भांगरभूंय | प्रतिनिधी
नवी शिक्षण प्रणाली 3 जुलयाच्यान सुरू जाता. सुरवेक फावंडेशन वन म्हणल्यार बुन्यादीचो पावंडो. मात तो सुरू करतनाच सगळो घुस्पागोंदळ आसा. नेमकें कितें करतले हें स्पश्ट ना. नवे शिक्षण प्रणाली खातीर फाटल्या शिक्षणीक वर्सा म्हणल्यार डिसेंबर- जानेरा सावन शिक्षकांक प्रशिक्षण दिवंक सुरवात जाल्ली. आतांय चालू आसा. मात, शिक्षण सचिवाची पत्रकार परिशद पळयल्यार तो शिक्षकां विशी सातिस्वेत दिसना. दुसरे वटेन भुरग्यांक नेमकें कितें आनी कशें शिकयतले हो प्रस्न आसाच.
फावंडेशन वनांत नर्सरी, केजी 1, केजी 2, तशेंच पयलेक वचपाची पिराय जायसर बालवाडी, पयली आनी दुसरेचो आसपाव आसा. फावंडेशन टू, थ्री, फोरची आमी हांगां विस्कटावणी करूया नाका. शिक्षण सचिवानूय तेंच स्पश्ट केलें. आपूण फावंडेशन वना विशीं सांगूक आयलां, तितलेंच सांगतलो, म्हणल्यार फुडलो अजून प्लान जाल्लो ना!! तेन्ना आमीय हांगां शिता फुडें मीठ खायनासतना फावंडेशन वनाचेरूच चर्चा करूया.
फावंडेशन वनाक आतां प्री प्रायमरी स्टेज म्हूण पळयतले. चडश्या हायस्कुलांनी केजी- केजी टू जुलयांत सुरू जाता, हें मतींत धरून जुलयांत फावंडेशन वनाची सुरवात अशें शिक्षण संचालकान स्पश्ट केलां. काय स्कुलां जुनांतूच सुरू करतात. जून हो फावंडेशन वनाची तयारी करपाक म्हूण शिक्षण खात्यान स्पश्ट केलां. केजी, बालवाडी पावंड्यार पुस्तकां आसचीं नात, परिक्षा आसची ना. हरशीय ती तशीं नासताच. कांय हायस्कुलां भुरगीं बरीं शिकचीं म्हूण आपल्या पावंड्यार वेगवेगळे पद्दतीन परिक्षा घेतात. तांकां आतां तशी घेवपाक मेळटली काय, हो एक प्रस्न हांगां उरताच. पयले-दुसरेक टॅक्स्ट बुकां आसतालीं. तीं अंदूंय आसतलीं. ताका सध्या तरी हात लावचें नात. मात, फावंडेशन वना प्रमाण चड करून फुडल्या शिक्षणीक वर्सां सावन तांकांय पुस्तकां आसचीं नात. प्ले मॅथडान शिकयतले. 5 वर्सां उपरांत कामगिरीचो नियाळ घेतले, अशी ही वेवस्था.
आतां पाच वर्सांन नियाळ घेवप म्हणल्यारूय किचकटीचें काम. सगळ्या शाळेंनी बालवाडी आसताच अशीं ना. बालवाडी वेगळी, शाळा वेगळी, अशी चडशे कडेन वेवस्था आसा. मागीर बालवाडीतल्या भुरग्यांचो नियाळ तांच्या शिक्षकांनी घेवचो पडटलो, रेकॉर्ड दवरून मागीर भुरगी जंय शिकपाक वतलीं तांकां दिवचो पडटलो, अशें करपाचें थारायलां काय कितें? होवूय हांगां प्रस्न आसा. चडशे कडेन नर्सरी, केजी वन, केजी टू आसा, प्रायमरी ना. तेन्ना तांकांय हें दिव्य करचें पडटलें काय?
