फाल्यां, परवां दिवचले गोवा युवा महोत्सव

भांगरभूंय | प्रतिनिधी

मुख्यमंत्री प्रमोद सावंत करतले उक्तावण

भांगरभूंय । प्रतिनिधी
पणजी : कोंकणी भाशा मंडळ- गोंय, युवा जैतीवंत- दिवचल आनी नारायण झांट्ये वाणिज्य महाविद्यालय- सर्वण, दिवचल हांच्या जोडपालवान शेनवार २५ जानेवारी आनी आयतार २६ जानेवारी दिसा २६ वो गोवा युवा महोत्सव जाता.
उक्तावण सुवाळो 25 जानेवारीक सकाळीं साडेधा वरांचेर झांट्ये महाविद्यालयांत जातलो. मुखेल सोयरे म्हूण मुख्यमंत्री डाॅ. प्रमोद सावंत हाजीर आसतले. मयें मतदारसंघाचे आमदार प्रेमेंद्र शेट मानाचे सोयरे आसतले.
26 जानेवारी दिसा सांजे 5 वरांचेर समारोप सुवाळो जातलो. ह्या वेळार मुखेल सोयरे म्हूण प्रवीण झांट्ये (अध्यक्ष, झांट्ये ब्रदर्स एज्युकेशनल फावंडेशन) हाजीर आसतले. मानाचे सोयरे म्हूण राजभाशा संचलनालयाचे संचालक प्रशांत शिरोडकार हाजीर रावतले.
सगल्यांनी ह्या सुवाळ्याक हाजीर रावचें, अशें आवाहन डॉ. चंद्रकांत शेट्ये (येवकाराध्यक्ष), कलानंद कामत बांबोळकार (कार्याध्यक्ष), रत्नमाला दिवकार (भाशा मंडळ अध्यक्ष) आनी तन्वी पळ (मुखेल संयोजक) हांणी केलां.

विवीध कार्यावळी
पयलो दीस – 25 जानेवारी : नमन (पंगड आनी शिक्षणीक संस्था) – सकाळीं 9:30 ते 10:30 (सर्ती दिसा सकाळीं 9.15 वरां मेरेन नोंदणी केल्ल्या पंगडांकूच सर्तींत वांटो घेवंक मेळटलो.). उक्तावण सुवाळो सकाळीं 10:30 ते 11:30.
मुखेल माची : लोकमांड- सकाळीं 11:30 ते दनपारां 2 मेरेन, आयलें तशें गायलें (ट्रियो), दनपारां 2 ते सांजे 4 (फकत पंगड), कोंकणी पॉप, सांजवेळा 4 ते सांजे 6 मेरेन
माची दोन : लोकनाट्य- सकाळीं 11:30 ते दनपारां 2 (फकत शिक्षणीक संस्था), धीक थै (चांचणी फेरी), दनपारां 2 ते 4, प्रस्नमाची (चांचणी फेरी) सांजवेळा 4 ते सांजे 5 मेरेन.
कॉन्फरन्स हॉल : आयलें तशें गायलें (चांचणी फेरी), सकाळीं 11:30 ते दनपारां 1 मेरेन, शुटिंग (चित्रीकरण), दनपारां 2 ते सांजे 4 मेरेन.
फॉयर एरिया : फास्की- सकाळीं 11:30 ते दनपारां 3:30, खेळ – दनपारां 1 ते सांजे 4 (फकत पंगड)

दुसरो दीस – 26 जानेवारी : माची दोन : मुस्तायकी (चांचणी फेरी) सकाळीं 10 ते दनपारां 12:30 मेरेन.
मुखेल माची: धीक थै, सकाळीं 9:30 ते 11 (फकत शिक्षण संस्था), प्रस्नमाची- सकाळीं 11 ते दनपारां 2, मुलाखत- दनपारां 2 ते 3, फास्केची पावणी- दनपारां 3 ते 3:30 मेरेन, मुस्तायकी- दनपारां 3:30 ते सांजे 5 मेरेन.
समारोप सुवाळो सांजे 5 ते 5:30 वरांचेर जातलो. दिवचल तालुक्या सयत राज्यांतल्या सगल्या विद्यार्थी, तरणाट्यांनी दोनूय दीस युवा महोत्सवाक व्हडा प्रमाणांत हाजेरी लावची, असो उलो आयोजकांनी मारला.