भांगरभूंय | प्रतिनिधी
पणजीः राज्यांत जनगणनेचो पयलो टप्पो १ एप्रील ते १५ मे मेरेन जातलो. पयल्या टप्प्यांत घरगुती जनगणना करतले. हातूंत नागरिकांक १ ते १५ एप्रील ह्या काळांत जनगणना पोर्टला वयल्यान स्वताची नोंदणी करपाक मेळटली. तशेंच घराघरांनी वचून म्हायती एकठांय करपाचें काम १६ एप्रिल ते १५ मे ह्या काळांत जातलें.
दुसर्या टप्प्यांत म्हळ्यार ९ ते २८ फेब्रुवारी २०२७ मजगतीं प्रत्यक्ष जनगणना जातली अशी म्हायती जनगणना कार्य संचालनालयाची संचालिका चेष्टा यादव हांणी दिली. मंगळारा पर्वरे जाल्ले पत्रकार परिशदेंत ते उलयताले.
ह्या वेळार विजय सक्सेना, श्वेता नंदवाना हाजीर आशिल्लीं.
यादव हांणी, दुसरो टप्पो देशभर संयुक्तपणान चलयतले अशें सांगलें. जनगणने खातीर ४२२ निरिक्षक आनी २४६७ मेळून ३०८६ कर्मचार्यांची नेमणूक केल्या. हातूंत मुखेलपणान शिक्षकांचो आस्पाव आसा. निरिक्षक आनी कर्मचार्यांक दोनूय टप्प्यां खातीर २५ हजार रुपया पगार दितले. अंदूं पयलेच खेपे डिजिटल पद्दतीन जनगणना जातली. जनगणनेचे कर्मचारी मोबायल ऍपा वरवीं म्हायती एकठांय करतले. हे खातीर तांकां स्वताचे मोबायल वापरचे पडटले. निरीक्षक आनी कर्मचार्यांच्या कामाचो नियाळ सीएनएमएस पोर्टला वरवीं घेतले.
जनगणनेंत ३३ तरेचे प्रस्न विचारतले. तातूंत घर नंबर, इमारतीचो नंबर, घराची स्थिती, कुडींचो आंकडो, पांखें, माळये खातीर वापरिल्लें सामान, घरांत पिवपाचें उदक, वीज, घाणयारें उदक सोडप, एलपीजी जोडणी, जेवणांत वापरिल्लीं मुखेल अन्नधान्यां, घरांत रावपी लग्न जाल्ल्या जोडप्यांचो आंकडो, मोबायल, टीव्ही, स्मार्ट फोन, संगणक, लॅपटॉप, चार चाकी, दोन चाकी आनी हेर म्हायती एकठांय करतले. कायद्या प्रमाण जनगणना चलता देखून जनगणना कामगारांक घरांत भितर सरपाक, योग्य म्हायती दिवपाक आनी घराचेर क्रमांक बरोवपाक दिवप कायद्यान सक्तीचें आसा.
भारताच्या स्वातंत्र्या उपरांतची ही ८वी जनगणना. गोंयांत ३ जिल्ह्यांचे जिल्होधिकारी जनगणने खातीर ३ मुखेल जनगणना अधिकारी म्हूण काम करतले. तशेंच २६ उपजिल्होधिकारी आनी केस अधिकारी प्रभार अधिकारी म्हणून काम करतले. राष्ट्रीय पांवड्यावेले दोन अधिकारी निरिक्षक आनी जनगणना कामगारांक प्रशिक्षण दितले. हाचे भायर गोंयांत ६ मास्टर आनी ५० फिल्ड ट्रेनर नेमल्यात. सरकारी धोरणां थारावप, मतदारसंघ पुनर्गठन, आरक्षण आदी जायत्या गजालीं खातीर जनगणना गरजेची आसा. गोंयच्या सगल्या नागरिकांनी हे प्रक्रियेंत सहकार्य करचे असो उलो चेष्टा यादव हांणी मारलो.
अशी आसतली स्वयं नोंदणी प्रक्रिया
राज्यांत स्वयं नोंदणी प्रक्रिया १ ते १५ एप्रील ह्या काळांत जातली, हाचे खातीर जनगणना पोर्टलाचेर वचून म्हायती भरची पडटली. हाचे उपरांत त्या मनशाक ताच्या मोबायलाचेर ११ अंकांचो आयडी धाडटले. जनगणनेचे कर्मचारी घरा येतकच तांकां हो आयडी दाखोवचो पडटलो. म्हायती तपासल्या उपरांत ती अपलोड जातली. कोंकणी सयत हेर १६ भासो वापरपाचो पर्याय ह्या पोर्टलाचेर उपलब्ध आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
