भांगरभूंय | प्रतिनिधी
पणजी : आदले मुख्यमंत्री आनी आदले संरक्षण मंत्री, सर्गेस्त मनोहर पर्रीकार हांच्या नांवान आतां दिवचल म्हालांतल्या कुडणें-फाळवाडो हांगच्या सरकारी मुळावे शाळेख वळखतले. हे शाळेचो नामकरण सुवाळो बुधवार, ता. १ ऑक्टोबर २०२५ दिसा मुख्यमंत्री डॉ. प्रमोद सावंत हांचे हस्तुकीं जातलो. हे कार्यावळीचें आयोजन कुडणें ग्रामपंचायत आनी गोंय सरकाराच्या शिक्षण संचालनालयान केलां.
फळवाडी हांगच्या सरकारी मुळावे शाळेच्या आंगणांत ही कार्यावळ बुधवारा सांजेवेळार ७ वरांचेर आयोजीत केल्या. मुख्यमंत्री डॉ. प्रमोद सावंत हे कार्यावळीचे मुखेल सोयरे आसतले. शिक्षण संचालक शैलेश झिंगडे हे मानाचे सोयरे म्हणून हाजीर रावतले. तशेंच, शिक्षण संचालनालयाचे ए.ए.ओ. आनी कुडणें पंचायतीचे स्वयंपूर्ण मित्र दीपक गांवकार हे विशेश निमंत्रित म्हणून हजर रावतले.
हे म्हत्वाचे कार्यावळीक दिवचले साहाय्यक जिल्लो शिक्षणीक निरीक्षक लीना कळंगुटकार, कुडणेंचे सरपंच बाळबा मलिक, उपसरपंच दीपिका नायक, पंच वांगडी आनी हेर मानेस्त हाजीर आसतले. ह्या सुवाळ्याक ग्रामस्थांनी आनी शिक्षकांनी व्हडा संख्येन हाजीर रावपाचो उलो आयोजकांनी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
