भांगरभूंय | प्रतिनिधी
पणजीः सिद्दिकी सुलेमान खान हाणें बंदखणींतल्यान पळून वचपाच्या प्रकरणाचेर जामिनाचेर सुटिल्लो अमीत नायक हाची फाल्यां मंंगळारा मानसोपचार संंस्थेंत (आयपीएचबी) मानसीक स्थितीची तपासणी जातली. मानसीक स्थितीचे तपासणे उपरांंत सिद्दिकी सुलेमान पळ काडपा विशीं ताची चवकशी करप पुलिसांंक शक्य जातलें.
जमीन हडप प्रकरणांत अटक जाल्लो सिद्दिकी सुलेमान बंदखणींतल्यान पळून गेल्ल्याच्या प्रकाराक एक सप्तक पुराय जावन गेलें तरी ताका अटक करपाक पुलिसांक अजून येस येवंंक ना. ताका पळून वचपाक मजत केल्ल्या पुलीस कॉन्स्टेबल अमीत नायक हाची शेनवारा जामिनाचेर सुटका जाली. पणजी पयलो वर्ग न्यायदंंडाधिकारी न्यायालयान ताका सशर्त जामीन मंंजूर केलो. सिद्दिकी सुलेमान खान हाचे सयत पळून गेल्लो अमीत नायक हो हुबळी पुलिसांंक शरण आयलो. पुलीस कोठयेंत आसतना फिनेल पियेवन ताणें आत्महत्येचो यत्न केलो. हाचे उपरांंत ताका उपचारा खातीर गोंंय वैजकी म्हाविद्यालय हॉस्पिटलात दाखल केलो. हॉस्पिटलांतल्यान डिस्चार्ज दिले उपरांंत ताका जामीन मंंजूर जालो.
फाल्यां आयपीएचबीन मानसीक तपासणे खातीर व्हरतना तपास अधिकाऱ्याक ताचे सयत वचपाची मेकळीक आसा. तशेंच चवकशी खातीर जाय तेन्ना ताका आपोवपाची मेकळीक पुलिसांंक आसा. गोंंया भायर वच्चो ना, हे हमीचेर ताका जामीन मंंजूर जाला.
पुलीस कोठयेंतल्यान पळून गेले उपरांंत सिद्दिकी सुलेमान खान हाणें व्हिडियो जारी केल्लो. हो व्हिडियो जारी केल्ल्यार आयतारा सप्तक जालें. ह्या व्हिडियोंत ताणें एन्कावंटर करपाची धमकी दिवन पुलिसांंनी आपल्याक हुबळी सोडिल्ल्याचो आरोप केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
