भांगरभूंय | प्रतिनिधी
नवी दिल्ली, खबरां संस्था: नवो अर्थसंकल्प फाल्यां १ एप्रीला सावन लागू जातलो. म्हणल्यार, १ फेब्रुवारी दिसा अर्थसंकल्प सादर करतना सरकारान केल्ल्या घोशणांचेर काम सुरू जातलें. तशेंच येवजण्यांचे फायदे केन्ना उपलब्ध जातले हें येवजणेच्या प्रकाराचेर आनी अंमलबजावणीचे प्रक्रियेवर निंबून आसतलें.
आयकर सूट वा अनुदान असले फायदे १ एप्रील सावन लागू जातले, कारण ते अर्थीक वर्सा कडेन जोडिल्ले आसा. तशेंच पायाभूत सुविधा आनी उदरगत प्रकल्प, समाजकल्याण येवजण्यांचे फायदे मेळपाक वेळ लागता, कारण ताचेर काम करपा खातीर एक व्हडली प्रक्रिया आसता.
लागू जावपी ६ बदल
१. कर स्लॅबांत बदल: २० ते २४ लाख उत्पन्ना खातीन नवो स्लॅब
कितें बदल्लां: नवे कर पद्दती प्रमाण आतां १२ लाख रुपया मेरेन येणावळीचेर कर लागचो ना. पगारदरा खातीर ही सुट ७५,००० रुपयांची वजा जावन १२.७५ लाख रुपयां मेरेन वाडटली. नवे कर प्रणालींत २० ते २४ लाख रुपयांच्या उत्पन्ना खातीर २५% कर दराच्या नव्या स्लॅबाचो आसपाव.
परिणाम कितें जातले: पयलीं १५ लाखां वयर येणावळीचेर चडांत चड ३० टक्के दर लागू जातालो, पूण आतां ही मर्यादा २४ लाख रुपया मेरेन वाडयल्या. हाका लागून मध्यम आनी वयल्या मध्यम उत्पन्नाच्या गटांक कर वाटोवपाक मजत जातली.
२. टीडीएस मर्यादा वाडयली: ६ लाख रुपयां मेरेनच्या भाड्याच्या उत्पन्नाचेर कर ना
कितें बदल्लां: कांय पेमेंटांचेर टीडीएस (स्रोतोर कर कपात) मर्यादा वाडयल्या.
-भाड्याच्या उत्पन्नाचेर टीडीएस सुट दुपेटीन वाडली: भाड्याच्या उत्पन्नाचेर टीडीएस मर्यादा रु.२.४ लाखां वयल्यान रु.६ लाख मेरेन वाडयली.
-ज्येश्ठ नागरिकां खातीर व्याज उत्पन्नाचेर सुट दुपेटीन वाडली: बँकेच्या एफडींतल्यान व्याज उत्पन्न मेळोवपी ज्येश्ठ नागरिकां खातीर टीडीएस मर्यादा रु. ५०,००० वयल्यान रु. १ लाख मेरेन वाडयल्या.
-वेवसायीक सेवांचेर टीडीएस मर्यादा वाडोवप: वेवसायीक सेवांचेर टीडीएस मर्यादा आतां ३० हजार रुपया वयल्यान ५० हजार रुपया मेरेन वाडयल्या.
कितें परिणाम जातले: हाका लागून उण्या उत्पन्नाच्या व्यक्तींचेर टीडीएसचो भार उणो जातलो आनी रोख प्रवाहांत सुदारणा जातली.
३. टीसीएस मर्यादा वाडयली: परदेशांत शिक्षणा खातीर १० लाख रुपयां मेरेन धाडपाचेर कर ना
कितें बदल्लां:परदेशांत शिक्षणा खातीर पयशे धाडपाचेर सोर्साचेर (टीसीएस) वसूल केल्ल्या कराची मर्यादा आतां ७ लाखां वयल्यान १० लाख रुपया मेरेन वाडयल्या. तशें जर पयशे बँक खंयचेय हेर संस्थे कडल्यान कर्ज म्हणून घेतल्यात जाल्यार टीसीएस घेवचे ना.
कितें परिणाम जातलो: टीसीएस काडून उडयिल्ल्यान विद्यार्थ्यांक आनी तांच्या कुटुंबाक फायदो जातलो. हाचे पयलीं ७ लाखां परस चड रकमेचेर ०.५%-५% टीसीएस कापताले. हाका लागून बदली प्रक्रिया मात्शी धांवपळ जाताली. आतां १० लाख रुपया मेरेनची पुराय रक्कम दुसर्या तोंकाक पावतली.
४. अपडेटेड रिटर्न दाखल करपा खातीर चड वेळ: ४८ मयन्यां मेरेन दाखल करपाक मेळटले
५. युलिपाचेर भांडवली नफा कर: रु.२.५ लाखां परस चड प्रीमियम भांडवली मालमत्ता मानतले
६. सवाय-म्हारग: कस्टम ड्युटी बदलिल्ल्यान १५०-२०० उत्पादनांचेर जातलो परिणाम
सवाय आसपाक शकतात अशें सामान
-४०,००० डॉलर्स परस चड मोलाच्यो वा ३,००० सीसी परस चड इंजिन तांक आशिल्ल्यो आयात केल्ल्यो गाडयो.
-१६०० सीसी परस चड इंजिन तांक नाशिल्लयो सीबीयू युनिट्स म्हणून आयात केल्ल्यो मोटारसायकली.
-३६ जिवीत वाटावपी वखदांचेर शिमाशुल्क रद्द केल्ल्यान गंभीर उपचारांचो खर्च उणो जातलो.
-ईव्ही सवाय आसपाक शकतात. सरकारान बॅटरी उत्पादना खातीर आशिल्ल्या ३५ भांडवली वस्तूंचेर शुल्क रद्द केला. मोबायल फोन बॅटरी उत्पादना खातीरच्यो २८ भांडवली वस्तूंक सीमाशुल्कांतल्यान सूट.
ह्यो गजाली म्हारग आसपाक शकतात : स्मार्ट मीटर सोलर सेल्स, आयात केल्लीं जोतीं, मेणवाती, व्हडीं आनी हेर बोटी, पीव्हीसी फ्लेक्स फिल्म्स, पीव्हीसी फ्लेक्स शिट्स, पीव्हीसी फ्लेक्स बॅनर्स, विणकाम प्रक्रिये पसून कपडे, एलसीडी/एलईडी टीव्ही
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
