फाल्यांच्यान ‘म्हजें घर’

भांगरभूंय | प्रतिनिधी

लॅण्ड रेविन्यू कोड पयलींचीं घरां धरतले सेटलमेंट वाठारांत

महसूल खात्याच्यो अधिसुचोवण्यो जारी

अनधिकृत बांदकामां अधिकृत करपी कायदे फाल्यां सावन

भांगरभूंय । प्रतिनिधी

पणजी : म्हजें घर येवजणे खाला अनधिकृत घरां/ बांदकाम अधिकृत करपाची तजवीज आशिल्ल्या कायद्यांची कार्यवाही फाल्यां 4 ऑक्टोबर सावन सुरू जातली. हे विशींची अधिसुचोवणी जारी जाल्या. लॅण्ड रेविन्यू कोड (भूंय महसूल संहिता) येवपा पयलींचीं घरां/ बांदकामां सेटलमेंट झोनांत (निवासी वाठार) गृहीत धरतले. हाका लागून खंयच्याय प्रकारचे जमनींत आशिल्ल्या घरां/ बांदकामां खातीर रुपांतरण सनद घेवची पडची ना. येणावळ खात्याच्या अधिकाऱ्यां कडल्यान ही म्हायती मेळ्ळ्या.

सरकारी जमीन, कोमुनिदाद जमीन तशेंच खासगी जमनी वयलीं अनधिकृत घरां/ बांदकामां नेमीत करपा खातीर पावसाळी अधिवेशनांत सरकारान तीन स्वतंत्र विधेयकां संमत केल्लीं. विधेयकांक मान्यताय दिले उपरांत कार्यवाहीची तारीख निश्चीत करपी अधिसुचोवण्यो महसूल खात्यान जारी केल्यात. ह्यो तीन स्वतंत्र अधिसुचोवण्यो आसात. जमनीचे दर, कागदपत्रां तशेंच अर्जांचो आस्पाव अधिसुचोवणेंत आसा.

सरकारी, कोमुनिदाद वा खासगी जमनी वयलीं घरां तरेकवार वाठारांत (झोन) आसात. रुपांतरण सनद नासतना घरां अधिकृत कशी जातलीं? असो मुद्दो समाजीक वावुरपी उपस्थीत करतात. लॅण्ड रेविन्यू कोड (भूंय महसूल संहिता) अस्तित्वांत आयले उपरांत रुपांतरण सनद घेवप गरजेचें थारलें. लॅण्ड रेवेन्यू कोडा पयलीं सनद घेवची पडनासली. हाका लागून 1972 पयलींचीं घरां/ बांदकामां सेटलमेंट झोनांत गृहीत धरून ती अधिकृत करतले, अशी म्हायती अधिकाऱ्यांनी दिली.

कोमुनिदाद जमनी वयलीं 28 फेब्रुवारी 2014 पयलींचीं घरां/ बांदकामां गोंय लेजिस्लेटिव डिप्लोमा दुरुस्ती कायद्या खाला अधिकृत जातलीं. हे खातीरचे नेम निश्चीत जाल्यात. घर अधिकृत करपा खातीर फॉर्म 1 खाला अर्ज करचो पडटलो. अर्जाचो नमुनो अधिसुचोवणे सयत जारी जाला. घर नंबरा संबंदी पंचायत/ पालिकेचें कागदपत्र, घर 28 फेब्रुवारी 2014 पयलीचें आशिल्ल्याचो पुरावो, मामलेदारा कडल्यान राबितो दाखलो अर्जा सयत सादर करचो पडटलो. हे भायर एक, चवदाचो उतारो, घराचो आराखडो, सर्व्हे आराखडो, नगरनियोजन खात्या कडल्यान झोनींग प्रमाणपत्र जोडप गरजेचें आसा. अर्जदाराक प्रतिज्ञापत्र सादर करचें पडटलें. प्रतिज्ञापत्राचो नमुनो अधिसुचोवणे सयत आसा. तशेंच कोमुनिदादीचे मान्यताये खातीर कोमुनिदादीक अर्ज (फॉर्म 3) करचो पडटलो. ह्या अर्जाचो नमुनो अधिसुचोवणे सयत आसा. कोमुनिदादीची मान्यताय मेळ्ळे उपरांत अर्जांचेर निर्णय घेवपा खातीर म्हालवार अतिरिक्त जिल्होधिकाऱ्यांची नेमणूक जाल्या.

