फाल्यां रावण सत्तरींत ग्रामीण साहित्य संमेलन

भांगरभूंय | प्रतिनिधी

पणजीः साहित्य मंथन – सत्तरी आनी श्रीसांतेरी केळबाय देवस्थान समिती वतीन रावण सत्तरी हांगा 29 आनी 30 मार्चाक चवथ्या ग्रामीण साहित्य संमेलनाचे आयोजन केलां. श्रीसांतेरी केळबाय देवस्थान सभाघरांत आयोजीत केल्ल्या दोन दिसांच्या संमेलनांत तरेकवार चर्चासत्रांचे आयोजन केलां. राज्यभरांतले साहित्यीक, कलाकार हांतून वांटो घेतले.

शेनवारा 29 तारखेक सांजे 3.30 वरांचेर जावपी उक्तावण सुवाळ्याक गोंय रान उदरगत म्हामंडळाची अध्यक्ष तशेंच पर्यें मतदार संघाच्यो आमदार डॉ देविया राणे हांचे हस्तुकीं संमेलनाचें उक्तावण जातलें. ह्या वेळार अध्यक्ष म्हूण ज्ञानपीठ पुरस्कार जैतिवंत लेखक दामोदर मावजो, मुखेल सोयरे म्हूण, केंद्रीय साहित्य अकादेमी पुरस्कार जैतिवंत लेखक डॉ. प्रविण बांदेकार, संमेलनाध्यक्ष म्हूण लोकवेद संशोधक कमलाकर म्हाळशी, केरी जिल्हो पंचायत वांगडी सौ. देवयानी गांवस, केरीच्यो सरंपच सुप्रिया गांवस, रावणच्यो पंच वांगडी नंदिता गांवस, देवस्थानचे अध्यक्ष तशेंच संमेलनाचे येवकार अध्यक्ष सत्यवान गांवस, साहित्य मंथन सत्तरीचे अध्यक्ष काशिनाथ नायक आनी चवथ्या ग्रामीण साहित्य संमेलनाचे कार्याध्यक्ष गणेश शेटकार हजर रावतले.

ग्रामीण साहित्य संमेलनांत सर्गेस्त लक्ष्मी विष्णू गांवस हांच्या स्मरणार्थ पयलो ग्रामभूशण पुरस्कार भेटयतले. लोकवेद अभ्यासक गोपीनाथ गांवस हांणी हो पुरस्कार पुरस्कृत केला. ग्रामीण जीवन, लोकसंस्कृतायचें चित्रण आशिल्ले खासा यादस्तिकेचें ह्या वेळार विमोचन जातलें. उक्तावण सुवाळ्या उपरांत जावपी सांस्कृतीक कार्यावळींत थळावे आनी आमंत्रीत कलाकार लोककलांचे सादरीकरण करतले.

दुसऱ्या दिसा आयतार 30वेर दनपरां 2.30 वरांचेर ग्रामीण साहित्य संमेलनाचो समारोप सुवाळो जातलो. ज्येश्ठ लेखक मोहन कुंभार ह्या सुवाळ्याक मुखेल सोयरे म्हूण हजर रावतले. गोंय विद्यापिठाचे कुलसचीव प्रो. सुंदर धुरी अध्यक्ष म्हूण हजर रावतले.

ह्या संमेलनात आयोजीत केल्ल्या चर्चासत्रांत आमच्या गावाची अर्थव्यवस्था – तेन्ना आनी आतां, कवी संमेलन, म्हाका मात्सा बोलांक जायां- ग्रामीण बायलेची अभिव्यक्ती, आमचो गांव आमचें साहित्य – लेखकाची जबाबदारी अशी विंगड विंगड चर्चासत्रां जातलीं. राज्यभरांतले लेखक, साहित्यीक, कलाकार आनी विद्यार्थी या संमेलनांत वांटो घेतले. संमेलनाचो एक वांटो म्हूण दुसऱ्या दिसा सकाळीं रावण गांवच्या भोंवडेचे आयोजन केलां. पुस्तक प्रदर्शन, ग्रामीण जिणेचेर आदारीत फोटू प्रदर्शन, तरेकवार स्टॉल्स संमलनाचें आकर्शण थारतलें.

दोन दिसांच्या ग्रामीण साहित्य संमेलनांत व्हड संख्येन वांटेकार जावचे असो उलो साहित्य मंथन – सत्तरीचे अध्यक्ष काशिनाथ नायक, कार्याध्यक्ष गणेश शेटकार आनी देवस्थान समितीचे अध्यक्ष तशेंच येवकार अध्यक्ष सत्यवान गांवस हांणी मारला.