भांगरभूंय | प्रतिनिधी
पणजी : लोककवी मनोहरराय सरदेसाय आनी ज्ञानपीठ भोवमानीत साहित्यकार रवीन्द्र केळेकार हांचे जल्मशती महोत्सवा निमतान शर्व मिडिया निर्मीत आनी गोवा कोंकणी अकादेमी हांच्या जोडपालवान शेनवारा 22 मार्चाक कोंकणी गीत – संगिताची मैफल ‘गीतांजली’ सादर जातली. फोंडेंच्या राजीव गांधी कलामंदिराच्या दुसऱ्या माल्या वयल्या कॉन्फरन्स हॉलांत सांजेच्या 6 वरांचेर मैफलीक सुरवात जातली.
कार्यावळीची संकल्पना आनी संयोजन संगितकार आनी गायक अजय नायक हांची आसा. वाद्यवृंद संयोजन सुरेश घाडी हांचें आसा. अजय नायक, राजवी नायक, निलेश गावडे, सुरज सुतार, अक्षय नायक, राजेश देसाय, उमा नायक, उमा प्रभुगांवकार हे गायक – गायिका गितां सादर करतले. तांकां सुरेश घाडी (कीबोर्ड), शैलेश शिरोडकार (तबला), महादेव गावडे (ऑक्टोपॅड) आनी जेफ्री डिसोझा (गिटार) हे संगीतसाथ दितले. अपूर्वा सांबरेकार निवेदन करतलें.
सांजेच्या 6 वरांचेर उक्तावण सुवाळो जातलो. कार्यावळीक मुखेल सोयरे म्हूण गिरीश रवीन्द्र केळेकार (रवीन्द्र केळेकार हांचे पूत आनी वास्तू विशारद), तशेंच कार्यावळीचे अध्यक्ष म्हूण वसंत भगवंत सावंत (अध्यक्ष गोवा कोंकणी अकादेमी) हाजीर आसतले.
हे कार्यावळीच्या निमतान साहित्य, नाटक आनी संगीत ह्या मळाचेर वावर केल्ल्या मानेस्तांचो भोवमान करतले. भोवमानेस्तां मदीं महेश तुकाराम पारकार (साहित्यिक), पुर्णिमा वल्लभ देसाय (साहित्यीक), पांडुरंग शिरोडकार (संगीत), गजानन शशिकांत नायक (नाटक), उदय साजी तिळवे (नाटक) हांचो आस्पाव आसा.
कार्यावळीक रसिकांनी उपस्थीत रावून कार्यावळ येसस्वी करची अशें आयोजकांनी मागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
