भांगरभूंय | प्रतिनिधी
मडगांव: पाजीफोंड, मडगांवां जुन्ता क्वॉटर्स वाठारांतल्या श्रीघुमटेश्वर ब्रह्मदेव देवस्थानांत 16 आनी 17 डिसेंबराक 19 वो वर्धापन दीस मनयतले. ते निमतान विवीध धर्मीक आनी सांस्कृतीक कार्यावळी आयोजीत केल्यात.
शेनवारा 16 डिसेंबर दिसा सकाळीं 8 वरांचेर शुद्धी होम, श्रींची विधीवत पुजा, महाअभिषेक आनी हेर धर्मीक कार्यावळी जातल्यो.
सकाळीं 9 वरांचेर भौशीक श्रीसत्यनारायण महापुजा, पुराण उपरांत महाआरती आनी प्रसाद जातलो. दनपारां 1 ते 3 मेरेन श्रींचो महाप्रसाद जातलो. सांजवेळा 4 ते 5.30 मेरेन भजनाची कार्यावळ जातली. सांजवेळा 5.30 वरांचेर शालेय विद्यार्थ्यां खातीर वेशभुशा सर्त (पाजीफोंड प्रभाग मर्यादीत) जातली. गट एक- केजी 1-2, गट दोन- पयली ते दुसरी, गट तीन- तिसरी ते चौथी, गट चार- पांचवी ते सातवी, गट पांच- आठवी ते धावी ह्या गटां खातीर सर्त जातली.
रातच्या 7 वरांचेर काराओके गायन सर्त (पाजीफोंड प्रभाग मर्यादीत) जातली. रातच्या 8 वरांचेर शालेय विद्यार्थ्यां खातीर रेकॉर्ड डान्स सर्त जातली. अदीक म्हायती खातीर आयोजकां कडेन संपर्क सादचो.
कार्यावळीक मुखेल सोयरे म्हूण मुख्यमंत्री डॉ. प्रमोद सावंत, मडगांवचे आमदार दिगंबर कामत, आदले आमदार तशेंच भाजपाचे प्रदेश सरचिटणीस दामू नायक, नगराध्यक्ष दामोदर शिरोडकार हाजीर रावतले.
आयतार 17 डिसेंबर दिसा सांजवेळा पाजीफोंडच्या होली क्रॉसा कुशीक लिटनी जातली. रातच्या 8 वरांचेर श्रींक अर्पण केल्ल्या फळांची पावणी जातली. उपरांत नाट्यप्रयोग जातलो. अदीक म्हायती खातीर 9420978577 ह्या क्रमांकाचेर संपर्क सादपाचें आवाहन आयोजकांनी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
