची नोकरी म्हूण फुडें आयलो आनी थंय शिक्षकी पेशांत येवंक सायन्स, कॉमर्स आनी बाकीच्या शिक्षणीक मळा वेल्यान डीएड, बीएडाक एंट्री जावंक लागली, आनी अशें शिक्षकूय शाळांनी पावले. हायस्कूल- कॉलेजींनी गॅदरिंगान केन्नाच वाटो घेवंक नाशिल्ले कितलेशेच जाण शिक्षक जाले. गरजेक म्हूण गॅदरिंगाक जमता तशें बसोवंक लागले. आतां मास्टर्स ट्रेनिंगांतल्यान निदान शिक्षकाक नेमकें कितें शिकोवपाक जाय तें तरी कळटलें. नाट्यमय पद्दतीन काणी सांगप, कविता शिकयतना ताचो अर्थ भुरग्यांक कळपाक नाच शिकोवप, वातावरण निर्मिती करप हें शिक्षण शिक्षकांनी घेवप खुबूच गरजेचें. शिक्षण खात्यान शिक्षकां खातीर अशा शिक्षणाची वेवस्था करून खुबूच बरें काम केलां.
नवे शिक्षण प्रणाली खातीर शिक्षणीक संस्थांनी तांचे कडच्यान तयारी दवरल्याच. ते खातीर नेमक्यो कितें साधनसुविधा लागतल्यो हाची मात स्पश्टता जावपाक जाय. पालकांचेंय प्रबोधन जावपाची गरज आसा. भुरग्यां खातीर कितें बरे, कितें वायट हे तांकांय समजुपाक जाय. नव्या शिक्षण प्रणालींत खेळांतल्यान, नाचांतल्यान वेगवेगळ्या पद्दतीन शिकयतना भुरग्यांची कूड हे पद्दतीक सपोर्ट करपाक जाय, ते खातीर तांचो आहार निश्चीत करपाची गरज आसा. माध्यान्न आहार पयली सावन सुरू जाता. पयले- दुसरेच्या भुरग्यांक सरकार धायेक रुपया प्रत्येकी प्रमाण माध्यान्न आहाराक दिता. आयच्या म्हारगायेच्या काळांत धा रुपयान कांय येना. तेन्ना सरकारान धा रुपया आनी पालकांनी धा रुपया अशें 20 रुपया करून बऱ्या माध्यान्न आहाराची येवजण चालीक लावं येता जाल्यार पळोवचें. नाय जाल्यार चडशे पालक एकादी चिकन तंदुरी, फ्रायड रायस, चिली, आयस्क्रिमाच्या नांवांन भुरग्याचेर पाचशें ते हजारभर रुपया म्हयन्याक सहज मोडटा. सरकारान माध्यान्न आहाराच्या पयश्यांचे बाबतींत कितें बदल करूं येता जाल्यार पळोवचें.
अमर पाटील
75074 95151
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