पुस्तकां नासतना खेळीमेळीच्या वातावरणांत शिकयतले म्हणल्यार प्ले मॅथड वापरून शिकयतले, तेन्ना मुळावे शिक्षण कोण शिकयतलो, पालक? हरशीय शिक्षणीक मळार सर्तींक लागून पालकांक कामधंदो, आवड- निवड सोडून भुरग्यांच्या फाटल्यान धांवचें पाडटा, आतां आनीक कितलें धांवचें पडटले? फावंडेशन वनांत कोणाची कितें जबाबदारी आसतली हें शिक्षणीक वर्स सुरू जावचें पयलींच स्पश्ट केल्यार पालकांक थाकाय
मेळटली.
शिक्षकांक सुपर शिक्षक करून शिकयतले ही गजाल बरी आसा. हरशींय म्हूण शिक्षक अर्दोच दीस शिकयता, अशी फकांडां जायतेजाण उडयतात. तशें पळोवंक गेल्यार शिक्षकांचेरूय जायती जबाबदारी आसता. आतां ते सुपर शिक्षक जातकीच फकांडां मारपी घटक तांचे कडेन आदराचे नदरेन तरी पळयतलो, अशी अपेक्षा करूं येता. शिक्षकां भशेन शिक्षणीक क्षेत्रांत पावल दवरतनाच भुरग्यांक ‘सुपर किड’ करपाचो यत्न चल्ला हें मात विचित्र दिसता. पयलीं तांकां मुळावे शिक्षण सारखें मेळपाक जाय, मागीर कला- संस्कृती, नाच, चित्रकला आनी बाकीच्यो कला शिकोवंक जाय. हांगां भुरग्यांक क्लासींत पावल दवरताच ‘सुपर किड’ करपाचो यत्न जातलो काय कितें असो प्रस्न पडटा.
नवे शिक्षण प्रणालीच्या निमतान प्ले मॅथडान शिकोवंक लागपी वस्तू घेवपाक पयशें लागतलेच, तो खर्च खंयच्यान ना खंयच्यान तरी उखलतलेच. मात, त्यो वस्तू शाळेंनी वेळार पावत काय होवूय एक प्रस्न आसा. कित्याक तर युनिफॉर्म आनी रेनकोट शिक्षणीक वर्स सोंपत आयलें तरी पावनात, अशी परिस्थिती. तेन्ना ह्यो वस्तू वेळार पावत काय?
चडश्या स्कुलांनी भुरग्यांचो फुडार अधांतरी हुमकळपाक लागला. स वर्सांचेर भुरगो पयलेक पावंक जाय, अशी ही नवी प्रणाली सांगता. केजी- 2 क आशिल्लीं भुरगीं पास जातलीं तेन्ना 5 वर्सा 8 म्हयने ते 11 म्हयने अशे पिरायेचीं जातलीं. तेन्ना तांकां पयलेक प्रवेश दितले काय, केजी- 2 क दवरतले? बालवाडेक आशिल्ल्यांक पानां लागतलीं, हातूंत दुबाव ना. सरकारान हेंवूय स्पश्ट करूंक जाय. अंदूं नर्सरीक प्रवेश करपी 3 वर्सांचोच आसतलो हाची सगळ्या शिक्षणीक संस्थांनी खात्री करून घेवपाक जाय. तशें स्पश्ट निर्देश शिक्षण खात्यान दिवंक जाय.
फावंडेशन वन मॅथडी विशीं सरकारान स्पश्टीकरण दिल्यारूच नेमकें कितें जातलें तें कळटलें. सध्या सरकारूच प्रा. अनिल सामंत आनी वांगड्यांचे समितीच्या रिपोर्टाक रावला. फुडें कशें कितें वचपाचें हें तांच्या अभ्यासाचेर, तांच्या सुचोवणेचेर निंबून आसतलें.नवी शिक्षण प्रणाली लागू जातली तातूंत कांय प्रमाणांत चुको आसतल्यो. खंयचीय नवीन गजाल करता तेन्ना एखादी चूक ही उरताच, शिक्षण सचिवान आदींच स्पश्ट केलां. तेन्ना कितेंय चूकमूक जाल्यार पालकांनी सांबाळून घेवची, ही तातूंत लिपिल्ली अपेक्षा.
अमर पाटील
75074 95151
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
