फाल्यां सावन रो- रो फेरीबोटी सेवेक

भांगरभूंय | प्रतिनिधी

मंत्री सुभाष फळदेसाय : रायबंदर – चोडण मार्गार दोन बोटी

भांगरभूंय । प्रतिनिधी

पणजी : रायबंदर – चोडण मार्गार रो- रो फेरीबोटी खातीर एदकांचो उक्तावणा खातीर म्हूर्त मेळ्ळो. सोमारा 14 जुलयाक हे रो- रो फेरीबोट सेवेचें उक्तावण जावन प्रवाशां खातीर सेवेक उपलब्ध जातली. एक फेरीबोटींत 15 मोटारी, 40 दुचाकी आनी 100 प्रवाशी एके खेपेक व्हरपाची तांक आसा. जाल्यार वाट पळोवपाचो वेळ 12 मिण्टां इतलो आसा, अशें न्हय येरादारी मंत्री सुभाष फळदेसाय हांणी सांगलें.

रायबंदर – चोडण मार्गार दोन रो- रो फेरी दाखल जाल्यात. कितलेशेच दीस जाले ताच्यो चांचण्यो सुरू आशिल्ल्यो. शेनवारा हे फेरीबोटीची निमाणी चांचणी जाली. ह्या वेळार मंत्री सुभाष फळदेसाय, न्हंय येरादारी खात्याचे संचालक विक्रमसिंह राजभोसले आनी ही फेरीबोट बांदपी विजय मरीन सर्विसचे अधिकारी हजर आशिल्ले.

फळदेसाय हांणी सांगलें, 14 जुलयक रो- रो फेरीबोट सेवेचें उक्तावण जावन रायबंदर – चोडण मार्गार द्वारका आनी गंगोत्री ह्यो दोन रो- रो फेरीबोटी धांवतल्यो. दोन फेरीबोटींची तांक चार साधारण फेरीबोटी इतली आसा. ही फेरीबोट रायबंदर ते चोडण हें अंतर सात ते आठ मिण्टां भितर पुराय करतली. देखून फेरीबोटीची वाट पळोवपाचो आनी तातूंत प्रवास करपाचो वेळ 12 मिण्टां परस चड आसचो ना, अशें फळदेसाय हांणी सांगलें.

मोटारी आनी स्कुटरीं खातीर फेरीबोटींत सुवातो आंखून दवरल्यात. फेरीबोटीच्या दोनूय वटांनी मोटारी उव्यो करतले जाल्यार मदीं स्कुटरी उब्यो जातल्यो. ह्यो सगळ्यो गाडयो एके वटेन भितर सरून दुसरे वटेन एकाच वांगडा भायर सरतल्यो. अपघाताची शक्यताय भायर मारून, सुरक्षीत प्रवासा वांगडा धक्याचेर कोफुसांव जाय नासतना गाडयो सरळ भायर सरतल्यो, अशें फळदेसाय हांणी म्हणलें.

जेन्ना आमी अत्याधुनीक फेरीबोट घालपाक वतात तेन्ना न्हंय येरादारी खात्याचो महसूल चड नाशिल्ल्यान वित्त खात्या कडल्यान आडखळी तयार जातात. देखून सुरवेक आमी प्रवाशांक आनी उपरांत दुचाकींक शुल्क लावपाचो विचार केल्लो. पूण आमी प्रवाशांक आनी दुचाकींक फुकट प्रवास दवरून मोटारीं खातीर 600 रुपयांचो म्हयन्याचो पास दिवपाचो थारयलां. पास ना जाल्यार मोटारींक दर दिसा 30 रुपया भरचे पडटले. उपरांत ह्या दराचेर एका म्हयन्या उपरांत नियाळ घेतले, अशी म्हायती फळदेसाय हांणी दिली.

जे दुचाकी घेवन प्रवास करपी लोकांनी पांच रुपया शुल्क लावपाचेर विचार करचो जे वरवीं कांय येणावळ तयार जावन आमी बरी सेवा दिवापाचेर भर दितले. जर दर दुचाकी फाटल्यान आमी पांच रुपया लायले जाल्यार वर्साक आमकां चार फेरीबोटी घेवप शक्य जातलें. सगल्या मार्गांतल्यान खात्याक 60 लाख रुपयांची वर्सुकी येणावळ येता आनी आमचो खर्च 70 कोटी इतलो आसा. अर्थीक दिश्टीन हो आंकडो कसोच जुळना, अशी खंत फळदेसाय हांणी उक्तायली.

हेर मार्गार येतल्यो रो- रो

रो- रो फेरीबोटीची मागणी करपी पत्र दिवाडी आनी बेती पंचायतीन न्हंय येरादारी खात्याक बरयलां. प्रवाशांक तिकेट लावपाक आमकां कसलीच हरकत ना, पूण सुरक्षा आनी सुविधा आशिल्ली रो- रो फेरीबोट आमकां जाय, अशें पंचायतीन सांगलां. जर ही फेरीबोट सेवा येसस्वी जाली जाल्यार म्हयन्या भितर आमी हाचो नियाळ घेवन दुसऱ्या मार्गार घालपाचो विचार करतले, अशे मंत्री सुभाष फळेदसाय हांणी सांगलें.

फेरी बिल्ट अ‍ॅण्ड ऑपरेट तत्वाचेर

ही फेरीबोट बांदपा खातीर सरकारान एकूय रुपया खर्च करूंक ना. ह्यो फेरीबोटी बिल्ट अ‍ॅण्ड ऑपरेट तत्वाचेर कार्यरत जातल्यो. विजय मरीन सर्विसेस हांणी ही फेरीबोट बांदल्या आनी तेच ह्यो फेरीबोटी चलयतले. ह्या मार्गार जो स फेरीबोटी चलोवपाचो खर्च येतालो तितलोच खर्च आमी विजय मरिनाक दितले. फेरीबोटीचें वेवस्थापन आनी देखरेख विजय मरीन करतले. विजय मरीन ही गोंयची कंपनी आनी ह्यो फेरीबोटी मेड इन गोवा आसा, अशें फळदेसाय हांणी म्हणलें.

स्कूल बशींक सवलत दिवपाचो विचार

शाळेच्या भुरग्यांक व्हरपी बशी वा व्हॅन हांचे खातीर शुल्कांत सवलत दिवपाचो विचार आमी करतले. आमी सरकारा वांगडा बसून हे विशींचो नियाळ घेतले. संबंदीत शाळा वा म्हाविद्यालयांनी तांकां प्रमाणपत्र दिलें जाल्यार ताचेर सवलत दिवन विद्यार्थ्यां खातीर फेरीबोटीचो दर उणो करतले, अशी म्हायती फळदेसाय हांणी दिली.