भांगरभूंय | प्रतिनिधी
मडगांवः कला, संस्कृती, साहित्य, शिक्षण ह्या मळार फाटलीं 46 वर्सां वावुरपी मडगावंची गोमन्त कला असोसिएशन ही संस्था दर वर्सा साहित्य अकादेमी पुरस्कार जैतिवंत जाल्ल्या कोंकणी लेखकाचो सत्कार करता. हीच परंपरा मुखार व्हरतना फाल्यां आयतारा 26 जानेवारी दिसा मडगांवच्या रवींद्र भवनांत अंदूंचे साहित्य अकादेमी पुरस्कार जैतिवंत कोंकणी लेखक तशेंच अनुवादक, कोशकार, नाटककार मुकेश थळी हांचो सत्कार जातलो.
थळी हांच्या ‘रंगतरंग’ ह्या पुस्तकाक हो पुरस्कार फावो जाला. हो पुरस्कार तांकां 8 मार्चाक नवी दिल्लींत जावपी साहित्य अकादेमीच्या तीन दिसांच्या सुवाळ्यांत भेटयतले. गोमंत कला असोसिएशनाची कार्यावळ फाल्यां सांजे 5 वरांचेर जातली.
ताचे आदीं असोसिएशनान अखील गोंय आंतर उच्च माध्यमीक आनी म्हाविद्यालयीन विद्यार्थ्यां खातीर कोंकणी कविता लेखन आनी सादरीकरण सर्त आयोजीत केल्या. ही सर्त सांजे तीन वरांचेर सुरू जातली. तरणाट्यां मदल्या सृजनशील कलागुणांक उर्बा दिवपा हेतान हो उपक्रम आंखला अशी म्हायती संस्थेचे सचीव मंगेश बोरकार हांणी दिली.
सत्कार आनी सर्तीच्या इनामां वांटप सुवाळ्याक ज्येश्ठ साहित्यीक आनी साहित्य पुरस्कार जैतिवंत नामनेचे लेखक दत्ता दामोदर नायक हे मुखेल सोयरे म्हूण हाजीर आसतले.
भोवआयामी आनी भोवभाशीक लेखक मुकेश थळी हांचीं आतां मेरेन सात पुस्तकां उजवाडा आयल्यांत. तांणी नाटकांय बरयल्यांत. कोश, अणकार ह्या मळारूय तांचो देखदिणो वावर आसा.
गोमंत कला असोसिएशन नेमान निबंद सर्ती, देशभक्ती गीत सर्ती, उलोवपांची सर्त घडोवन हाडटा. डिसेंबरांत संस्थेन गोमंत अभिनव संगीत महोत्सव घडोवन हाडिल्लो ताका बरो प्रतिसाद मेळ्ळो अशीय माहिती मंगेश बोरकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
