भांगरभूंय | प्रतिनिधी
मयें पंचायतींतल्यो सरकारी मुळाव्यो शाळा जातल्यो वांटेकार
दिवचल: मयेंचे आमदार आनी गोंय राज्य फलोत्पादन म्हामंडळाचे अध्यक्ष प्रमेंद्र शेट हांचे वतीन, 22 डिसेंबराक सकाळीं 9 वरांचेर आदले सभापती तशेंच तांचे भाव सर्गेस्त अनंत शेट हांचे यादीक मयें ग्रामपंचायत वाठारांतल्या सगल्या मुळाव्या शाळांतल्या विद्यार्थ्यां खातीर बाल खेळां मेळावो आयोजीत केला. हो खेळां मेळावो कुमारवाडो मयें मैदानार जातलो, अशी म्हायती मयें पंचायत वाठारांतल्या सगल्या मुळाव्या शाळांच्या पालक शिक्षक संघाच्या अध्यक्षांनी दिली.
ह्या खेळां मेळाव्यांत मयें गांवांतले भावकय, हातुर्ली, केळबायवाडो, गांवकारवाडो, पैरा, सिकेरी आनी हळदणवाडी ह्या वाठारांतल्या सरकारी मुळाव्या शाळांतले विद्यार्थी वांटेकार जातले. सकाळीं 9 वरांचेर खेळां मेळाव्याचें उक्तावण जातलें. ह्या सुवाळ्याक शिक्षण संचालनालयाचे उपसंचालक मनोज सावयकार, आमदार प्रमेंद्र शेट आनी हेर मानेस्त हाजीर रावतले. अशें हळदणवाडी मयेंच्या सरकारी मुळावे शाळेचे पालक शिक्षक संघाचे अध्यक्ष कृष्णा चोडणकार हांणी सांगलें.
ह्या शाळांतल्या विद्यार्थ्यांक एकठांय हाडून तांचे मदीं स्पर्धात्मक खेळांचें प्रदर्शन जातलें. ताका लागून भुरग्यांच्या खेळां कुशळटायेंत गुणात्मक वाड जातली. तशेंच थळाव्या पांवड्यार सरकारी मुळाव्या शाळांनी विद्यार्थ्यांक दर्जेदार सोयी आनी अशे तरेच्या खेळां मेळाव्यांचो अणभव मेळचो हे नदरेन ह्या खेळां मेळाव्याचें आयोजन केलां अशेंय कृष्णा चोडणकार हांणी सांगलें.
थळाव्या सरकारी मुळाव्या शाळांचें अस्तित्व तिगोवन दवरप ही आपलीच जापसालदारकी आसा. पालकांनी ते खातीर स्वता फुडाकार घेवप गरजेचें आसा. आपल्या भुरग्यांक आवय भाशेंतल्यान शिक्षण दितना आपले संस्कृती कडेन तांची नाळ जोडप आयच्या काळांत गरजेची जाल्या. ह्या कामांत सरकारी मुळाव्यो शाळा बरी भुमिका वठयतात. त्याच शाळांतल्या भुरग्यां मदीं खेळां कुशळटायेक उर्बा दिवपा खातीर आमदार प्रेमेंद्र शेट हांणी फुडाकार घेतला अशेंय ह्या वेळार सांगलें.
ह्या वेळार सरकारी मुळावी शाळा भावकयचे पालक शिक्षक संघाचे अध्यक्ष अरविंद गोलतकार, वांगडी आश्विनी कवठणकार, वैष्णवी होबळे, हातुर्ली शाळेचे पालक शिक्षक संघाचे अध्यक्ष विशांत नागवेंकार, केळबायवाडा शाळेचे पालक शिक्षक संघ अध्यक्ष गौरव गोसावी, पैरा शाळेच्या पालक शिक्षक संघाच्यो अध्यक्षा निलम पेडणेंकार हांची हाजेरी आशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