कोमुनिदाद जमनी वयलीं घरां नेमीत करपाचे दर

1972 पयलींचीं घरां – 25 रुपया चौमि प्रमाण

1973 ते 1986 मेरेनचीं घरां – जमनीच्या उण्यांत उण्या दराच्या 50 टक्के

1987 ते 2000 मेरेनचीं घरां – जमनीच्या उण्यांत उण्या दराच्या 75 टक्के

2001 ते 2014 मेरेनचीं घरां – जमनीच्या उण्यांत उण्या दरा प्रमाण

अर्जा सयत जी रक्कम येतली ती सगळी कोमुनिदादीक भरपायेच्या रुपांत कोमुनिदादीक दितले.

सरकारी जमनी वयलीं घरां/ बांदकामां गोंय भूंय महसूल दुरुस्ती कायद्या खाला (गोवा लॅण्ड रेवेन्यू कोड अमेंडमेंट) अधिकृत जातलीं. हे खातीरचे नेम निश्चीत करपी अधिसुचोवणी जारी जाल्या. घरां अधिकृत करपा खातीर अर्ज (फॉर्म 23) उपजिल्होधिकाऱ्याक करचो पडटलो. अर्जाचो नमुनो अधिसुचोवणेंत आसा. अर्जा सयत घर नंबरा संबंदी पंचायत/ पालिकेचें कागदपत्र, घर 28 फेब्रुवारी 2014 पयलींचें आशिल्ल्याचो पुरावो, मामलेदारा कडल्यान राबितो दाखलो अर्जा सयत सादर करचो पडटलो. हे भायर एक, चवदाचो उतारो, घराचो आराखडो, सर्व्हे आराखडो, नगरनियोजन खात्या कडल्यान झोनींग प्रमाणपत्र जोडप गरजेचें आसा. अर्जदाराक प्रतिज्ञापत्र सादर करचें पडटलें. प्रतिज्ञापत्राचो नमुनो अधिसुचोवणे सयत आसा.

सरकारी जमनी वयलीं घरां नेमीत करपाचे दर

1972 पयलीचीं घरां – 25 रुपया चौमि प्रमाण

1973 ते 1986 मेरेनचीं घरां – जमनीच्या किमान दराच्या 50 टक्के

1987 ते 2000 मेरेनची घरां – जमनीच्या किमान दराच्या 75 टक्के

2001 ते 2014 मेरेनची घरां – जमनीच्या किमान दरा प्रमाण

खासगी जमनी वयलीं अनधिकृत घरां अधिकृत करपा खातीर गोंय अनधिकृत बांदकामां अधिकृत करपी दुरुस्ती कायदो (रूका) 4 ऑक्टोबर 2025 सावन लागू जातलो. ही स्वतंत्र अधिसुचोवणी जारी जाल्या.

केंद्रीय गृहमंत्री अमीत शाह फाल्यां गोंयांत

तरेकवार कायद्या खाला अनधिकृत घरां अधिकृत करपा खातीरची म्हजें घर येवजणेचो शुभारंभ फाल्यां 4 तारखेक जातलो. केंद्रीय गृहमंत्री अमीत शाह हांचे हस्तुकीं अर्ज वांटपाचे कार्यावळीचो शुभारंभ जातलो. हे खातीर केंद्रीय गृहमंत्री अमीत शहा हे फाल्यां गोंयांत येतात.